Read Ranglong MARKIN 13 Bible Online

MARKIN 13 - Ranglong bible

MARKIN 13

¹Hava suale Pathian Biakin ata apang asuak u han a zolai ngai bila angkhatin a rakela, “Minchupu enta, lung le anphum ngai hi hontina ngal mo hi,” atia.

²Isuan ama ha ati pe, “Nangin hiva lungphum alianpa ngai nei mu u hi, lungkhat chunga lung om no ni aloma philvut zuang inti.”

³Hava suale ama ha Oliv muala Pathian Biakin matona ansut le Pitor, Jakob, Johon le Andrian maruka,

⁴ama ha a rakel u, “Na ril ta hava ngai ha itikmo ei ni rang hatuka hava ngai dora ei ni narang ei hong ni na rang imo riatna,” ati na.

⁵Isuan hangai rang ha aril pe na, “En u ro, tuten min na huang u ni.

⁶Mi tamin ka raming a zuara hong inti koi hi ama hong tin ti mi tampa huang inti.

⁷Tenchu nangnin anduina rui le anduina thang na riat u le hatikhan lungzinga om u no ro, hiva ngai hi ei chuk nget rang.

⁸Tenchu hatikam la hek no ni asik chu nam le nam, ram le ram anthoka andui inti, amun muna ninu hong inti, maitam ni inti, hava ngai ha ei phutna rang duai.

⁹“Nangnin naninga anrung u ro min ruirilna muna na pe unti hatuka anchunna ina han na zem unti, hanuk ka sika ram ulian le reng ngai kom anriat ranga amani matona anding un na ti.

¹⁰Hanuk mana han namtin kara thangahui asem anang.

¹¹Tenchu min nangni hi ava pek ranga a na tuang u tik le hatik han imo nei ril u rang hava rang andon u no ro, hanek ten chong ei na man riat u tak pei ril u ro asik chu nangni nimak aril ten Ratha Anthiangin ril inti.

¹²Hatikhan a parual ha a parual, a pan a nai ha thinana pe inti. Hatuka nai ngaiin a nu nu, a pa pa u ngai a let tiang andinga man that inti.

¹³Hatuka ka raming sika min na matir unti tenchu a hek tenpei angirtit tak chu zokna man inti.

¹⁴“Hava panga, ‘Ansiatpu annim neinun,’ andingna noka andinga om, an pore takin re rase hatik han Judai rama om ngai tang ram lama rot rase.”

¹⁵Hatuka inchunga om tak chu ina neinun alak ranga athuai a chum no rase hava asunga va lut no rase.

¹⁶Hatuka phaia om tak chu a puan a lak ranga a nuk kira se no rase.

¹⁷Ha nikhua anrai le nai apom ngai ranga antak ha.

¹⁸Hatuka borzong u ro hava ha nudin ei ni nokna ranga.

¹⁹Asik chu hatik han hava ang antak hong intia hava anga antak Pathian kut sin aphut lena atun ten la om ngai mak om um lai no ni.

²⁰Hatuka Puman hava nikhua ngai aman bong nok anten nukanei rengin diar no ni. Tenchu Puman ei phun ngai hangai ranga nikhua a mantom.

²¹“Hatik han min, ‘Enro, soso Krista’ ana ti u nam hava han iam u no ro.

²²Asik chu Krista rathol le deari rathol la hong inti a hatuka changdong amu rua laman lang inti, a thei ten anthang ngai um la huang inti.

²³Tenchu anreng u ro enta a phaman kei na manthei kiar u keng.

²⁴“Hatuka hatik han antak suale ani zing inti, tha ra-ang nei no ni.

²⁵Anvan ata arasi ngai chul inti anvana sinthotheina ngai annik inti.

²⁶Hatuka hava han Miring Sapa ha sinthotheina le anlian sabaka ansum bila a hong mu unti.

²⁷Hatik han aman vanpalai ngai tira phil rikung ata anvan rikung tenpei kil manli ata a mi anphun ngai rasuanga munkhata re inti.

²⁸“Hanuk theichang kung ata anchu u ro abak annuia, anchera, abua athar a suakle hatik han nei riat u nilum anai zei ati na.

²⁹Hantin han hava ngai na mu u le re un na ti ama a nai zei makot kola a hong suak zei.

³⁰Ataka kei na ti ni u zei hiva ngai achuk zit nok maseng chu atun taka khuk ngai anpei no ni.

³¹Anvan le phil anpei inti ten ka chong anpei pial no ni.

³²“Tenchu hava nikhua le a hun ruia tuten remak vanpalai ngaiin um remak Naipasalin um remak Pa rongin a riat.

³³Anrenga meng u ro, borzong u ro asik chu hava hun itikmo ei ni rang re u mak che.

³⁴Mikhat a in amaka mi rama ava oma a suak ngai ha nina a peka asin u rang a sema hatuka makot angak ha ameng chian ranga chong a pek.

³⁵Hantin han meng u ro asik chu in pumapa itikmo ei hong rang khuluia mo, zan chima mo, ar akhuang le mo, ole zinga mo hava ha re u mak che.

³⁶Ama anlaiseka a honga nei in u ei na mu u nokna rang.

³⁷Hatuka kei na ril u tak hi na lom u na kei na ril u menga om u ro!”