Read Ranglong MATHAIIN 22 Bible Online

MATHAIIN 22 - Ranglong bible

MATHAIIN 22

¹Isuan hanuk ankhina le chong arila aman hangai ha ei ril.

²“Vanram hi, reng khat le anrual, a naipasal innei sak nek na ei mansuk.

³Ha nek sak ranga ankui ngai apai ranga a suak ngai a tira. Tenchu hangai ha hong zot u mak.

⁴Hava han aman suak atei ngai a tir reta ei ti, ‘Ankui mi ngai ha ril u ro, enro, inneina neksak ka mansuk sua zei ka serat le me amar ngai dora anthat sua zei aloma ansua vang zei inneina nek saka hong u ro,’ va ti u ro.

⁵Tenchu hangai ha a are u na hohonmo a luia, hohonmo anlo ranga ase kiar u.

⁶A om ngai han a suak ngai ha asura maimok asaka athat u.

⁷Hava han reng atakasi na hanke a sipai rual a tira ha athat ngai ha a masiat zita akhua u a manhal zit.

⁸Nuka aman a suak ngai ha ei ti, ‘Inneina sak nek chu ansuk tenchu ha ankui ngai ha arua ni u mak.

⁹Hasik han nangni reng lampui alu aluna se u tan mi nei mu u dora aloma inneina nek saka kui tan hong ruai u ro.’ ati.

¹⁰Hava han ha suak ngai reng lampuia ase u na asa asiat mi ei mu u dora aloma a rasuang u na inneina na ahong tuang u na a manbit u.

¹¹“Hanuk rengin khual ngai anmupui ranga in sunga a honga mi khat anmupuia inneina puan don mak.

¹²Aman ama ha, ‘O kamal,’ hontinamo inneina puan abuia hivan nei hong lut? atina aman masang thei mak.

¹³Hanke rengin hasondom ngai ha, ‘Ama a kut a ke khita tualpanga azing kara pei u ro, ati hava han chapa aha arial rase.’ ”

¹⁴“Adik ke, anpai atampa tenchu anthang atomte.”

¹⁵Hava han Pharisi ngai ase u na ei mansuk u, “Hontinmo ama ha a chonga anoka na masul ngai,” ati na.

¹⁶Hatuka amanin Herod abila a zolai ngai le ei va man ril u. “Minchupu, koinin na riat nang hi atak hatuka ataka Pathian lampui ruia nei manchu hanuk nangin tute achi mak che asik chu mi mai lek mak che.

¹⁷Asa na ril ta imo na ti Kaisar hi phil man apek asa mo?”

¹⁸Tenchu Isuan ei sa u nokna zia u ariata, “Phuazekam ngai ichangmo neina mansin u?

¹⁹Ha lei sum ha na manmu u ta,” Hanke a kom dinar khat ahong koi u.

²⁰Aman hangai rang ha, “Hiva ramil le raming hi tumo?” ati. Amanin, “Kaisar,” ati u.

²¹Hanke aman hangai rang ha hano, “Kaisar ata chu Kaisar pe u ro, hanuk Pathian ta chu Pathian pe u ro.”

²²Hava chong ei riat u na amanin achang ei mandong u hanke ei maka ei se u.

²³Hava nikhua Saduki ngai anthuiretna om mak ati ngai ha akom ahong u.

²⁴Hanke a rakel u na, “Minchupu, Mosin mi nai nei luia athi ten a parualin a nungak ha naia a parual rang chi manpiang rase, ati.

²⁵Hanle koini bila parual sari ulianin in aneia nai nei luia athi, nai ei nei nok sika a parual rang a nungak amak pe.

²⁶Hantin han anni, anthum, sari tenpei hantin han ei ni.

²⁷Nuk khita ha nungak ham athi.

²⁸Hanle anthuiret tik ha sari bila tu nungak mo ei ni rang, lokon ei lak u?”

²⁹Isuan hangai rang a masanga, “Na masial u zei asik chu nei riat u nok, Lekhabu chong nei riat u nok, Pathian sinthotheina ati.

³⁰Asik chu anthuiret tik min innei mak pasalin um nupangin um.Hanekten vana Pathian vanpalai ngai anga ei om u. u.

³¹Tenchu athi ngai anthuiretna ruia Pathianin ei na ril u tak ha pore u mak che mo?

³²Aman ei ti, ‘Koi hi Abaraham a Pathian, Isak a Pathian,’ Pathian hi athi ngai Pathian ni mak tenchu adam ngai Pathian ke.”

³³Hiva ei manchu chong ngai ariat u na mipui aboi adonga.

³⁴Pharisi ngaiin Saduki ngai han makhal thei u lai mak ati ei riat u le hanke amanin munkhata anlop u.

³⁵Hatuka hangai bila mi riti riat khat ansinna na ama ha ei rakel.

³⁶“Minchupu, chongpek bila hovamo alian?” ati.

³⁷Aman ati pe “ ‘Na malung dora le, na nuk dora le, na sungril dora le, na Puma na Pathian adit ro.’

³⁸Hiva hi alian le chongpek mansa.

³⁹Hanuk annina hivale anrual ‘Nang nei andit anga na inkolmi adit ro.’ ”

⁴⁰Hiva chongpek anni na hin riti dora le Deari Lekhabum ei anthoi.

⁴¹Hatuka Pharisi ngai munkhata a om u na han Isuan hangai ha a rakela.

⁴²“Krista ruia imo na mandon u ama hi tu nai mo?” atina. Amanin “David akhuk,” ati u.

⁴³Aman hangai ha ati, “Hanle David han hontinmo rathana om lai han ama ha, ‘Puma,’ ei ti thei? Asik chu David han,

⁴⁴‘Puman ka Puma ha ei ti ka changtiang ansut ro: Ananmumak ngai na ke thuaia ka siak nok maseng.’

⁴⁵Hasik han David han ama ha ‘Puma’ ati nan ten hanle hontinmo akhuk ei ni?”

⁴⁶Hava han tuten ama ha ite masang thei u lai mak hatuka hava nikhua ata chu ama rang ite chong ankel rang ngam u lai mak.