Read Ranglong MATHAIIN 25 Bible Online

MATHAIIN 25 - Ranglong bible

MATHAIIN 25

¹“Hava han vanram hi nungak anthiang som, makpa len tong ranga a lem achoi chip u na asuak u ang ni unti.

²Hangai bila ranga ahian ranga amo ei ni u.

³Asik chu amo ngai ha a lem achoi chip u na ati choi u mak.

⁴Tenchu ahian ngai ha chu a lem u ngai bila bela ati achoi u.

⁵Hatuka makpa ei hong sot sika, alom u na anvuang u na ei in u.

⁶“Nuka zan chima rasapui anringa enta, ‘Makpa antong pui ranga suak u ro,’ ati.

⁷Hava han ha nungak anthiang ngai dora anthuia, a lem u ngai a manliang u.

⁸Amo ngaiin ahian ngai kom ati, ‘Na sariak u ngai na pe lak u ro ba, asik chu koini na lem a thi zei,’ ati u.

⁹Tenchu ahian ngaiin a masang u na, ‘Nangni rang le koini rang anhun lai no mani hanek ten azuar ngai kom se u tan na rang va racho u ro.’

¹⁰Anchok rang ase u na hava lai tak han, makpa a hong hanke alei ansin rap ngai ha chu, ama le antonga inneinna ina alut u na suakkhar ankhar.

¹¹“Nukhona nungak anthiang atei ngai um ahonga, ‘Puma, puma, makot na malong pe ro,’ ati u.

¹²Tenchu aman a masanga, ‘Ataka kei na ti ni u zei,’ Na re u making.”

¹³“Hasik han meng u ro, asik chu nangnin, ahun le azoro re u mak che.

¹⁴“Mandon u ta! Mi khat hi khuala asena asuak ngai a kuia anei dora akut u na apeka.

¹⁵Aman mi khat ha talen ranga, atei mi khat talen anni, hatuka hanuk mi khat ha talen angkhat, ei thei ang zotora apek chipa, ama ha ram ateia ase viaka.

¹⁶Talen ranga aman ha ama ha ase lena, hava lehan ava maphunga hanuk talen ranga anlokpuia.

¹⁷Talen anni aman pu ha amam hantin den atho na, hanuk talen anni anlokpuia.

¹⁸Tenchu talen angkhat amanpu chu asena, phila khur akhuara, a pumapa sum athupa asiak.

¹⁹“Asotpa suale suak ngai puma ha a honga, akom u na hisap alak.

²⁰Hanke talen ranga amanpu a honga, hanuk talen ranga ahong choia, ‘Puma, talen ranga nei na pek ha enta, hanuk talen ranga kan lokpui,’ ati.

²¹A pumapan ama rang ha, ‘Asa suak adik le iamrua, rui atomte na iamrua nei ni atampa chunga na phun ka ti, na puma raisanna ansem pui ro.’ ati.

²²“Hanuk talen anni aman ha a honga, ‘Puma talen anni nei na pek ha enta, hanuk talen anni kan lokpui,’ ati.

²³A pumapan ati pe, ‘Asa, adik le iamrua suak, atomte na iamrua nei ni atampa chunga na phun ka ti, na pumapa raisanna ansem pui ro,’ ati.

²⁴“Hanuk talen khat amanpu han a honga, ‘Puma ka na riat nang hi ankher, nei ling nok um nei at, neia the nok nam nei rasuang.

²⁵Hasik han ka china na talen ha phaia ka va phuma kei va thup tit enta, na ta ha nei man ani zei.’

²⁶Tenchu a pumapan a masanga ei ti pe, “Mi salui suak andok, ‘Nei na riat mo kei ling nokna han kei at, keia the nokna han kei rasuang?

²⁷Sum asut ngai kuta ka sum va re tan la chu, ka hong tik le ka ta le ei lokna le kei manzit rang ke.

²⁸Hasik han, akom ata ha talen ha la u tan la, hatuka som adonpu ha va pe u ro.

²⁹Asik chu adon takin mansa inti hava han pung inti, tenchu don lui tak ha chu ei don te ngal ha havam akom ata lan pot inti.

³⁰Hatuka so suak dik lui so tualpang azing kara va pei u ro, sova muna chapa aha arial rase.’

³¹“Hatuka Miring Sapan vanpalai dora le ei lianna le a hong tik, hatik han ama aninga lianna reng chomphanga ansut inti.

³²Hatuka nam dora a makunga lan chun inti, angkhat kom ata angkhat lan khai inti, bera rual arungpun kel le bera ei sen anga.

³³Hatuka aman bera ngai ha achang tiang, kel ngai ha avoi tiang siak inti.

³⁴Hanke rengin achang tianga mi ngai ha hong u ro, ‘Ka pa borsang pek ngai, khochuichim man ata ram nangni ranga ansin sua ha lua u ro.

³⁵Asik chu kei anchama sak nei na pek u. Ka ti ei anrala anek rang nei na mannek u. Khual kei ni na nei na mantung u.

³⁶Puan sil kei buia puan neina mansil u. Natna kei tong nei na hong en u. Lungina kei ankhum neina hong en u.’

³⁷“Hava han anzik ngaiin a masang u na, ‘Puma itikhanmo nei anchama neina mu na sak nei na pek, hanuk nei anral nei mu na ti nei na mannek na.

³⁸Itikhanmo nang hi khuala nei na muna atungna nei na pek, itikhanmo puan nei buia puansil nei na pek.

³⁹Itikhanmo nei na na le lungina nei na muna na kom nai se, la ti unti.’

⁴⁰Hava han rengin hangai ha masang intia, ‘Ataka kei na ti ni u zei, ka parual ngai asinkhit ngai chunga nei tho u ha, hava han ka chunga nei tho u.’

⁴¹“Hatuka aman avoi tianga mi ngai rang um ti inti, ‘O khomak atung ngai ka kom ata ankhai u ro, diabol le a palai ngai ranga heklui moi mun ansin ha hava han se u ro.

⁴²Asik chu kei anchama sak na pe u mak che, ka ti ei anral ti nek rang na pe u mak che.

⁴³Khual kei ni na mantung u mak che, puansil kei bui puan na mansil u mak che, kei na le lungina kei ankhum ka kom honga na hong en u mak che.’

⁴⁴“Hava han masang unti, ‘Puma itikhanmo nei ancham, nei anral, khual le puan abui le nei na, lungin ankhum nei na muna na dorbo neia dom nok.’

⁴⁵Hava han aman masang inti, ‘Ataka kei na ti ni u zei annuai khit ngai angkhat chunga hiva hi na tho u nok ten ka chunga nei tho u nok.

⁴⁶Amani hi hek lui anphenengna na, tenchu adik ngai ringanlonna na lut inti.”