Read Ranglong MATHAIIN 9 Bible Online

MATHAIIN 9 - Ranglong bible

MATHAIIN 9

¹Hava suale rakuanga a chuanga ankan hatuka a khuana ahong hanuk enta mi hozetinmo a kom azeng khat ahong ruai u ama ha vaienga a zal.

²Isuan ei iam u na amuna ha azeng ha, “Kalong ngam ro! Na pap andual zei,” ati pe.

³Hatuka enro, Lekhanziakpu ituklekinmo a malulunga, “Hiva mi hi Pathian adem keng,” ati u.

⁴Hanke Isuan amani mandon ariata, “Nangnin ichangmo mandon asiat na malunga nei vong u?

⁵Asik chu hovamo abei, ‘Na pap andual zei ati mo anthuia kal choi ro ati mo’?

⁶Tenchu phil chunga Miring Sapan pap andual ningneina adon hava ha nei riatthei u na ranga azeng ha anthuia na zamun choi ro hatuka na ina se ro!” ei ti.

⁷Hanke anthuia a ina ase.

⁸Hava muna mi doran achi na hatuka Pathianin miring hi hidor peia thotheina ei pek atia a manpak u.

⁹Hatuka hava mun ata ase tira Isuan ei mu Mathai ti na mikhat lei ansuangna muna ansut aman ati pe, “Ka nuk hong zi ro.” Hava han anthuia anuk azi len.

¹⁰Hanuk ina bu nek ansuta hatuka enro atampa lei ansuang ngai le papi ngai ahong u Isua le a zolai ngai le ansut u.

¹¹Hava ha Pharisi ngaiin amuna a zolai ngai kom, “Ichangamo ananchupu un lei ansuang ngai le asiat ngai bila nek sak ei tho?” ati u.

¹²Hava ha ariata ei ti, “Adam ngai daktor nang mak hanekten ana ngai ke anang.

¹³Tenchu se u tan anchu u ro hiva chong imo omzia, ‘Lungkham ke ei zong dali nimak.’ Asik chu mi dik ngai rang ni making mi salui ngai a paia hong ka ni.”

¹⁴Hava han Johon a zolai ngai a kom ahonga, “Pharisi ngai le koini nei ngoi ba bang tenchu na zolai ngai ngoi u mak imo asik?” ati u.

¹⁵Isuan hangai ha ei ti pe, “Makpa a om kar mui ruaia mi achap mo thei? Ten ahun la hong inti abil u ata makpa lan tuang inti hatik han la ngoi unti.

¹⁶“Puan marua ha puan athar le diba tho ngai mak asik chu adibana han puan ei chet rang keng hatuka haneka ei cheta asiat riam rang keng.

¹⁷Hatuka min bel marua le gerep uain athar thal ngai mak athal ten bel ngai um siat inti tenchu min bel athara ke uain athar ei thal, hava han aninin azok.”

¹⁸Hangai rang hiva chong ngai hi aril pe, hatuka enta, panchang khat a honga, ahonga moka ei ril, “Ka nainupang atun athi zei tenchu hong tan achunga kut na hong dap pe ro hava han dam inti,” ati.

¹⁹Hava han Isua anthuia a nuk azi a zolai ngai um ase u.

²⁰Hatuka enta, kum somleianni tenpei nupang khat annim a nuk tiang a honga a puan mer a hong ton.

²¹Asik chu a malunga ei ti, “Ama apuan rong ngal ka ton thei ten dam ka ti.”

²²Hanke Isuan anhoia a en, “Longnu ngam ro, nei iamnan ana mandam zei,” ati pe. Hava len han nupang nu ha adam.

²³Hatuka Isua, ha panchang a ina a honga theilia tum le apu apar ngai ei mu le ei ti,

²⁴“Ankhai u ro nupang sanai hi thimak a in ke!” Hava han amanin ama ha maniero tho u.

²⁵Tenchu mi ngai ha a masuak ule asunga a luta nupang sanai a kut a sura hava han anthui.

²⁶Hatuka mi he, rasa, ram pum abit, asip.

²⁷Hatuka havan ata ase le acho anni ama a nu nuka ase na ankhek u na, “David a naipasal lungkham na mu ro,” ati u.

²⁸Ama ha ina alut suale ha acho ngai ha a kom ahong u na hanke Isuan hangai ha ati pe, “Na iam mo u kei tho thei ranga?” “O, Puma!” ati u.

²⁹Hanke hangai mit aton pe na, “Nei iam u na anga na chung u na ni rase!”

³⁰Hanke amit u anlong hatuka Isuan hangai ha, “Enro hiva hi tuten re ni!” atia adet mata akhar.

³¹Tenchu apanga asuak u na aram puma asin amanlang u.

³²Amani ha tual panga asuak u han enro kachai ei sur chongkului khat akom ahong ruai u.

³³Kachai ankhai le ha chongkului achong hanke mi doran changdong ei riat u na ei ti u, “Isarel laia la mu thak mak me.”

³⁴Tenchu Pharisi ngaiin, “Kachai ulian le kachai ei khai ke,” ati u.

³⁵Hatuka Isua khua le bung tina acheia anchunna ina a manchuna aram thangahui arila hanke ana tin le rikhotin a mandam.

³⁶Hanuk mitampa amuna amani chunga lungkham amuna asik chu anpona sok acha nuka aruai abui bera rual anga.

³⁷Hanke a zolai ngai ha ei ti, “Bu min atam, tenchu sin atho rang atom.

³⁸Hasik han phai pumapa kom va zong u ro, hanke a phaia sin atho rang mi ei hong mathuan rang.”