Read Ranglong MATHAIIN 18 Bible Online

MATHAIIN 18 - Ranglong bible

MATHAIIN 18

¹Hataka han zolai ngai Isua kom ahonga aril u, “Hanle vanrama tumo alian?” ati u.

²Aman naipangte khat a kom a paia hangai bila a manding,

³“Ataka kei na ti ni u zei nan thul u noka naipang anga na ni u nokten vanrama lut thak thei u no ta ni.

⁴Hasik han aninga hi naipangte anga annuai ha ama ha vanrama alian.

⁵Hatuka hiva anga naipang khat ka raminga apom tak chu koi ana pom ke.” ati na.

⁶“Tenchu ana iam tete ngai a malung ansiata angkhat ngal anba tak chu a ringa arikpa athunga tipuia anthuka anning a rang asa pe ual.

⁷Achulna ei hong suak sika ramual chung aping asik chu achulna ei la suak nget rang.Tenchu achung aping ha mi achulna ansuak ha.

⁸“Hatuka na kut mo na ken mo ana manba ten hava ha tan tan la pei ro kuta anni mo ke anni le mo taituan moia achul nek ten akhora ngala mo damna na lut na rang asa.

⁹Hatuka na mitin ana manba ten hava ha kela pei ro mit anni a Moisumpuia achul nek ten mit khata damna na lut rang asa ual.

¹⁰“Enro, hi asinte ngai bila angkhat ngal dem no ro asik chu kei na ti ni u zei amani vanpalai ngai vana ka Pa matona a om chian u ke.

¹¹Miring Sapa anpei ngai andam ranga ahong ke.

¹²“Imo na mandon u, mi khatin bera raza khat adona hava bila angkhat anpeia somakua akua maka muala sena ha bera anpei ha arok mak mo?

¹³Hatuka aman ving ten ataka kei na ti ni u zei ha somakua akua anpei lui hava ngai neka hava sika aman aliaka arai a mansan.

¹⁴Hava anga han asin ngai bila angkhat ngal ei siat rang vana na Pa un zot mak.

¹⁵“Hatuka na parualin na kom a masialten se ro nang le ama le na om u tik hatik han ha a masial manthei ro na chong a rangai ten na parual nei man ani zei.

¹⁶Tenchu a rangai nok ten hanuk angkhat anni mi tuang tan se ro.Hanke anni anthum ariat mura chong dora ei chatna rang.

¹⁷“Hatuka hangai chong atel nok ten kuibing ril ro hatuka kuibing chong atel nok ten na makunga Jentail mi le lei ansuang ngai le anrual rase.

¹⁸“Ataka kei na ril ani u zei nangnin phil chunga nei khar u tak ha vana ankhar inti hatuka phil chunga nei malong u tak ha vana anlong inti.

¹⁹“Ataka kei na ti ret ani u zei phila nangni annin nei zong u tak pei ha hava ruia malung khata na ni u ten, ka Pa vana mi kom ata hangai ranga hava ha antho inti.

²⁰Asik chu anni anthum ka raminga munkhata ei om u na taka amani bila ka om.”

²¹Hava han Pitor akom a honga, “Puma ka parualin voi itukmo ei masial ha kei madual rang. Voi sari tenpei mo?” ati.

²²Isuan akom, “Voi sari na ti making tenchu voi somsari mun sari tenpei,” ati.

²³Hasik han vanram hi reng khat le na mankhi thei, a suak ngai kom hisap alak rang ei zot.

²⁴Aman hisap aphut le mi khat akom a hong tuanga ama ha talen a sang som ei antang.

²⁵Tenchu ei thuan thei nok sika a puma pan a nungak a sanai a zuar zita athuan ranga chong ei pek.

²⁶Hava han ha suak ha a ke kunga anboka a moka, “O puma, na maruang tot ro na thuan zit ka ti,” ati.

²⁷Hava han ha suak a puma han lungkham a muna ama ha a mazoka ei antang a madual.

²⁸“Tenchu ha suak ha tualpanga asena ama asuak chang pui angkhat anmu puia, ama ha siki razakhat ei mantang hava ha a sura a to-ok a dena. ‘Nei antang dora na thuan zit ro!’ ati pe.

²⁹Hava ha ama asuak chang pui han ama ke kunga anboka anthem chunga, ‘Na maruang tot ro nei na mantang na thuan zit ka ti!’ ati.

³⁰Hanum nuam pe maka ama ha lungina ava khum ei antang athuan sua nok maseng pei.

³¹Hava rui ha asuak chang pui u ngaiin amu u na achan a malung ei manna u hatuka a puma u kom ase u na hava ngai ei va ril zit u.

³²Hanke a puma pan ama ha ava manpaia ei ti, ‘Suak salui nangin ka kom nei na lop sika nei antang ngai dora kei na madual.

³³Hontinmo na chunga lungkham kei na mu hantin anga han na suak chang pui lungkham amu hi nang mak che mo?’ ati.

³⁴Hatuka a pumapa atak asina mi zem ngai kom a peka ei antang athuan sua nok maseng pei.

³⁵“Vana ka Pa nin um nangni ranga hantin han tho inti na unai ngai na malung taka na parual na madual u nok ten,” Isuan ati na.