Read Ranglong MATHAIIN 27 Bible Online

MATHAIIN 27 - Ranglong bible

MATHAIIN 27

¹Zing khuavara, chaizung ngai le ulian ngai a lom u na Isua ha athat ranga anril u.

²Hatuka akhit u na ram ulian Pilat a kom atuang u na apek u.

³Hanke ansur pu Juda han ariata ei that rang ke ani u zei atia, hanke ansira ha sumru somanthum ei lak ha chaizung le ulian ngai kom a makhira, “Masial abui thisen kei masuak hin asia ke ka ni zei,” ati.

⁴“Koini imo, nangin re na ti,” ati pe u.

⁵Hanke ha sum ngai ha Pathian biakina ava maka, mo-ol andena athi.

⁶Hatuka chaizung ngaiin ha sum ngai alaka, “Hiva boma asiak rua nimak, asik chu hiva hi thisen man keng,” ati u.

⁷Hanke achonga, anril u na ram tei mi ei anphumna rang ati na ha sum le phil abuak ngai phai arachok u.

⁸Hasik han avian tenpei ha phai ha “Thisen phai” anti.

⁹Hava ha Jeremia deari ei ril chong ei chuk, “Hatuka, amanin ha sum somanthum alaka hava man ha aman amasat u na, Israel nai ngai senkhatin aman amasat u.

¹⁰Amanin hava ngai ha alaka bel abuak ngai phai ranga apek u na. Puman chong ei na pek anga.”

¹¹Hava han Isua ha ram ulian makunga, a manding u ram ulian han a rakela, “Juda ngai reng mo na ni?” Isuan, “Nangke ati,” ati pe.

¹²Hatuka chaizung ngai le ulian ngaiin, ama chunga ei siatna tin atho u na aman masang thak mak.

¹³Hanke Pilatin ati pe na, “Ei na ti u so remak che mo itukmo ei na masiat u na ei ril u so?” ati.

¹⁴Aman chong bai khat ngal masang mak, hava han ram ulianin achalaka achang ei mandong.

¹⁵Hatuka ram ulian dan anga panta tik mipui ranga ankhum khat ei zong u tak ha ei mazok.

¹⁶Hava han ankhum pe u raming anthang khat ama ha Barabba.

¹⁷Hanke lokona a om u lehan Pilatin ei ti pe, “Imo na ti u tumo kei na mazok pe u rang Barabba mo Isua mo? Krista anti ha?”

¹⁸Asik chu mumak sika ei hong pek u keng atia ariat.

¹⁹Ama hi ruiril na sutmuna ansuta, hava laitak a nungakin ei hong manril, “Ha minzik ranga ite tho no ro asik chu avian ka ramanga ama sika achan ka duk ana.”

²⁰Hatuka chaizung ngai le ulian ngaiin mi ngai ha kuarbut ei pek u, amani ha Barabba ha ei zonga Isua ha ei that u rang.

²¹Hanke ram ulian han hangai ha ei ti pe, “Imo na ti u hiva anni a tumo kei mazok rang?” Amanin ei ti u, “Barabba ha!”

²²Pilatin ei ti hangai rang ha, “Hanle Isua Krista anti ha ama ha imo tho ning.” Amanin lokona, “Krosa anpe rase,” ati u.

²³Aman, “Ichangmo imo ei masial,” ati tenchu ama ha, “Krosa pe ro,” atia ankhek riam u na.

²⁴Pilat ataksat ha akorong ti anriat le, haneka anpon, hanke ti alaka mi ngai makunga a kut arasuk a, “Hi anzik a thisen rui a masial bui kei ni, re u ro,” ati.

²⁵Hava han mi doran a masanga, “Ama thisen koini chunga le koini nai ngai chunga chul rase,” ati u.

²⁶Hanke aman hangai rang Barabba a mazoka, hatuka Isua ha azema Krosa apek ranga abetok u.

²⁷Hava han ram ulian a sipai ngaiin reng ina a ruaia, sipai ngai dora a kom munkhata a manchun.

²⁸Hatuka amanin a puan akhek pe u na, puan sen khat a mansil u.

²⁹Hanuk raling lukhu a chia alu mankhu u. Hanuk achang kuta husop kuang khat a manlek a matona mankhuk a bila elsel athona ati u.

³⁰“Juda Reng chibai;” hatuka a machil u na ha luangsar a laka a lu atok u.

³¹Hatuka elsekara atho sua u na, puan akhek u na apeia a puan den a mansil u na, Krosa pek ranga atuang u.

³²Hatuka asuak u na Simon atia mi khat Kurini mi amu u, ama ha a Kros anput pe ranga asur u.

³³Hatuka Golgotha na “Luru Mun” anti nana, ase u.

³⁴Hava han asuak u na akha anchel uain a manbuang u na, amarim alaka buang zot mak.

³⁵Hanke Krosa a pek u na apuan ngai thum avor chunga ansem u.

³⁶Hatuka hava han ansuta angak u.

³⁷Hatuka amanin alu chunga ama rui masial na hiva hi ei maziaka ei makhop u. “Hiva Isua hi Juda ngai reng.”

³⁸Hava han suammang anni ama bila Krosa ei tar u, achang tiang angkhat, avoi tiang angkhat.

³⁹Hanke ha lampuia ase ahong ngaiin a lu ahira antira ati u.

⁴⁰“O nang nimak che mo biakin asiama ninthuma anding ret, na ninga anrung tan la Pathian Naipasal na ni ten Kros ata hong chum ro ba,” ati u.

⁴¹Hatuka hantin den chaizung ngai, minchu ngai le ulian ngaiin erona ei ti u.

⁴²“Hiva mi hi mi tatei ei mazok thei, ten aninga anzok thei mak.Israel reng ke so atun Kros ata hong chum rase hanke koinin ama nei iam rang.

⁴³Pathian chunga anngat atun azot ten zok ta rase asik chu ei ti, koi hi Pathian Sapa.”

⁴⁴Hanuk misuam anni abila Krosa antar ngaiin um hantin den han ei ero u.

⁴⁵Hatuka sun anchim len ata dar anthum tenpei, ram pumpui azing khapa ei om.

⁴⁶Hatuka dar anthuma Isua anring sabaka ankheka ei paia ei ti “Eloi, Eloi, Lama Sabakthani?” hava tina chu “Ka Pathian, Ka Pathian, ichangamo nei na mak?” ti na.

⁴⁷Hava han hohomo anding ngai han ha chong ha ariat u na ati u. “Eliza apai zei!”

⁴⁸Hatuka hangai bila angkhat atana ase sponz alaka, uaina a machia na raimola atara abuang ranga apek.

⁴⁹Tenchu atei ngaiin, “En direi Eliza ahong san mo, hong san mak mo,” ati u.

⁵⁰Hava suale ankhek sabak reta a ratha a mathan.

⁵¹Hatuka enro, Biakina puanzar, chung ata athuai tenpei antheta anni chang, ninu honga lung ngai anphel.

⁵²Hatuka than dora anlonga, mi anthiang a in ngai atampa anthui.

⁵³Hatuka ama anthuiret suale, amani ha than ata asuaka khua anthianga alut u, hanuk mi tamtak anmu pui.

⁵⁴Razaruaipu le abila Isua ngak ngai han, ninu le imo ei ni ngai ha ei mu u na achan achi u na, “Tak taka ama hi Pathian Sapa keng,” ati u.

⁵⁵Hatuka nupang atampan alapa ata a en ngai, Galili ata Isua dorbo andom tira anu nuk ei hong u.

⁵⁶Hava ngai bila Mari Magdalini, Jakob le Josi nu Mari le Zebedi a nai ngai a nu a om.

⁵⁷Hanuk ani bui le Arimathiana anei khat a honga a raming Joseph amam Isua ruaisi ei ni.

⁵⁸Ama ha Pilat a kom asena Isua ruak ava zong. Hava han Pilatin hava ha pe ro tina chong apek.

⁵⁹Hava han Josephin a ruak alaka zani anthiang vang le atuam.

⁶⁰Hatuka ama than athara ava siak hava ha lung ankhuar, hanuk than makota lung alianpa a mandela amaka ase.

⁶¹Mari Magdalini le Mari tei hava han a om, amani ha than kola ansuta a om u.

⁶²Zing khua vara panta phut hanuk nikhua Chaizung ngai le Pharisi ngai Pilat a kom anruala ei va ril u.

⁶³“Ka pu koini malunga achui ha milak ha adam lai ei ti, ‘Ninthum suale anthui ret ka ti,’ ati.

⁶⁴Hasik han ninthum tenpei athan aveng ranga chong pe ro, hano a zolai ngai ei honga ei maruk viak u na ei choia, mi ngai kom athi ata anthui atina hantin aniten masial mansa neka nukhona masial siat sabak inti.”

⁶⁵Pilatin, “Na kom u na aveng rang ngai a om, se u tan nei phari u dor va rung u ro,” ati pena.

⁶⁶Hanke ase u na a rung ngai lung anziaka than arung u.