Read Ranglong MATHAIIN 19 Bible Online

MATHAIIN 19 - Ranglong bible

MATHAIIN 19

¹Hiva chong ngai dora azui suale Isuan Galili ata ase Jordon rala Judai rama ava tung.

²Hatuka mi tampan anuk azina hatuka aman hava han mi a mandam.

³Hatuka Pharisi ngai akom a honga ansin nana ama ha ei rakel u “Asik khat peia a nungak amak thei mo?”

⁴Aman a masanga, “Nangnin pore u mak che mo? Asin pun aphuta pasal le nupang ei sin.

⁵Hatuka ei ti, ‘Hasik han min a pa le a nu maka a nungaka anpe inti hanke hava ha anni ha pumkhat ni inti.’

⁶Hatuka hangai ha anni ni lai mak tenchu pumkhat hasik han Pathianin ei malop chu min sen no rase.” atia.

⁷Amanin ama ha ei ti u, “Hanle Mosin ichangmo anmakna lekha peka ansenna riti ei pek.”

⁸Aman hangai ha, “Na malung ei anchang u sika Mosin nangni rang na nungak u ngai ha amakna ei na pek u. Ten aphut ata hantin nimak.

⁹Hatuka kei na ti ni u zei, uire sialna noka a nungak amaka atei alak chu ama ha ui are hatuka ha anmak ha alak tak ha amam ui are.”

¹⁰Zolai ngaiin ama ha ati, “Nungak sika hantin han aniten nungak la lui asa,” ati u.

¹¹Aman hangai rang, “Mi doran pom mak. Tenchu theina anpek ngai rong keng athei,

¹²Asik chu a nu von sung ata hantin han thaidor a om ei anzirpui, hanuk thaidor a om min ei tho hanuk thaidor a om vanram sika aninga thaidor ei chang. Apom thei takin pom rase,” ati pe.

¹³Hava han naipang hozetmo ama kom a hong antuanga aman hangai chunga kut ei dapa bor ei zong pe ranga hava han zolai ngaiin hangai ha a ngo u na.

¹⁴Tenchu Isuan ei ti, “Naipang ngai ha ka kom manhong u ro, not u no ro, asik chu vanram hi hiva ang mi ngai ta ke.”

¹⁵Hanuk aman hangai chunga kut a dapa havan ata ase.

¹⁶Hatuka enro, mikhat a honga a kom, “O minchupu, ringanlonna kei man na rang hong sin asa mo kei tho rang,” ati na.

¹⁷Aman ati pe, “Asa ruia ichangamo nei na rakel asa hi angkhat dak a om tenchu damnana na lut zot ten chongpek ngai zi ro.”

¹⁸Aman, “Hova chongpek ngai mo,” ati. Isuan hiva hi ati, “Mi that no ro, uire no ro, anru no ro, milak chong ril no ro.

¹⁹Na nu, na pa lalchi tho ro hatuka na in kol mi ha nang nei andit anga adit ro.”

²⁰Ha ruathar han ati pe, “Hava ngai dora kei mang zit sua ke atun imo kei lan sam ala om.”

²¹Isuan ama ha, “Adik rang na zot ten se tan nei don ngai dora zuar tan hatuka anriang ngai pe ro hava han vanrama nei manin na ti, hatuka hong ro ka nuk hong zi ro,” ati.

²²Tenchu hiva chong ariata ha ruathar ha a malung ana na ase asik chu achalaka anei.

²³Hanke Isuan a zolai ngai ha ei ti, “Ataka kei na ti ani u zei anei ngai ranga vanrama lut antak.

²⁴Kei na ti ret ani u zei, Pathian rama anei ngai alut nek ten simphuai kuana makingkang alut abei ual.”

²⁵Hava ariata zolai ngai achalaka achang ei mandong u na. “Hanle tumo sandam aman rang?” ati u.

²⁶Isuan hangai tiang anhoia a ena, “Miring ranga chu theirua nimak ten Pathianin atho kiar thei,” ati.

²⁷Hanke Pitorin a masanga, “Enta, koinin aloma nei maka na nuk nei zi ni zei imo man ma ni,” ati u.

²⁸Isuan hangai ha ei ti, “Ataka kei na ti ni u zei ka nuk azi doran ansinthar ret le Miring Sapa ei lianna le reng chomphanga ansut inti hatika nang nim reng chomphang somleianni han ansuta Israel chi somleianni ruiril un na ti.

²⁹Hatuka ka raming sika a in, a parual, a sarzuar, a pa, a nu, a nai, a phai amak tak chu, aman bak raza man inti hatuka ringanlonna lua inti.

³⁰Tenchu mansa ngai itukmo chu nuk lan tan ti hatuka nuka ngai itukmo man lan san ti.”