Read Ranglong MATHAIIN 7 Bible Online

MATHAIIN 7 - Ranglong bible

MATHAIIN 7

¹“Mi rui ril u no ro na rui ei anril u nokna rang,

²Mi rui nei ril anga han na rui ril unti, nei maina taka anmaiin na ti.

³Na parualpa mita ranok na muna na theia na mita thing her mandon u mak che na.

⁴Hanle nangin hontinmo na parualpa ha, ‘Hong ro na mit ranok na pei pe rong nei ti,’ na ninga na mita thing her ei la om.

⁵O phuazekam! Na mita thing her pei bak ro hanke na parual mita ranok nei rasuana rang anthiang vanga nei mu rang.

⁶Neinun anthiang ui ngai pe u no ro hatuka na vok u ngai matona rochon pe u no ro a ke le eia thin u rang keng hatuka anhoi bapa na pet u ni.

⁷“Zong u ro man un na ti, arok u ro tok un na ti, atok u ro nangni rang anlong inti.

⁸Asik chu azong takin aman hatuka anrok takin atok, antok takin a rang anlong inti.

⁹Nangni bila a naipasalin vaipol a zong le lung apek a om mo?

¹⁰Hanuk nga zong le marul apek mo?

¹¹Hantin aniten na siat u na lua na nai u ngai rang a sasa neinun apek na riat u, haneka atama na Pa u vana min a kom azong ngai ha a sasa pe nget inti.

¹²“Min imo na ranga ei tho nei zot ha hava anga nang nim mi rang tho u ro. Asik chu hava ha Dan le deari chong arilphum.

¹³“Makot anchipa lut u ro asik chu siatna tianga sena makot alian alamum anzar hava han mi alut ual.

¹⁴Asik chu damna makot anchip a lampui ase nam antak, aman um atom te.

¹⁵“Deari rathol ata anreng u ro hangai ha bera anga na kom u na a hong tenchu a sunga ngelang anga anvola asak rang ang keng.

¹⁶Amara han re thei un na ti. Min raling kunga gerep mara, raisok raling kung ata theichang mo a kham ngai?

¹⁷Hantin han akung asa ten amara sa anra tenchu a kung asiat ten amara siat anra.

¹⁸Akung asana mara siat anra thei mak akung asiata mara sa anra thei mak.

¹⁹Mara sa anra lui kung chu atuka moia anpei.

²⁰Hantin han amara na mandang thei un na ti.

²¹“ ‘Puma, Puma,’ ana ti dora vanram lut inti tina nimak. Tenchu ka Pa vana mi ei zot atho ngai rong ke alut rang.

²²Hatikhan, ‘Puma, Puma’ atia na raminga de se mak me mo na raminga kachai not mak me mo, na raminga sin alian tho mak me mo na ti u na ti!

²³Hatikhan anthiang vanga na ti u ka ti, ‘Na re u lai making. O anzik lui ngai ka kom ata ankhai u ro!’

²⁴“Hantin han ka chong ngai azi tak chu ama ha ahian khat antin ti lung chunga a in asin ang ni inti.

²⁵Rua ahonga ti aliana thinthin a sema ha in ha chiam mak asik chu lung chunga ei anphun sika.

²⁶“Ka chong ngai ariata mang lui tak chu amo khat ang ni inti bali chunga in asin ang ni inti.

²⁷Nuka rua honga tiliana thinthi honga in a sema achiam zita ase ei siat mar ana sabak!”

²⁸Isuan hiva chong ngai aril suale mi ngai ha chong rila han anlai u.

²⁹Asik chu minchu ngai ang ni luia ningneina khit anei anga ei manchu sika.