Read Ranglong MATHAIIN 20 Bible Online

MATHAIIN 20 - Ranglong bible

MATHAIIN 20

¹“Asik chu vanram hi in puma khat angle na mankhi thei ama ha zinga aphaia sin ankhop ranga asuaka.

²Aman anlo ngai le anikhuana siki khat ei lo ranga amasat puia hangai ha aphaia a tir.

³Hatuka ani kal tora asena ava mu bazara sintho luia andinga ava mu.

⁴Hatuka hangai ha ei ti pe, ‘Gerep rahuana se u ro, nei lo dik tak na pe u ka ti,’ ati hanke ase u.

⁵Hanuk ani anding tora asuaka hantin den atho.

⁶Hanuk ani anding le asuaka asena itukmo andinga om ava muna hanke hangai ha ei ril, ‘Ichangmo sun sot sintho luia nei anding u?’ ava ti.

⁷Amanin ama ha ei ti u, ‘Tuten koini hi sina na makhop mak.’ Aman hangai rang ha, ‘Gerep rahuana se u ro,’ ati pe.

⁸“Ani bui tik le ha gerep rahuan puman lom aruaipa kom ati pe, ‘Anlo ngai ha pai tan ei lo u va pe ro among khit ata phut tan aphutna ten pei pe ro.’

⁹Hava han ani andinga akop ngai ahonga siki khat aman chip u.

¹⁰Nuka aphut ata akop ngai ahong u na atam man inti ei ti u, ten amanim siki khat den aman u.

¹¹Aman u na, hangai han ha in pumapa chunga anuar u na ei ti u.

¹²‘Nuka ngai ha chu dar angkhat dak ei pong u koini chu sun khat nei pong hanuk anin ei na ra-em. Koini le nei na manrual chiang!’

¹³Aman a masanga hangai bila angkhat ha, ‘Na tak chunga ite masial nei makung. Nangin ka kom siki khata nimak mo nei hong anding? ati pe.

¹⁴Nei man rang dor la tan se ta ro. Kei zot nang na dor den, so nukhon khitam hatuk ha pe ka ti.

¹⁵Ka ta hi ka ninga kei zota mang rang ningneina don making mo? Ole lungkham anei ati na nei na elsel mo?’

¹⁶“Hantin han, nuka ngai ha mana ni inti hatuka mana ngai ha nuka ni unti.”

¹⁷Hanuk Isuan Jerusalem ase ranga ansina hava han aman ha Somleianni a zolai ha mi buina na atuang hatuka lampuia hangai ha ei ril.

¹⁸“Enro, koini hi Jerusalema na se le hatuka Miring Sapa Chaizung ngai le minchu ngai kuta anpe inti.

¹⁹Amanin ama thina rang tho unti hanuk elsel mu na rang, azemna rang le krosa pekna rang Jentail ngai kuta pe unti nuka ninthuma anthui inti.”

²⁰Hava han Zebedai a nungak a naipasal anni abila a ruaia ama kom a honga anmok chunga alak te ei zong.

²¹Aman ama ha, “Imo nei zong?” Ei ti pe. Aman ei ti, “Na rama ka naipasal anni na chang tiang angkhat na voi tiang angkhat ansut ranga chong na pe pe ro.”

²²Tenchu Isuan a masanga, “Imo nei zong u hava ha re u mak che, abuang ranga kei se na khenga buang thei un mo?” “Na thei,” ati u.

²³Aman hangai ha, “Nangnin ka khenga buang un na ti tenchu ka Pa ata mun ansin ngai rang baka chu atei tute ka chang tiang ka voi tiang mansut thei makung,” ati pe.

²⁴Hava chong ariat u na atei som ngai ha, ha parual anni chunga han atakasi u.

²⁵Tenchu Isuan hangai ha a kom a kuia, “Na riat u Jentaila ulian ngai amani mi chunga ulian anchang u hatuka alian ngai hangai chunga anliana rui aril u ati, nangni ngai chu hantin ni mak.

²⁶Tenchu nangni laia alian achang zot tak chu ama ha na haso adom unti.

²⁷Tenchu nangni bila ulian achang zot tak chu ama ha na suak u ni inti.

²⁸Asik chu Miring Sapa min a haso eia dom ranga ahong nimak tenchu hasondom ranga le mi tamtak rathula anuk zokna man ranga apek a hong keng.”

²⁹Hanuk Jeriko ata asuak u lai han mi tampan a nu nuk ei zi.

³⁰Hatuka enro, acho anni lam kola ansut ha lam tiang han Isua ei se ariat u na hangai ha ankheka, “Puma Davida Naipasal koini hi lungkham na mu ro ba,” ei ti u.

³¹Hava han mi doran, “Dai rek u ro,” ati na a ngo u. Tenchu haneka anringa ankhek u na, “Puma David Naipasal koini hi lungkham na mu ro,” ati u.

³²Hanke Isua andinga hangai ha ei pai, “Imo nei zong u, imo kei na tho pe u rang?” ati.

³³Amanin ama ha, “Puma koini mit ei anlongna rang,” ati u.

³⁴Hanke Isuan lungkham amu na amit u ei ton pe hatuka han len han ei mu u na hanke anu nuka ei se u.