Read Ranglong MATHAIIN 8 Bible Online

MATHAIIN 8 - Ranglong bible

MATHAIIN 8

¹Mual chung ata a chuma mi tampan a nuk azi.

²Enta aphar khat a honga ahonga moka, “O Puma, na zot ten nana manthiang thei,” a hong ti.

³Hanke a kut asona aton, “Ka zot anthiang ro,” ati pe. Hanke hava len han aphar ata anthiang.

⁴Hava suale Isuan ati pe, “Enro! Hiva chong tute ril no ro, tenchu chaizung kom se tan van enro, Mosi chongpek anga dali va dar ro, akom u na nei ril theina rang,” ati.

⁵Hatuka Kapernauma ei lut le, raza ruaipu khat akom a honga anthem chunga ei hong ti.

⁶“O Puma, ka suak, ina son azenga a om achan aduk ana.”

⁷Aman ei ti pe, “Koi sena ama ha va mandam ka ti.”

⁸Raza ruaipun a masanga, “Puma nang kui ka ina nei hong lut rang mo hanekten chong duaia ti ro hava han ka suak lei dam bo ni.

⁹Asik chu koi um ulian ngai thuaia mi hanuk sipai ngai hi ka thuaia hangai ha angkhat pei, ‘Se ro,’ ka ti le ei se hanuk atei, ‘Hong ro,’ ka ti le ei hong. Ka suak ham, ‘Tho ro,’ ka ti le hava ha ei tho.”

¹⁰Isuan ha chong ha ariata achang ei mandong, hatuka anu nuka hong ngai rang ha ei ti, “Kei na ti tatak ani u zei Israel laia tute hiva dora ei iam alian mu makung.

¹¹Hatuka kei na ti ni u zei, sualam taklam ata mi tampa hong inti Abraham, Isak, Jakob abila lokona vanrama ansut unti.

¹²Tenchu aram nai ngai ha apanga azing kara anpei inti hava muna, han rakam anriala chap unti.”

¹³Hava suale Isuan ha raza ruaipu ha ei ti pe, “Se ta ro, nei iam anga han hantin han na rang ni rase.” Hatuka hava lai tak han a suak ha aleia dam.

¹⁴Hatuka Isua Pitor a ina a honga a tarpi zamuna zal ana ava mu.

¹⁵Hanke a kut aton pena hatuka adam nok ha anan amathan hanke anthuia Isua haso adom.

¹⁶Hatuka ani bui le min kachai ei sur a kom ahong tuang u na hava ha chong le ha ratha ngai anota ana dora a mandam.

¹⁷Isai dearin ei ril hia chong ei kip, “Aman aninga koini nei rat nok na dora alaka nei na ngai dora apel zit.”

¹⁸Hatuka Isuan asir apanga mi tampa amuna varala se rang chong apek.

¹⁹Hava han lekha anziakpu khat a honga. “Minchupu, nei se na mun tak peia kom na nunuka se ka ti,” ati pe.

²⁰Isuan, “Sialin kua anei chunga va ngai rabu don tenchu Miring Sapa lu rena mun om mak,” ati pe.

²¹A zolai ngai bila hanuk angkhatin, “O Puma ka pa na va manphum baka ahong rang chong na pe ro ba,” ati.

²²Tenchu Isuan ati pe, “Ka nuka hong ro, athi ngaiin athetheia athi ngai rivo rase.”

²³Hatuka ama rakuanga ei chuang le.

²⁴A zolai ngai ama nuka ase u hatuka enta tindila phaivua ahong sabaka, ti ansoka rakuang amalet vivita ama chu a in zata a om.

²⁵Hanke a kom ase u na a mathui u, “O Puma na san ta ro, athi sua rang na ni zei!” ati u.

²⁶Aman ati pe, “O iam atom ngai ichangmo na chithai nei mandok u!” Hanke anthuia thinthi le tindil ha ango hanke achan aphuk ei la dai u.

²⁷Hatuka ha mi ngai achang a mandong u na, “I miring ngal mo tak? Thinthi le tindilin um a he ei tel.”

²⁸Hatuka ava rala Gadari ngai rama ase mi anni kachaiin ei sur thanmun ata asuaka a matona ahonga suak u. Achalaka arang u tute ha lampui tiang se thei mak.

²⁹Hatuka enta, ankhek u na, “O Pathian Sapa nang le koini hi imo nei anzomna? Ahun asuak man anan tak ranga hivan nei hong mo?” ati u.

³⁰Hava han akol u na ala uala vok rual atampa anvai a om.

³¹Hava han kachai ngaiin a mathema nana not rangten, “Sova vok rual bila na man se ro,” ati u.

³²“Se u ro,” ati pe, hanke asuaka ha vok rual bila ava lut u. Hatuka enro vok dora apua bali chang tiang atana tia ava chula anninga athi u.

³³Hanke ahol ngai atana arot u na khuana se na hava rui dora le kachai ngai rui ei manthun u.

³⁴Hatuka enta khuana mi dora Isua kom antongpui rang asuaka ahong u hatuka amu u na a rikung u maka ase rang a mathem u.