Read Ranglong MATHAIIN 6 Bible Online

MATHAIIN 6 - Ranglong bible

MATHAIIN 6

¹“Anreng u ro mi mu ranga a makung u na om anzik om tho u no ro. Na tho u ten na Pa vana mi kom na phamman u abui.

²“Hantin han na pek tik lehan na makunga bekul tum u no ro mi dik lui ngai min na mansang rase ati na anchunna ina, lampuia atho u ataka kei na ti ni u zei ei man u rang ha a phamman aman u zei.

³Tenchu na pek tik le na chang kutin imo ei tho hava ha na voi kut ha man re no ro.

⁴Hantin han nei pek ha maruka ni rase, hava han na pa maruka amu han a mara na pe inti.

⁵“Hatuka bor na zong u tik le hatik han phuazekam ngai anga ni u no ro, asik chu amani ha anchunna ina le lam sira andinga mi mu ranga bor azong azot u, ataka kei na ti ni u zei hangai ha a phamman aman u zei.

⁶Tenchu bor na zong tik lehan na tadan sungrila lut ro hatuka makot khar tan na Pa maruka ompu ha ama kom borzong ro hava han na Pa maruka amu han amara na pe inti.

⁷“Hatuka bor na zong le akoronga ril munpu ril no ro nam atei ngai ei tho anga asik chu nei ril atam ten na borzong na masang inti ei ti u.

⁸Hantin han hangai anga ni u no ro asik chu imo nei nang u hava ha na zong u man na pa un ariat.

⁹Hantin han hiva ang hin borzong u ro: ‘Koini na Pa anvana mi Na raming anthiang lalchi om rase.

¹⁰Na ram hong tung rase Anvana min ei tho u anga. Phila min um tho rase.

¹¹Aviana rang khop sak nek na pe ro.

¹²Koini ranga asia tho ngai nei madual anga Koini nei masial ngai um na madual ro.

¹³Siatna lama na mansin no tan asia ata na mazok ro.’

¹⁴“Asik chu mi masial na madual u ten na Pa vana min in um na madual unti.

¹⁵Tenchu mi ngai na madual u nok aniten na Pa un nang nim masial na madual u no ni.

¹⁶“Hatuka na ngoi u tik le hatik han phuazekam ngai anga mai zinga om u no ro, annguia asik chu ei ngoi u mi mu na ranga amai u ei manngui u, ataka kei na ti u ni zei hangai ha a phamman a mansua u zei.

¹⁷Tenchu nang na ngoi tik le, hatik han na lu sariak khua ro.

¹⁸Hatuka mai phia ro hanke min nei ngoi ei na mu nok rang tenchu na Pa maruka om han na mu inti hava han na Pa maruka amun amara na pe inti.

¹⁹“Phil chunga na nei u rang manting u no ro, hivan chu rik le ngerin asak hatuka hivan hin anrun khur achuia a maruk.

²⁰Tenchu vana na rang u nei manting u ro, sovason rik le ngerin sak mak sova son anrun khur chuia maruk mak.

²¹Asik chu na nei omna taka na malung um om inti.

²²“Mit hi na puma lem ang ke hanke na mit avar ten na pum dora el inti.

²³Tenchu na mit asiat ten na pum dora zing inti, hava sik han sungril ra-ang azing ten ha azing ha itukmo ei lian!

²⁴“Tuten puma anni suak chang thei mak asik chu angkhat adit inti angkhat mumak inti. Hano angkhat chunga a raisan inti angkhat ha tel no ni. Pathian le nei aninina asuak chang thei u no ta ni.

²⁵“Hasik han kei na ti ni u zei, imo ne ning imo sa ning atia na nuk ruia le imo ansil rua atia taksa ruia andon u no ro, sak neka nuk le puan neka na tak hi lian mak mo?

²⁶Chung zuang va ngai tiang anhoi u ro sin um u mak at um u mak sasiaram manting u mak, hanum na Pa u vana min hangai ha sak apek. Nangni hi hangai neka lian u mak che mo?

²⁷Hatuka nangni bila tumo andona a kum dung muk khat ngal ason thei?

²⁸“Hanuk puan sika ichangmo nei andon u? Phaia lili par kung ngai ruia mandona tuak u ro itukmo ei anson hava ngai sin um u mak kher um u mak.

²⁹Hanum kei na ril u ni zei Solomonin anina tin reng le anlianga angkhat dak ngal pha mak.

³⁰Hanle phaia chiak aviana om nangtuk moia nei tua thei hava ha Pathianin hantin han a manliang ten hanle o iamna tom ngai nangni ha, haneka na manliang nget u no ni mo?

³¹“Hantin han, hintin hin atia andon u no ro:

³²‘Imo ne ning? Imo sa ning? Imo kei rasil rang?’ Asik chu Jentail ngaiin hava ngai ha tak ei sat. Na Pa u vana min ariat hava neinun ngai nei nang u.

³³Tenchu a ram le ama ei anzikna arok mansa u ro hantin aniten hava ngai um na pe unti.

³⁴Hantin han nangtuka rang mandon u no ro asik chu nangtuka rang chu nangtukin mandon bo ni nikhata rang nikhat ahun.