Read Ranglong MATHAIIN 23 Bible Online

MATHAIIN 23 - Ranglong bible

MATHAIIN 23

¹Hava han Isua mi ngai le a zolai ngai ha ei ti pe.

²“Minchu ngai le Pharisi ngai, Mosi sutmuna ansut u.

³Hasik han amanin ei na ti u tak hava ha zi u ro. Zot u ro, tenchu amani ei tho u anga tho u no ro. Asik chu ei ti u anga tho u mak.

⁴Amanin puak arik a malom u na mi dara abang u. Tenchu amaria le ngal khai zot u mak.

⁵Amanin mi mu na rang asin u dora atho u asik chu amanin a tabit vong a manlian u hanuk apuan mer a manlian u.

⁶Hatuka sak nekna muna sutmun ansanga ansut anchunna ina mun ahu hui athang u na.

⁷Bazar laia min eia mok rang le min ‘Rabbi’ ei ti u rang ei zot u.

⁸Tenchu nangni chu ‘Rabbi’ anti rang val u no ro asik chu Ananchu u angkhat dak ke, nangni na lom u na parual ke na ni u.

⁹Hanuk phil chunga tute ka ‘Pa’ ati rang val u no ro asik chu na ‘Pa’ u angkhat dak keng ama ha so anvana.

¹⁰Nangnin ulian achang rang val u no ro asik chu na ulian u angkhat dak ke ama ha Krista.

¹¹Tenchu nangni laia ulian tak ha na haso adom unti.

¹²Hatuka aninga ansang tak chu ama ha annuai inti hatuka aninga annuai tak chu ama ha lan sang inti.”

¹³Tenchu, “Nangni minchu ngai le Pharisi phuazekam ngai na puak arik u! Asik chu nangnin mi makunga vanram nei khar u.

¹⁴Nangnim hava han lut thei u mak che hanuk alut rang ahong ngai ha, hangai ham manlut u mak che.”

¹⁵“Nangni minchu ngai le Pharisi phuazekam ngai na puak arik u! Asik chu mi angkhat Judan chang ranga tia, tanga nei chei u, hatuka angkhat pei achang le havan nangni neka mun asiat ranga Gehen mi na nei sin u.

¹⁶“Nangni acho lam anmu ngai na puak arik u! Nangnin nei ti u, ‘Biakin le khomak ansam chu ite nimak, tenchu biakina rangkachak le ansam tak chu anok zei.’

¹⁷Amo le acho ngai ril u ta! Hovamo alian rangkachak mo, ha biakin mo, rangkachak anthiang pu ha mo?

¹⁸Hanuk nei ti u, ‘Doi thona haia le khomak ansam chu ite nimak tenchu andar ngai le khomak ansam tak chu anok zei.’

¹⁹Acho ngai ril u ta! Hovamo alian, andar ha mo, haia mo andar ei anthiang na ha?

²⁰Haia le khomak ansam tak haia duai le nimak andar le aloma ei ansam nimak mo?

²¹Hatuka biakin le khomak ansam ha, havana aleng lem ei ansam.

²²Hanuk van le khomak ansam chu Pathian a reng chomphang le havana ansut hava ngai le ei ansam.

²³“Nangni minchu ngai le Pharisi phuazekam ngai, na puak arik u! Asik chu nangnin ansa, kumhoi, lengmaser tenpeia soma angkhat nei pek u. Hatuka chongpek aliankhit anang ruiril anzik lungkham le iamna nei mak u tenchu hava ngai dora atho hatuka hava ngai dora amak nok nangnin nei nang u.

²⁴Acho lam anruai ngai! Nangin langsan nei madi u, makingkang neia vol u.

²⁵“Nangni minchu ngai le Pharisi phuazekam ngai na puak arik u! Asik chu nek sakna kheng apang na manthiang u, tenchu hava ngai asunga khamaret le huatanhamna abit.

²⁶Acho Pharisi! Mana nekna le sakna kheng manthiang ro hanke asung apang um ei anthiang rang.

²⁷“Nangni minchu ngai le Pharisi anphu ngai, na puak arik u! Asik chu nangni hi apang na en ten achan asa tenchu asunga mi thi ru le annim tin pei abit.

²⁸Hantin han nangnim apanga mi mu ranga anzik asa nei manlang u tenchu asunga anphu le asia bit.

²⁹“Nangni minchu ngai le Pharisi phuazekam ngai na puak arik u! Asik chu nangnin deari ngai than in na sin u na hanuk minzik ngai anphumna na manliang u hatuka nei ti u.

³⁰Koini hi pi pu hun han om ila chu, deari ngai thisen phuba ansem pui no ma ni.

³¹Hava han nangni na theia rui ha nei anril u deari athat ngai ha nangni hi amani sanai.

³²Nangnim na chipui u ngai ei makhip u nok ha nangin nei makhip u.

³³Marul ngai marul tur tezia ngai! Ruiril tika hontinmo Gehen moia ansinsakna ata nei zok thei u rang.

³⁴Hava sika enro, na kom u na deari thar le minchu ngai hong tir ka ti amani bila itukmo chu that un na ti Krosa pe un na ti, itukmo chu nei anchun u na ina razik unti hatuka kho khat ata kho khata rahok unti.

³⁵Phil chunga mi dik ngai thisen ei suak hava dora na chung u na achul, anzik Abel athi suak ten ata Barakia sapa Zakaria ha biakin haia malai taka nei that u athi suak tenpei.

³⁶Ataka kei na ti ni u zei hi huna mi ngai chunga hava ngai dora chul inti.

³⁷“Jerusalem, Jerusalem! Deari ngai nei that le na koma ahongan tir ngai ha lung le nei deng, arpuiin a nai ngai a mantha thuaia ei bum hava anga koi um voi itukmo na nai ngai munkhata abum rang kei zot, tenchu nangnin zot u mak che.

³⁸Enro, na in u nangni ranga akoronga a om.

³⁹Asik chu kei na ti ni u zei nangnin atun ata na mu u lai no ta ni ‘Achanasa ama hi Puma raminga a hong.’ ” Na ti u man chu.