Read Ranglong MATHAIIN 24 Bible Online

MATHAIIN 24 - Ranglong bible

MATHAIIN 24

¹Hatuka Isua Pathian biakin ata asuaka ase, hava lai tak a zolai ngai ama ha biakin chopui ngai anmu ranga a kom ahong u.

²Tenchu aman hangai ha a masanga, “Nangnin hiva ngai dora nei mu u ni mak mo? Ataka kei na ti ni u zei hiva muna lung khat chunga lung om no ni aloma philvut zuang inti.”

³Hatuka Oliv tang chunga ansuta a zolai ngai maruka ahong u na ati u, “Na ril ta hava ngai ha itikmo ei ni rang, hatuka nei hong na rang hun hek imo andangna.”

⁴Isuan hangai ha a masanga ei ti, “En u ro, min na huang u ni.

⁵Asik chu ka raming a zuara hong inti, ‘Koi hi ha Krista,’ antin ti hatuka mi tampa huang inti.

⁶Hatuka anduina chong le anduina thang re u na ti en u ro, anngui u no ro asik chu hiva ngai hi ei ni nget rang. Ten havan um la hek no ni.

⁷Asik chu nam le nam ram le ram lan dui inti. Hatuka muntina maitam le ninu hong inti.

⁸Tenchu hava ngai dora ha antak ei phut phing ke.

⁹“Hatik han min antak ranga na pe unti na that unti hatuka ka raming sika nam doran na mumak unti.

¹⁰Hanuk hava lai tak han mi tam a malung ni no ni angkhatin atei khat mansur inti angkhatin atei mumak inti.

¹¹Hatuka achan deari rathol suaka mi tampa huang inti.

¹²Hanuk minzik nok ei pung sika mi atam riai anditna dai inti.

¹³Tenchu ahek tenpeia angir tita a om tak chu ama ha zok inti.

¹⁴Hatuka nam dora koma anriat ranga a ram hi Thangahui ramual dorana lan ril inti hanke ei la hek rang.

¹⁵“Hasik han ‘Siatna annim neinun’ Daniel deari ei ril hava ha mun anthianga anding a om na mu u tik anpore takin re rase.”

¹⁶“Hatik han Juda na om ngai ha tang tiang rot rase,

¹⁷in chunga om tak ha neinun alak ranga thuaia chum no rase.

¹⁸Hatuka phai a om tak ha a puan alak rang anuk kira hong no rase.

¹⁹Hatik han anrai le naite pom ngai chung aping u ke.

²⁰Hava han borzong u ro nudin adai le pongansa nikhua arotna dan nei suak u nokna ranga.

²¹Asik chu hava tik han antak sabak inti ramual aphut ata atun tenpei ha ang ha la om mak omum lai no ni.

²²Hatuka ha nikhua ngai ha antom nok anten nukaneiin diar no ni. Tenchu anphun ngai ranga ha nikhua mantom inti.

²³“Hatik han min nangni rang ha enta, ‘Ha Krista ha hivan,’ ‘Sovan,’ ana ti u nam iam u no ro.

²⁴Asik chu Krista rothol le deari rathol ngai anthui inti. Hatuka andangna lian pangai, changdongna pangai, riat theina manmu inti athei ten anthang ngai tena huang inti.

²⁵En u ro! Man ata kei na ril u ni zei.

²⁶“Hasik han min, ‘Enta, ama so philchara,’ ati u nam suak u no ro. Enta, ama so asunga om ati u nam iam u no ro.

²⁷Asik chu khuanlek hontinmo sualam ata asuaka taklam tenpei ei anlang, hantin han Miring Sapa hong vun inti.

²⁸“Ruak ei omna taka hava han sarakuru anchun inti.

²⁹“Hatuka hatik han antak asuak suale ani zing inti, than a ra-ang pe no ni, anvan ata arasi ngai chul inti, anvana thotheina adon dora annik inti.

³⁰Hatuka, hanke Miring Sapa andangna anvana anlang inti, hatuka phil chunga panchi dora chap inti hatuka Miring Sapa ha anvana summoirota thotheina le alianna sabak le a honga mu un na ti.

³¹Hatuka ama ha bekul maring rahupui le a vanpalai ngai hong tir inti, amanin anvan rikung khat ata rikung atei tenpei kil manli ata ei athang ngai ha munkhata re inti.

³²“Theichang kung ata ankhina anchu u ro, abak annui ata abua anchera hava han na riat thei u surlai anai ati na.

³³Hantin han, hava ngai dora rui na mu u le, re un na ti ama anai reia makota ken zei.

³⁴Ataka kei na ti ni u zei hiva ngai akip zit maseng hiva huna mi ngai hek no ni.

³⁵Anvan le phil hekin ti, ten ka chong anpei pial no ni.

³⁶“Tenchu ha nikhua zoro rui tuten re mak vanpalai ngaiin um, Naipasalin um remak; Pa rong ke ariat.

³⁷Ataka Nova hun lai hontinmo ei ni ha hantin den Miring Sapa ahong tik um ni inti.

³⁸Asik chu tilian sang mana rakuanga Nova alut nikhua tenpei min asak anek ei tho, nungak ei lak ruathar ei lak.

³⁹Hatuka rethei u mak tiliana aloma atana anning zit u maseng.Hantin han Miring Sapam hong inti.

⁴⁰Hatik han mi anni phaia om inti, angkhat anlak inti, hanuk atei mak inti.

⁴¹Nupang annin vaipol suk inti, angkhat lan ti atei ha man ti.

⁴²“Hasik han menga om u ro, asik chu na Puma u itikmo ei hong rang re u mak che.

⁴³Tenchu hiva hi re u ro anru itikmo ei hong rang, hava ha in pumapan ariat ten meng chian intia, in bang khur man chui no ni.

⁴⁴Hava rang ha ansin u ro, na malunga ahun nei ti u nok na han, hava han Miring Sapa hong inti.

⁴⁵“Atun, ha iamrua suak ahian, tumo ama ha a puman a unai ranga ei phun hangai ha ahun taka sak ei pek.

⁴⁶Achanasa ha suak a pumapa a honga hantina atho ei mu tak ha.

⁴⁷Ataka kei na ti ni u zei, aman ha nai ha anei dora chunga ulian manchang inti.

⁴⁸Tenchu ha suak salui, a malulunga ka puma hongna rang ala sot ati na,

⁴⁹hatuka alom suak ngai azema, hatuka anri ngai bila asak aneka, amaruang nok lai tak han, suak puma ha hong inti.

⁵⁰Hatuka alei ngak nok nikhua le alei iam nok hun taka, ha suak puma chu hong inti.

⁵¹Hatuka ama ha bong anni manchang inti, phuazekam ngai bila achangai pe inti, hava muna chapa aha arial inti.