Read Ranglong MATHAIIN 15 Bible Online

MATHAIIN 15 - Ranglong bible

MATHAIIN 15

¹Hava han Jerusalem ata Pharisi le minchu ngai Isua kom ahonga ei ti u.

²“Na zolai ngai ichangmo tiana ulian ngai riti ei khel u? Asik chu sak asak u le akut rasu u mak.”

³Aman a masanga hangai rang, “Nang nim na riti u nei manlian u sika Pathian chongpek ichangmo nei khel u?

⁴Asik chu Pathianin ei ti, ‘Na pa le na nu lalchi tho u ro,’ hatuka ‘A pa mo a nu mo antir tak chu athi anang.’

⁵Tenchu nei ti u nu le pa ka koma nei sabei u na tak ha, ‘Pathian kom anpek ani zei,’ atei nu le pa lalchi tho nang lai mak.

⁶Hantin han tiana na riti u sika Pathian chong akorong nei manchang u.

⁷Phuazekam ngai Isai han nangni ei na ril u!

⁸Hiva mi ngai amura ana lalchi u a malunga ka kom ata ala na ankhai.

⁹Hatuka hava ngai han ana biak papei u miring chongpek ngai dikna tia a manchu!”

¹⁰Hanuk aman mi ngai akom akuia rangai u ro re u ro ati.

¹¹“Baikuana alutin miring man nim mak tenchu bai ata asuak ha ke mi anan nim.”

¹²Hanke zolai ngaiin ahong dep u na ama rang ha, “Na riat mo Pharisi ngaiin hava chong ei riata malung ei ni nok,” ati pe u na.

¹³Aman a masanga, “Vana ka Pan ei ling nok kung chu phoia anpei inti,” ati pe.

¹⁴“Hangai ha om rase hangai ha acho ngai acho lam anruai acho ha achon lam a manmun aninin khura chul unti,”

¹⁵Pitorin a masang ama ha ati pe, “Hiva ankhina hi na manthei ro.”

¹⁶Aman, “Nang nim atun ten re luia nei la om u mo? ati.

¹⁷Hiva hi la re u mak che mo na baia alut tak na vona ase asuak reta anpei.

¹⁸Tenchu na mur ata asuak tak pei chu na malung ata ahong hatuka mi a mannim.

¹⁹Asik chu malung sung ata mandon asiat, mi that, uiare, annim, noti lam, milak chong antir rua ei hong.

²⁰Hiva ngai doran mi a mannim tenchu, kut suk luia saka mi hava han mannim mak.”

²¹Hava suale Isua havan ata asena Tura le Sidon rama ase.

²²Hatuka enta, sova rama Kanana nupang khat a honga ankheka ei ti, “O Puma, David Naipasal koi hi lungkham na mu ro! Ka nainupang sanai kachai ei o a duk ana sabak.”

²³Tenchu aman ite masang mak. Hanke azolai ngaiin a kom ahonga ei hong mathem u na ei ti u, “Ama hi mathan ta ro asik chu hiva mi hi koini nunuka ankhek.”

²⁴Aman a masanga, “Israel chi bera anpei ngai baka tute koma antir making,” ati.

²⁵Tenchu nupang ha a honga ahonga moka, “Puma na san ro a hong ti.”

²⁶Aman a masanga, “Nai ngai ranga sak ui ngai koma apei sa mak,” ati pe.

²⁷Hava han aman ei ti, “Ani, Puma asik chu ui ngaiin um a puma kheng ata adi anoi asuan ha asak,”

²⁸Hava han Isuan, “O nupang achan nei iam alian nei zot anga na tak chunga ni rase,” ati.Hatuka hava lai tak ata a nainupang adam.

²⁹Hanuk havan ata ase na Galili tindil kola a honga suak hatuka muala a kala hava muna ansut.

³⁰Hatuka a tampa mi a honga amanin abil u na akhor, acho, chongkului, aset hanuk atei atam mi atuanga a ke kunga ava buk u na aman alei mandam.

³¹Hantin han chongkului achonga, akhor kal achoi, acho ngai a mutheia, hava amu u na mi ngai achang ei mandong hatuka Israel a Pathian a manpak u na.

³²Hanke Isuan a zolai ngai apaia ei ti, “Hi mi ngai hi achan lungkham ka mu u asik chu hi ngai hi avian ninthum pei ka bila aleng u zei akom u na sak ite om mak hanuk angoia anse u rang zot making lampuia anvuai tham u rang keng.”

³³Zolai ngaiin a kom, “Mi buina na hontinmo hidor vaipol man ma ni min ei khopna rang dor pei,” ati u.

³⁴Isuan hangai ha, “Na kom u na itukmo vaipol a om, ?” ati na. Amanin “Sari, ngate alak te,” ati u na.

³⁵Hanke aman mi ha, phila mansut u ro, ati na.

³⁶Hava suale aman ha vaipol sari le ngate ituk lek mo a laka apham chunga akhiaka hatuka a zolai ngai apeka zolai ngaiin mi ngai apek u.

³⁷Hava ha alom u na asaka akhop u hanuk anek anoi anniang hava han kok sari arut u.

³⁸Asak ngai ha nupang le naipang anchel luia pasal asang manli ani.

³⁹Hava suale mi ngai a mathana rakuanga a chuanga Magdala rikunga ava suak u.