Read Ranglong MATHAIIN 14 Bible Online

MATHAIIN 14 - Ranglong bible

MATHAIIN 14

¹Hava lai tak han Herod rengin Isua thang ha alei riat.

²Hatuka a suak ngai kom ei ti, “Ama hi Baptispu Johon athi ngai bil ata anthuia hasik han sinthotheina ngai le sin ei tho.”

³Asik chu Herod a parual Philip a nungak Herodi ranga Johon asura akhita lungina ei khum.

⁴Asik chu Johonin, “Ama nei lak hi dik mak!” ei ti pe.

⁵Hatuka aman athat rang azotam mi ngai ei achi, asik chu min deari ati na ei pom u.

⁶Tenchu Herod anzirni panta asuak le Herodi nainupang a lama, Herod a rai ei san.

⁷Hasik han khomak ansam chunga, “Nei zong tak pei na pe ka ti” ei ti.

⁸Hanke a nu chonga, “Baptispu Johona lu khenga hivan ka kom na pe ro,” ei ti.

⁹Hiva hin rengpa a malung ana tenchu a khomak ansam sika, hatuka a bila ansut ngai sika hava apek ranga chong apek.

¹⁰Aman mi a mansena lungina Johona lu ava man tan.

¹¹Hatuka a lu ha kheng khat le a hong choia ha nungak te ha apeka hatuka aman a nu kom achoi.

¹²Hava suale a zolai ngai a honga a ruak ha a choia ava phum u hatuka Isua kom ahong u na a manthei u.

¹³Isuan hava ha ariata havan ata rakuang le maruka mi buina khata ase hatuka mi ngaiin ariata muntin ata a honga tang tiang a nuk azi u.

¹⁴Hanke aman mi tampa a muna amani ha lungkham amuna ana ngai ha a mandam.

¹⁵Hava suale ani buia a zolai ngai a kom ahong u na, “Hiva hin mim abui anim om lai mak mi ngai mathan ta ro khuana se na arang u sak va en u rase,”

¹⁶Isuan hangai ha ati pe, “Ei se nang u mak nangnin hava ngai ha sak rua pe u ro,” ati.

¹⁷Amanin ei ti pe, “Koinin hivan vaipol ranga le nga anni baka chu a om atei ite ommak.”

¹⁸Aman ei ti, “Hava ngai hivan ka kom hong ko u ro.”

¹⁹Hanke mi ngai ha sul chunga mansut u ro ati na hatuka ha vaipol ranga le nga anni alaka vanram tiang chung atanga bor apek hatuka vaipol itukmo chu akhiaka a zolai ngai apek, zolai ngaiin mi ngai apek.

²⁰Hava han alom u na akhop u. Hatuka amanin anniang akiak akui kok somleianni arut u.

²¹Asak ngai dora hi nupang le naipang tel luia pasal asang ranga ni inti.

²²Hatuka Isuan havan len a zolai ngai ha anthiang vanga ei ril, “Rakuanga chuang u tan mana son tiang rala van kan u tan se u ro,” Hava han mi ngai ei mathan.

²³Hatuka mi dora a mathan suale maruka bor azong ranga muala a kal zan azing le hava muna atheia a om.

²⁴Tenchu rakuang ha tang ata alapana a oma tin soka thinthi ei hong sem sika anvok.

²⁵Zanchima ti chunga kal achoia amani kom ei hong.

²⁶Hava ha zolai ngaiin ama ha ti chunga kal ei choi amu u na phukpui alaka ei ti u, “Raluai ke,” ati na achina ankhek u.

²⁷Tenchu hava han len ei chong ei ti, “Ngam u ro koi ke ka ni achi u no ro!”

²⁸Hava han Pitorin a masanga, “O Puma, nang na ni ten ti chunga kal choia na kom ase na chong na pe ro.”

²⁹Aman ei ti, “Hong ro!” Hanke, Pitor rakuang ata a chuma ti chunga kal choia Isua kom ase.

³⁰Tenchu thinthi a muna achina ei anning tir sika ankheka ei pai, “O Puma, na san ta ro!” ati.

³¹Havan len han Isuan a kut asona asura, “O iam atom ichangmo nei iam nok?” ati pe.

³²Hava suale rakuanga akal ule thinthi among.

³³Hatuka rakuanga om ngai han ahong u na ama ha amok u na, “Atak taka nang hi Pathian Sapa na ni,” ati u.

³⁴Ankan u na tang tiang Genesaret bunga ava suak u.

³⁵Havana mi ngaiin ama ha ariat u na asir apanga hava bunga mi dora koma athang a mathuan u na. Hatuka ana dora aloma a kom ava man lak u.

³⁶Hatuka ama ha ei mathem u a puan duai amer ngal aton thei ranga hatuka aton doran chu ei dam u.