Read Ranglong MATHAIIN 26 Bible Online

MATHAIIN 26 - Ranglong bible

MATHAIIN 26

¹Isuan hia chong ngai ei ril suale a zolai ngai ati pe,

²“Na riat u na ninni suale Zokna Panta ahong zei, hatuka Miring Sapa Krosa antar ranga anpek rang ani zei.”

³Hava han chaizung ngai le mi ngai, ulian ngai, Kaiapha atia Chaizung Lian kholaia anchun u.

⁴Hatuka hontinmo sura Isua nei that thei rang atia ei mansuk u.

⁵“Tenchu panta lai tak chu nimak, mipui anpon rang keng,” ati u na.

⁶Isua ha aphar Simon a ina a om lai tak han.

⁷Hava han nupang khat Alabastar koka sariak marim ahui alu ahong koia, ama kom a hong, hatuka bu nek ansut le ama lu na alei.

⁸Tenchu hava amu u na zolai ngaiin, “Taksita ichangamo ei manpam,” ati u.

⁹“Hiva hi alupana zuara anriang ngai anpe rase ba.”

¹⁰Ten Isuan ariata hangai ha ei ti pe, “Nupang ha ichangmo nei mantak u? Aman ka chunga sin asa ke ei tho.

¹¹Asik chu anriang ngai chu na bil u na a om babang keng, ten koi hi na mu babang u no ta ni.

¹²Ka tak chunga hi marim hui sariak ei leia hin, ei na ravuia sin adik ei tho.

¹³Ataka kei na ti ni u zei, ramual muntina thangahui ei anrilna tina, hava han hiva sin rui hi ama riat titna anril inti.”

¹⁴Hava han somleianni ngai bila angkhat, Juda Iskariot ha, ama ha chaizung ngai bila ei va ti.

¹⁵“Imo nana pek zot u ril u ro, ama ha na kut u na na pe u ka ti?” amanin ama ha somanthum sumru apek u.

¹⁶Havalen ata chu aman ama ha ei pekna ranga alampui arok.

¹⁷Hatuka, chol anchel lui Vaipol Panta anphut nikhua, a zolai ngai Isua kom ahonga a rakel u na, “Nang na ranga hovanmo Zokna Panta sak va sin mani? Imo nei zot dan.”

¹⁸Aman ei ti, “Khuana sova mi kom se u ro, va ril u ro, Minchupun ei ti ka hun anai zei, na ina ka zolai ngai le Zokna Panta mang ka ti.”

¹⁹Hava han Isuan ei ti ang ava tho u na, Zokna Panta khalai ava mansuk u.

²⁰Hatuka ani bui le, a zolai somleianni ngai le khalai ava zara ansut u.

²¹Hatuka, anek u lai tak ei ti, “Ataka kei na ti u ni zei, na bil u na mi khatin na mansur inti.”

²²Hava han achalaka amalung ana u na, “Puma, koi mo hava ha ei ti chip u.”

²³Aman a masanga, “Ka bila sak bela a kut aphum tak hin, na mansur inti, ati.

²⁴Miring Sapa ruia anziak anga, hantin han ni inti. Tenchu apuak arik zei, ha mi ha Miring Sapa ei ansurna, ha miring anzir no sela arang asa ba!” ati.

²⁵Hanke ansur rangpu ha Juda han ei ti, “Rabbi, koi mo?” Aman ei ti pe, “Nangke ati.”

²⁶Hatuka, asak u na hava lai tak Isuan vaipol alaka, bor pek chunga akhiaka, a zolai ngai apeka, “La u ro, sa u ro, hiva hi ka taksa,” ati.

²⁷Hava suale, buangna kheng alaka, raisan chong aril chunga hangai ha apeka ei ti, “Na lom u na hivan ata buang u ro.”

²⁸Asik chu, “Hiva hi ka thisen, rui athara thisen, mi tampa ranga ha asia saina ranga azan.

²⁹Hatuka kei na ti u ni zei, atun ata gerep mara ti buang thak lai no ning, ka Pa rama nangni le athara ka buang ret nikhua man chu.”

³⁰Hava suale, la atho u na asuak u na Oliv muala ase u.

³¹Hava han Isuan hangai rang ati, “Hiva zana na lom u na, ka sika na malung ni nokna man un na ti, asik chu anziak a om, ‘Anruaipu ha zem ka ti, hava han bera rual ngai anthek rak inti.’

³²Tenchu anthui suale, na maton u na Galili na se ka ti.” ati.

³³Pitorin a masanga ei ti pe, “Nanga alom u na malungni nokna adon u nam, koi chu lungni nokna don no ning.”

³⁴Isuan ati pe, “Ataka kei na ti ani zei hi zana ar akhuang man, voi anthum riatlui nanpemin na ti.”

³⁵Pitorin atipe, “Na bila athi ka ngam riatlui nanpem thak no ning, hantin den zolai ngai doran,” ati u.

³⁶Hanke, Isua hangai bila Getsimani tia munkhata ase u, hatuka a zolai ngai ati pe, “Sovan bor ka va zong kar pei chu hiva hin ansut chian u ro.”

³⁷Hanke, aman Pitor le Jebedi a naipasal anni ngai atuanga ase, hatuka antak sabak le lunghang atong sabak.

³⁸Hanke, aman hangai ha ei ti pe, “Ka nuk thi rang tenpei antaka ana zei, hivan om u tan ka bila meng u ro.”

³⁹Hava suale, maton avan son beta anboka, bor a zonga ei ti, “Ka Pa, ani thei ten, hi buangna kheng ka kom ata na khai pe ro ba, ten kei zota nimak, nei zota ni rase,”

⁴⁰Hatuka, a zolai ngai kom ahong reta ei lei in u a mu, hatuka aman Pitor arang ei ti, “Imo dar khat dak ngal, ka bila meng theina ranak nei u mak che mo? ati.

⁴¹Menga borzong u ro, themna nei tong u nok na rang, ratha azot tenchu taksa aduai.”

⁴²Athara voi annina ase na, hintin hin borazonga, “O ka Pa, koiin buang luia ankhai thei nok ten nang nei zot anga ni rase.”

⁴³Hava suale, ahong reta ahong mu aleia in ret u, asik chu amit akhu pe u.

⁴⁴Hatuka, aman athara hangai ha amaka, voi anthumna mana ei ti ang han atia bor azong.

⁴⁵Hanke, a zolai ngai kom a honga ei hong ti, “Atun chu in u tan pongansa u ta ro, enro, ahun asuak zei, Miring Sapa asiat ngai kuta anpekna.

⁴⁶Anthui u ro, se u rei soso enta, koi anan sur rangpu ka kom a hong zei,” ati.

⁴⁷Aman chong aril lai tak enro, Juda ha somleianni ngai bila angkhat a honga, abila mi tampan khendai, raimol, anleka chaizung ngai le ulian ngai kom ata ahong.

⁴⁸Ama ansurpu han hangai rang ha ei ti, “A biang kei tum tak ha ama ha sur u ro.”

⁴⁹Havan len Isua kom ase na, “Rabbi, anchupu,” tina apham chunga abiang a tum.

⁵⁰Isuan, “Ka mal, nei tho rang tak ha tho ta ro,” ati pe. Hanke, hangai akom a honga Isua chunga kut athak u na asur u.

⁵¹Hatuka enro, Isua bila mi angkhat a kut asona khendai a rasuana, chaizung a suak ha athaka a kuar khat a at pe.

⁵²Hava han Isuan ama ha ei ti, “Na khendai a muna siak ret ro, asik chu khendai asur ngai chu khendai le den siat inti.

⁵³Hatuka mandon ro, ka Pa kom ka zong ten, aman ka rang vanpalai a sang aruk mun somleianni neka atam hong tir no ni mo.

⁵⁴Tenchu, hava ha atho ten hontinmo Pathian Lekhabu chong tung ni, hava ha ei ni rang anang.”

⁵⁵Hava han, Isuan mi ngai ha ei ti pe, “Mi suam ngai ansur anga khendai, raimol le mo nei na hong sur u? Anikhuana biakina ansuta kei manchu, hava han na sur u mak che na.

⁵⁶Tenchu hiva ngai ei ni, hi dearin ei maziak chong ngai ei kipna rang keng.” Hava han zolai ngai doran ama amaka arot kiar u.

⁵⁷Hatuka Isua asur ngai han ama ha, Chaizung Lian Kaiapha kom atuang u hava muna han lekhanziak ngai le ulian ngai ei anchun u.

⁵⁸Hatuka Pitor alapana ama anu nuka chaizung a kholai tenpei azi.Hatuka nuka imo chang hava a en rang asunga sena, atho ngai bila ansut.

⁵⁹Hava han chaizung ngai le anchun ngaiin Isua thatna rang milak chong aril thei rua arok u na.

⁶⁰Tenchu milaka aril thei atam a hongam man u mak.

⁶¹Nukhona anni a honga ei hong ti, “Hiva mi hin ei ti, ‘Koi Pathian Biakin siama athara ninthuma ka manding ret thei,’ ” ati.

⁶²Hanke Chaizung Lian anthui andinga ama ha ei ti, “Ite masang non mo? Nang na chunga imo ei ril u so?”

⁶³Tenchu Isua adai rek. Chaizungin ei ti pe, “Nang hi Pathian adam raminga khomak keina sam ani zei na ril ta, nang hi Krista Pathian Sapa hamo na ni?” ati.

⁶⁴Isuan a masanga, “Nangin nei ti, hatuka kei na ti sa ani u zei, atun ata nangnin Miring Sapa hi a thotheikiar chang tiang ansuta, hatuka summoirota a honga mu un na ti,” ati pe.

⁶⁵Hanke Chaizungin a puan aseta, “Ama hi Pathian a dem ati ariatpui imo ei nangna enta, atun len Pathian ei dem nei riat u.

⁶⁶Imo na mandon u,” Amanin a masang u na, “Ama hi athi rua ani,” ati u.

⁶⁷Hanke amanin, amai ei machil u na ei suk u.

⁶⁸Hatuka hohonmo chu ei zema ei ti u, “O Krista koini kom Pathian chong aril, ril ro tumo ana zem?”

⁶⁹Havalai tak Pitor tuala ansuta, hatuka suak nupang khat a kom ahonga, “Nang um Galili na Isua bila na om.”

⁷⁰Tenchu aman mi dora makunga riatlui anpema ei ti, “Imo nei ti ha re thei lai making.”

⁷¹Ama suakkhar kola asena, hanuk suak nupang khat, ama han, ama ha amu na ha muna mi ngai ha ei ti, “Hiva mi hi Nazaret Isua bila a om ke,”

⁷²Aman riatlui anpem reta khomak ansama ei ti, “Sova mi so re making.”

⁷³Hatuka hun alak te suale, a kola anding ngai ha a hong u na Pitor ha ei hongti u, “Ataka, nang um hangai bila khat ke na ni, asik chu na chongin nang ana mandang.”

⁷⁴Hanke aman, khomak a sam chunga khomak ansama ei ti, “Sova mi so re making!” Hava han ar akhuanga.

⁷⁵Hava han Isuan ha chong ei ril, “Ar akhuang man voi anthum riatlui nan pem nan na ti.” Hava ha Pitor a malunga achui, hatuka apanga asena ava chap sabak.