Read Ranglong MATHAIIN 13 Bible Online

MATHAIIN 13 - Ranglong bible

MATHAIIN 13

¹Hava nikhua Isua in ata asuaka tindil kola ansuta.

²Hatuka mitampa a kom ahonga havan han rakuang khata achuanga ansut hatuka mi dora ti kola andinga a om.

³Hanke aman ankhina na chong atampa hangai rang aril pe.

⁴Aman ei ti, “Chin the pun chi anthe ranga ase. A the han hotukmo chu lam kola achula hava ha va ngai ahonga asak zit.

⁵Hatuka itukmo chu lung bila achula phil tam maka hava han phil atam ei man nok sika hava ha among lilipa.

⁶Tenchu ani suakle a ra-ema hatuka arazung ei om nok sika achar biang.

⁷Hatuka itukmo chu raling bila achula hava han raling kung ansona adel tita asiak.

⁸Hatuka achi hotukmo chu phil asana achula anrana mun raza, mun somaruk le mun somanthuma apung.”

⁹“Kuar anei takin re rase!” Isuan ati.

¹⁰Hava suale a zolai ngaiin ahong dep u na arakel u, “Ichangmo ankhina le amani kom chong nei ril?” ati u na.

¹¹Aman a masanga, “Vanram rui anthuk ngai na kom u na anriat ani zei amani chu pe mak.

¹²Asik chu adon tak chu anpesa inti hanuk sap inti tenchu donlui tak ama ei nei selep um akom ata anlan ti.

¹³Hava sik han ankhina le kei na ril u. Asik chu amani hi a enam mu u mak, a rangaiam re u mak hanuk tuak u mak.

¹⁴Hatuka amani rang hi Isai in ei ril ei kip: ‘Nangnin rangaia re un na ti tenchu tuak pial u no ta ni; hatuka ena mu un na ti tenchu re pial u no ta ni.

¹⁵Asik chu hiva mi ngai a malung ril abui ei ni u, anngaina rang akuar u aset ke ni zei, hatuka amani amit u anthim ani zei, Hanokten, amanin mit le mu na, hatuka kuar le riata, malunga tuaka hatuka kira honga lei mandam lam u ning.’

¹⁶“Tenchu na mit u chanasa, asik chu hava amu hatuka na kuar um asik chu hava ha ariat.

¹⁷Asik chu ataka kei na ril ani u zei nangnin nei mu u ngai hi Deari le minzik tamtakin amu rang ei zota muthei u mak hatuka nangnin nei rangai u ngai anngai rang ei zot u na rangai thei u mak.

¹⁸“Hasik han nangnin chin thepu ankhina rangai u ro.

¹⁹Min ha ram ruia rangai le achong ariat nok ten hava han ratha sia a honga a malunga anling ngai ha hava ha a maruk hava ha lampuia chul.

²⁰Hatuka lunga chul ha hava ha chong ariata raisana apom tenchu a malunga razung abui hun atom te angir.

²¹Nukhona ha chong sika antak le annotna atong le a malung aduk.

²²Hatuka raling bila chul hiva hi. Hiva chong ei riat hatuka ramual malung le nei lungkhamin, ha chong adel tita hava han mara don mak.

²³Hatuka phil asana chul hiva hi. Hiva chong a rangai hava ha ariat ama ha laklaka anra let raza hotukinmo somaruk hotukinmo somanthum mara adon.”

²⁴Hava suale aman hangai kom ankhina khat a masuak reta ei ti, “Vanram ha mikhat le na manrual thei aman a phaia chimuru sa ava ling.

²⁵Tenchu mi in suale anmumak a honga ha bu chi bila chiakru atheka ase viak.

²⁶Nukhona aru monga anra hatik han chiak um anlang.

²⁷Hava han ha a puma suak ngai ahonga ama ha ahong ril, ‘Ka pu, na phaia bu chi sa nimak mo nei va ling hanle chiak kung hovan ata mo ei hong?’ ati u.

²⁸Aman hangai ha ati pe, ‘Ananmumak khat peiin ei hong tho ke ani zei.’ Suak ngaiin ei ti pe, ‘Hano na zot mo koini sena phoi inti?’

²⁹Aman ati he e, ‘ariat samak chiak kung na phoi u le hava bila bukung um nei phoi u rang ke ati.

³⁰Sang at tenpei aninin anson rase nuka sangat tik a at ngai ha chiak at u tan anhal ranga alo lona khita siak u ro tenchu bu ha ka sasiara hong koi u ro ti ka ti.’ ”

³¹Aman ankhina khat akom u na a masuak reta: “Vanram hi hoiro ru khat ang, mi khatin achoi a phaia ava ling, ati.

³²Ru tin ranga ha ru ha asin khit tenchu anson le a suangrua ata ansona va ngai a honga a honga riaka a om u.”

³³Aman hanuk ankhina khat aril pe, “Vanram hi chol le ankhi theia nupang khatin mon anthum vaipoldi a manpola asiaka nukhona chol achang zit,” ati.

³⁴Hiva chong ngai hi Isuan ankhinana mi kom ei ril ankhina nok anten ite hangai kom ril mak.

³⁵Dearin ei ril hiva chong ei kipna, “Koi ankhina chong le ka mur malong ka ti ramual achui ata anthup hava ngai dora manlang ka ti.”

³⁶Hava han mi ngai a mathana ina a hong, hatuka a zolai ngai akom a honga ama ha ati pe, “Phaia chiak kung ngai ankhina anthiang vanga na ril ro,” ati pe u.

³⁷Aman a masanga, “Chiru sa aling ha Miring Sapa ati;

³⁸phai ha ramual, chiru sa ha aram nai ngai, chiak kung ha pap ratha nai ngai;

³⁹adui pun ei ling ha ama ha Diabol, a at hun ha hun hek tik, a at ngai vanpalai ngai.

⁴⁰Hantin han hontinmo chiak ankhoma moia anpai hava ang han hun hek tika ni inti.

⁴¹Miring Sapa a vanpalai ngai hong tir inti amanin a ram ata dik lui annim ngai dora rasuang inti.

⁴²Hatuka hangai ha moisumpuia thak inti hava muna chapa a ha arial inti.

⁴³Hava han anzik ngai a pa u rama ani anga a ra-ang el inti kuar a nei takin re rase!

⁴⁴“Vanram hi phaia nei anthup ang mi khatin amuna athup tita asiak nuka raisan sika a nei ngai dora azuar zita ha phai ha ava rachok.

⁴⁵“Hanuk vanram hi mi sum anphung khat le anrual rochon a sasa anrok.

⁴⁶Aman rochon alu khat a muna ase a nei azuar zita hava ha a rachok.

⁴⁷“Hanuk, vanram chu len akei le anrual tindila ava peia ngatin aluaka.

⁴⁸Len ha abit le min akeia tanga abanga hatuka ansut chunga asa ngai azena koka asiak asiat ngai a pei zit.

⁴⁹Hantin han hun hek tika ni inti vanpalai ngai honga minzik ngai bil ata asiat ngai mankhai inti.

⁵⁰Hatuka hangai ha moisumpuia pei inti hava muna chapa ha arial inti.

⁵¹“Hava ngai na riat mo u zei? ati na. Amanin, “O,” ati u.

⁵²Hanke aman ati pena, “Hasik han vanram ruia asadima ariat sua dan minchu ngai chu in puma khatin a sumduk ata neinun athar le amarua ansuakpu ang ani.”

⁵³Hiva ankhina ngai azui suale Isua havan ata ase.

⁵⁴Hatuka a rama asena mi ngai anchunna ina mi a manchuna hava han anlai u na. “Ama hi hidor mi hian sinthotheina ngai hovan ata mo?” ati u.

⁵⁵“Thing asinpu naipasal nimak mo a nu raming hi Mari nimak mo? Hanuk Jakob, Joseph, Simon le Juda hi a parual ngai nimak mo?

⁵⁶Hanuk a sarnu ngai dora hiva hin abui mo? Hanle hovan ata mo ei man hantin han a malung ei zing u?”

⁵⁷Tenchu Isuan hangai ha, “Aram le a Deari ngai chu a khua le a in rong nok chu mun ateia lalchi manluia om ngai mak,”

⁵⁸Hatuka ei iam u nok sika aman havan tichangabui sin atam tho thei mak.