Read Ranglong MARKIN 11 Bible Online

MARKIN 11 - Ranglong bible

MARKIN 11

¹Hava suale amani ha Jerusalem kola Oliv mual Bethphage le Bethani khuana a hong u le hava han ama a zolai ngai bila anni ha a tira.

²Amani ha ei ti pe, “Na maton u na sova khuana son se u ro sova son nei va lut u le sakuarpar atete anthung va mu un na ti a chunga mi ngal la chuang mak hava ha suta hong ko u ro.

³Hatuka min nangni rang ha ichangamo hantin nei tho u ati ten hintin hin ti u ro hiva hi Puman anang hava han hong man choi len unti,” ati.

⁴Hanke ase u na ei va mu u sakuarpar atete suakkhar kola apanga anthunga a om hava ha a khek u na.

⁵Hava han andinga om ngaiin hoho min mo, “Sakuarpar te ari nei sut u na imo nei tho u rang?” ati u.

⁶Hava han Isuan ei ti ang han amanin hava ngai rang ati pe u. Hatuka hangai han hava ha a manchoi u.

⁷Hatuka amanin ha sakuarpar te ha Isua kom achoi u na hava chunga a puan a dap u na aman hava chunga han a chuanga ansut.

⁸Hava han mi ngaiin a puan lampuia a dap u na hanuk atei ngaiin lam kola thingbak a tuka lama a pha u.

⁹Hatuka mi ngaiin a matona a nuka ase ngai han anringpana ankhek u na ei ti u: “Hosanna Puma raminga hong chu anpaka om rase!

¹⁰Ram honga tung rang, Koini na pa David a ram chu anpaka om rase, Chungnungkhit koma Hosanna.”

¹¹Hatuka ama ha Jerusalema a luta Biakina ase hanke asir a panga anhoia a en zita ani ei bui sika ha somleianni ngai le a suak u na Bethani a pan u.

¹²Hatuka zing khua var nikhuana hangai ha Bethani ata a suak sua u le ama a von anchama.

¹³Hanke alapa ata abua ring theipui kung khat amu a havan ata a mara man boning tia a kola ase na tenchu abua rong ava mu atei ite mu mak asik chu hava han theipui anra hun nimak.

¹⁴Aman thing rang ha ei ti, “Atun ata tuten na mara na salai no rase.” Hiva chong hi ama zolai ngaiin ei riat u.

¹⁵Hatuka hangai ha Jerusalema ase u na ama ha Biakina a luta havana azuar, anchok ei tho u, ha va ngai ha a rasua na hatuka sum a thul ngai dokang le pharvali a zuar ngai ha ei ansut u na ngai dora ha a malet pe.

¹⁶Hatuka Pathian Biakina tuten neinun ei choi phal lai mak.

¹⁷Hatuka aman hangai ha aman chuna ei ril, “Ka in hi namtin ranga borzongna in nin ti tia anziak nimak mo? Tenchu nangnin mi that ngai khurpui a nei sin u.”

¹⁸Hiva chong a riat u na chaizung le Lekhanziakpu ngaiin hontinmo ama hi na masiat ngai tia ei ravana ei en u anchim ei achi u asik chu mi doran ama chong ril achang ei mandong.

¹⁹Hatuka ani luta azing le, kho tual panga ase u.

²⁰Zing khua vara hangai ha ase tir u na kal choi chunga ei mu u ha theipui kung ha a razung le ile achar biang.

²¹Hava han Pitorin mana rui ha a mandona ei ti, “Rabbi enta, theipui kung khomak nei sam ha achar biang zei,” ei ti.

²²Isuan a masanga hangai rang ha ei ti pe, “Pathiana iamna siak u ro.

²³Atak taka kei na ti ni u zei mi hiva mual hi anthot tan tipuiliana va chul ro, hatuka iam lui a bui no rase ten iam rase ei ti tak pei chuk inti ama ranga hava ha nin ti.

²⁴Hasik han kei na ti ni u zei borzong a nei zong u ha aman ngeta an iam u ro hava han nangni rang hava ha nin ti.

²⁵Hatuka bor a zong rang nan ding u kip le mi chunga chong a om ten madual u ro.

²⁶Hanke na Pa u anvana hanin um nangni nei ma siat u ngai dora ei na madual u rang.”

²⁷Hatuka hangai ha Jerusalema ahong ret u hatuka ama ha Pathian Biakina achei anlenga hava lai tak han chaizung ngai Lekhanziakpu ngai le atar ngai a kom ahong u na ei ti pe u.

²⁸“Nang hi tu chonga mo hiva ngai hi tumo tho ro ana ti,” ati pe u.

²⁹Isuan hangai ha a ti pe, “Koi um chong khat na rakel u di rong na masang u ro hanke kei na masang u rang i le mo kei tho.

³⁰Johon a baptisma van ata mo ei ni ole miring ata mo na masang u ro?”

³¹Hava han amani le amani anril u na, “Anvan ningneina ata na ti le, ‘Hanle iam u mak chena na ti inti.’

³²‘Miring ningneina lehan ti ret thei mak me,’ asik chu mipui achi u na. Asik chu mi doran Johon ha deari tak keng atia ei riat u ani na.”

³³Hantin han amanin Isua ha ei masang u, “Re mak me,” atina. Hatuka Isuan hangai rang ha, “Koi um i le mo kei tho na ril u no ning,” ati pe.