Read Ranglong MARKIN 12 Bible Online

MARKIN 12 - Ranglong bible

MARKIN 12

¹Hava suale aman ankhina le amani kom chong ei ril, “Mi khat gerep rahuan athona rakul le aman kul tita gerep sorna rang khur a khuara hatuka in ansang a sina sin atho ngai kom a peka ram atei a ase viak.

²Hatuka sin atho ngai kom gerep rahuana mara a changai ama rang a kham rang amani kom a hun taka a suak khat aman se.

³Amanin hava nai ha a sur u na a rahoka a zema kut koronga aman se u.

⁴Hanuk aman hangai kom asuak khat aman se ret a amanin a lu alei khui pe u na maimok a sak u.

⁵Hava suale aman hanuk angkhat aman se, amanin ama ha a that u hoho mo ei zem hoho mo ei rahok ei that u.

⁶Hava han angkhat dak ala don a naipasal madit tak nukhon khita aman se, ‘Ka naipasal chu lei manlian u bo ni,’ tia.

⁷Tenchu rahuana sin atho ngai han anril u na, ‘Hile dong aluak rangpu hong u ta ro, hiva nai hi that u rei hanke koini ta ei chang rang,’ ati u.

⁸Hatuka a sur u na a that u, hatuka rahuan panga a pei u.

⁹“Ha gerep rahuan puma han imo ei hong lot rang ama hong inti na ha rahuan a tho ngai ha masiat inti, hatuka ha rahuan ha mi tei pe inti.

¹⁰Pathian lekha hi pore u mak che mo? ‘Lunga phum ngaiin ei tel u nok ha, A kila lung alian khit achang zei.

¹¹Hiva hi puma ata keng ei ni, Hiva hi koini mu na ranga chu chang dongna ke.’ ”

¹²Hava han amanin ama ha asur rang ei val u ten mi ngai ha ei achi u asik chu amanin ei riat u ama ni ei dema ankhina ei ril, hatuka a mak u na ase u.

¹³Hava suale amanin ituk lek mo Pharisi le Herod a pol ama kom aman se u na chonga ei man ok thei u na ranga.

¹⁴A hong u na aril u, “Minchupu koinin nana riat nang hi a dik tute achi mak che asik chu tute mai lek mak che ten adik pika Pathian lampui ruia nei manchu Kaisar hi phil man a pek hi adik mo?”

¹⁵Koinin nei pek rang mo nei pek nok rang mo? Aman ei khel u zia ariata ati pe, “Ichangamo nei na mansin u dinar aduli khat hong koi u ta en di rong.”

¹⁶Ahong koi u na aman ati pe, “Hiva ramil le hiva raming tumo?” atina. “Kaisar,” ati pe u.

¹⁷Isuan hangai ha ati pe, “Kaisar ata chu Kaisar pe u ro hatuka Pathian ta chu Pathian pe u ro,” Hava han amanin ama rui a a chalaka changdong ei riat u.

¹⁸Hatuka Saduki ngai anthuiret ngai mak ati ngai ama kom a hong u na a rakel u:

¹⁹“Minchupu, Mosin koini rang ei maziak a parual a thina a nungak a maka nai a nei nok ten a parualin a nungak la rase a parualpa ranga chi man piang rase ati.

²⁰Ani hanle parual sari ni u na ulian khitin in a neia nai maluia

²¹athi hatuka a thuaia han alaka nai maluia a thi ret, athuai reta ham hantin den.

²²hantin han parual sarin nai ngal ma u mak, nukhona a nungak um athi.

²³Anthuiret tik anthui unti hatikhan tu nungak mo ei ni rang sarin ei lak u ke hale?” ati u.

²⁴Isuan hangai ha ei ti, “Hava ha nei machai u nimak mo, nei riat u nok Pathian lekha chong nei riat u nok Pathian sin tho theina.

²⁵Athi ngai ata anthui le min innei ngai mak anom um ngai mak vanpalai ngai ang ke ei om.

²⁶Tenchu athi ngai ei anthui u ruia chu Mosi maziaka sul buka han Pathianin hontin mo ei ti pe, hava ha pore u mak che mo? Aman ei ti koi hi Abraham a Pathian Isaka a Pathian le Jakob a Pathian.

²⁷Ama hi athi ngai Pathian ni mak ten adam ngai keng, nangnin na machai sabak u zei.”

²⁸Hatuka Lekhanziakpu ngai bila angkhat a honga ei ankhal u ariata Isuan adik kiara ei masang ariata ama ha a rakela, “Chongpek bila hova mo aliankhit?” atia.

²⁹Isuan a masanga, “Aliankhit hiva hi, ‘O Israel rangai ro, koini na Pathian Puma hi angkhat.

³⁰Hatuka na malung dora le nei ratna dora le na mandon dora le na Pathian Puma ha nei adit rang.’

³¹Annina na hiva hi: ‘Na in kol mi na ninga nei andit anga a dit ro,’ Hiva chong anni neka chongpek alian om mak.”

³²Lekhanziakpun ama ha ei ti, “Minchupu nangin adik pika nei ril ani zei ama hi angkhat ama nok chu atei om mak.

³³Hatuka na sungril dora le na ranak dora le nei hianna dora le ama andit hatuka in kol mi aninga andit hi doi le dali dara sakemanli neka alian.”

³⁴Hava ha aman ahian vanga ei masang ariata Isuan ama ha ei ti pe, “Pathian ram le anla mak che” Hava sua ata chu ite ankel rang tuten ngam u lai mak.

³⁵Hatuka Pathian Biakina chong aril lai han Isuan amani a rakela, “Lekhanziakpu ngaiin hontinmo Krista hi David a nai ei ti thei u?

³⁶David Ratha Anthiang anria om lai hiva chong ei ril: ‘Puman ka Puma ha ei ti ka chang tiang ansut ro, Anadui ngai na kepha thuaia ka re maseng.’

³⁷Davidin um ama rang ha Puma ati hanle hontinmo a nai ei ni. Hatuka min raisan taka a chong ei rangai.”

³⁸Hatuka a chong ril anngai ngai rang han ei ti, “Lekhanziakpu ngai ata anrung u ro amani ha puan anchualpa ngai ansila achei zot u.

³⁹Hatuka bazara mi ngai aphama anchunna ina sutmun ansasanga, khalai anzara mun a huia adit u.

⁴⁰Hiva mi ngai hin arong ngai sum a saka a huangna rang asei pangai bor azong u na hiva ngai hi ruiril tika la chul sabak unti.”

⁴¹Hatuka ama ha nuampek ansuangna kok kola ansuta min koka hontinmo sum ei hong siak u a ena hava han a nei ngaiin atampa ngai sum a hong siak.

⁴²Hatuka arong anriang khat a honga sumru sin anni a hong siaka hava ha aduli khat dak ani na.

⁴³Hanke a zolai ngai ha akom a paia aril, “Chong tataka kei na ti ni u zei, ansuangna koka asiak ngai lima hiva a rong anriang hin ei siak a tam khit.

⁴⁴Ichangmo ati le atei ngaiin chu anei maniang u ata ke alak te te ei siak u, tenchu aman chu ei bui ata a om te ha ei anrungna te ei siak,” ati.