Read Ranglong MATHAIIN 4 Bible Online

MATHAIIN 4 - Ranglong bible

MATHAIIN 4

¹Hanke Isua Diabolin ansinna ranga philchara aruai.

²Hava han ni sommanli sun zan ava ngoia nukhona ancham zei.

³Hava han ansinpu ha a koma honga a hong ti, “Pathian Naipasal na ni ten, hi lung ngai hi vaipol chang ro ti ro.”

⁴Tenchu aman a masanga anziaka om, “Min vaipol le rong dam mak ten, ‘Pathian mur ata chong asuak tak ha hava han dam inti.’ ”

⁵Hanke Diabolin khopui anthianga a tuanga Biakin chung sipa a manding,

⁶“Pathian Naipasal na ni ten antom ro, ‘Anziak a om a vanpalai ngai na sika chong pe inti akut le na madom unti na ke lung le ande no ni,’ ” ati pe.

⁷Isuan ati pe anziak a om ret, “Na Puma Pathian mansin no ro”

⁸Hanuk Diabolin achan mual ansang sabak khata a tuanga ramual ram pumpui le ei lianna ngai a manmu.

⁹Hatuka ati pe, “Anboklaka nana mok ten sova dora so na pe ka ti.”

¹⁰Hanke Isuan, “Se ro Soitan asik chu anziaka a om, ‘Na Pathian na Puma rongke nei biak rang,’ ” ati.

¹¹Hanke Diabolin amaka ase. Hatuka enta vanpalai ngai a honga a dorbo adom pe u.

¹²Hanuk Johon ha lungina ankhum ariata Galilia ase.

¹³Hatuka Nazaret a maka tipuilian kola Zebulun le Naptali biala Kapernauma asena ava om.

¹⁴Isai Dearin ei ril hiva chong ei chuk,

¹⁵“Zebulun ram le Naptali ram tipuilian lama Jordon rala Jentail ngai omna Galili ram!

¹⁶Azing kara ansut nam ha ra-ang amu u zei thina ram ralina ansut ha achung u na ra-ang asuak zei.”

¹⁷Haten pei Isuan chong ril ei va phut, “Malung makhir u ro asik chu vanram anai zei!” ei ti.

¹⁸Voikhat chu Galili tindil tang kola achei tira ei mu parual anni Simon Pitor ha a parual Andria le tindila len ei deng u asik chu nga sur ei ni u.

¹⁹Hangai rang ha, “Ka nuk hong zi u ro, mi sura na sin u ka ti,” ati pe.

²⁰Hatuka halen han a len amaka anuk ei zi u.

²¹Hatuka havan ata a matona ase na ei va mu parual anni Zebedi a naipasal Jakob le a parual Johon a pa u Zebedi abila rakuanga len ei deng u hangai ha ei kui.

²²Hatuka havan len han rakuang le apa u ei maka anuk ei zi u.

²³Hava suale Isuan Galili dora ava cheia anchunna in kipa mi a manchuna Pathian ram thang ahui rui arila hatuka mi natna tin le rikhua tin a mandam.

²⁴Hatuka ama thang mi mura Suria ram dora abit hanuk rikho tina rikhua tong ana, kachai ei o le rirangol, azeng adon ngai dora a kom a hong tuang u na amani ha alei mandam.

²⁵Hatuka Galili, Dikapoli, Jerusalem, Judai le Jordon ral ata mi tampan anu nuk ei zi u.