Read Ranglong MARKIN 10 Bible Online

MARKIN 10 - Ranglong bible

MARKIN 10

¹Hava mun ata anthuia ama ha Judai ram biala Jordon a varal a honga hava han ama kom a thara mi anchun reta hatuka ama abalam anga han hangai ha a manchuna.

²Hava han Pharisi ngai ha a kom a hong u na ama ha ansinna anga a rakel u na, “Nungak amak hi adik mo?” ati na.

³Aman a masanga hangai rang ha ei ti, “Mosin imo chong ei na pek u?”

⁴Amanin ei ti u, “Ansenna lekha anziaka a nungak a mak na Mosin chong ei pek.” ati u.

⁵Isuan hangai rang ha ei ti, “Na malung u ei anchang sika aman hiva riti hi ei maziak.

⁶Tenchu ansin aphut ata Pathianin, ‘Pasal le nupang ei sin ani zei.’’

⁷‘Hasik han min a nu le a pa maka a nungaka an pen ti.’

⁸‘Hatuka hava anni ha pumkhat nin ti, hangai ha anni nilai maka ten pumkhat keng ani zei.’

⁹Hasik han Pathianin ei malop tak chu min sen no rase.”

¹⁰Hatuka a zolai ngaiin ina hava rui ha a rakel ret u.

¹¹Aman ei ti pe, “Min a nungak a maka atei ava lak tak chu ama ha uiare ani zei.

¹²Hatuka a nungak han a ruathar a maka atei ava lak ten amam uiare ani zei.”

¹³Hava suale mi ngaiin naipang hozetmo ama kom a hong tuang u na aman ton rase ati na hava han a zolai ngaiin hava ngai ha a leia ngo u na.

¹⁴Tenchu Isuan hava ha amu na zot lai maka hangai rang ha ei ti, “Naipang ngai ha ka kom hong man hong u ro, hela u no ro asik chu Pathian ram chu hiva ang mi ngai ta keng.

¹⁵Ataka kei na ti u ni zei Pathian ram hi chu naipang pham anga a pham nok ten hava han lut pial thei no ni.”

¹⁶Hava suale aman hangai ha apoma a chung u na a kut adapa bor a pek.

¹⁷Hatuka a suaka lampuia ase hava lai tak han mi khat a hong atana a makunga a ke bila a rakela, “Minchupu asa, ringanlonna kei changna rang imo kei tho rang?” ati na.

¹⁸Isuan ama ha ati pe, “Koi hi ichangmo asa nei na ti angkhat dak baka chu asa atei om mak ama ha Pathian.

¹⁹Nangin chongpek ngai na riat mi that no ro, anru no ro, milak tho no ro, na nu na pa lalchi tho ro, ui re no ro,” ati na.

²⁰Ha mi han ama rang ati, “Minchupu naipangte ka ni lai ata hava ngai dora ha kei hong mang ani zei,” ati na.

²¹Isuan ama tiang a ena, “A dik zei hatuka ei ti rui khata nei machai ala om se tan la na nei ngai dora va zuar ro hatuka anriang ngai va pe ro hava han vana nei manin na ti. Hatuka hong ro ka nuk hong zi ro,” ati pe.

²²Hava chonga han anngui a a malung ana na ase asik chu achalaka nei adon.

²³Hanke Isuan a sir apang anhoia a zolai ngai ha ei ti pe, “Nei a don ngai ranga han Pathian rama lut hi itukmo ei antak pe!”

²⁴Ama chong han a zolai ngai anlai u na ten Isuan hangai ha aril reta, “Kalong ngai, neia anngam ngai Pathian rama a lut amani rang antak sabak.

²⁵Pathian rama anei ngai a lut nek ten simphuai kua na sakuarpar a lut a bei.”

²⁶Hava han hangai ha achalaka achang aman dong u na ei ti u, “Hanle tumo sandam ani thei rang?”

²⁷Isuan hangai tiang han anhoi a ei ti, “Hiva hi miring phasam tenchu Pathian phasam nimak asik chu Pathianin a tho kiar thei.”

²⁸Hava han Pitorin ama ha ei ti, “Enta, koinin aloma a maka nang na nuk nei hong zi ni zei.”

²⁹Isuan ei ti, “Nangni hi kei na ti tatak ani u zei tute om mak koi ka sika le thangahui sika a in, a parual, a sarzuar, a nu, a pa, a nai a rati, a phai a maka atun hi huna mun raza man lui rang.

³⁰Aman a in, a phai, a sarzuar, a nu, a nai, anrahokna le hiva ngai dora man inti hatuka ahong rang huna ringanlonna man inti.

³¹Ten manansa ngai mi tam tak nuk lan tan ti hatuka nuka ngai amani ha man lan san ti.”

³²Voi khat chu Jerusalem ase u na hangai neka man ansa tira hangai han tichangabuia ei riat u, hatuka a nuka ase ngai han ei achi u hava suale athara ha somleianni le ama tak chunga imo ei tong rang hava ha hangai kom ei ril.

³³Aman ei ti, “Enro, koini hi Jerusalema na se hatuka Miring Sapa chaizung le Lekhanziakpu ngai kuta anpen ti. Hatuka amanin ama thatna rang om tho unti hatuka Jentail ngai kuta pe unti.

³⁴Hatuka hangai han ama ha elsel unti, a mai machil unti, zem unti hatuka that unti hava suale nin thum suale anthui ret inti.”

³⁵Hava suale Zebedai a naipasal anni Jakob le Johon ha a kom a hong u na ati u, “Minchupu koini nei zot hi, hiva hi nang na koma nei zong tak hi nangin hava ha na tho ro,” atia.

³⁶Aman hangai rang ha ei ti, “Imo nei zot u nangni ranga imo kei tho rang?”

³⁷Amanin, “Koini hi hiva bor na pe ro nang anlianna na chang tik angkhat na changtiang hanuk angkhat na voitiang nei ansut theina rang.” ati u.

³⁸Isuan hangai rang ha, “Nangnin imo nei zong u hava ha re u mak che ka kheng buangna taka buang thei un mo? Hatuka koi baptisma kei changna taka nangnim baptisma chang thei un mo?” ati pe.

³⁹Amanin ei ti u, “Na thei,” Isuan hangai ha ei ti pe, “Ka kheng buangna taka buang thei un na ti hatuka ka baptisma lakna baptisma la thei un na ti.

⁴⁰Tenchu amun u rang ansin ngai rang rong nok chu tute ka chang tiang ka voi tiang ansut ranga koiin thei making.” ati pe.

⁴¹Hiva chong hi a riat u na atei som ngai ha Jakob le Johon a chunga a malung dik sabak u lai mak.

⁴²Tenchu Isuan hangai ha akom a paia ei ti, “Nangnin na riat u Jentail ngai bila ulian a changpu ha aman lian sabak u na hava ngai han amani chunga anlala ei om hatuka amani laia alian ngai han hangai chunga ei anlal sabaka ei om.

⁴³Nangni laia chu hantin han nimak tenchu nangni bila ulian a chang zot tak chu ama ha nangni dorbo adom inti.

⁴⁴Hatuka nangni bila ulian achang zot tak chu ama ha mi ngai suak chang inti.

⁴⁵Asik chu ataka Miring Sapam min adorbo ei adom ranga a hong nimak, tenchu mi dorbo andom ranga le mi tampa rathula a nuk zokna rang man anga a pek rang a hong keng.”

⁴⁶Hatuka Jeriko na a hong u na ama a zolai ngai le mi tampa le Jeriko ata a suak u na ase u na hava han Timai a naipasal Bartimai a tia mi angkhat acho kutado lampui kola ansuta a om.

⁴⁷Aman hiva hi Nazaret Isua tia ei riat le ankheka, “O Isua David Naipasal, koi hi lungkham na mu ro,” ati.

⁴⁸Hava han mi ngaiin, dairek ro, dairek ro, ati u na ama ha ei a ngo u.Tenchu haneka ankheka, “Koi hi lungkham na mu ro,” ati.

⁴⁹Hanke Isua andinga ei ti, “Ha nai ha pai u ro,” hanke mi ngaiin ha acho ha a pai u na, “Anngam ro, anthui ro, aman ana pai,” ati u.

⁵⁰Hanke a puan a maka antoma anthuia Isua kom ase.

⁵¹Isuan ama ha, “Nang imo nei zong, imo kei na tho pe rang?” ati pe. Acho han ei ti, “Rabbi kei mu theina rang,” ati.

⁵²Isuan, “Se ta ro, nei iamna han ana mandam zei,” ati pe. Havalen han amu thei a, hatuka lampuia ama nu nuka ei se.