Read Ranglong MARKIN 14 Bible Online

MARKIN 14 - Ranglong bible

MARKIN 14

¹Ninni suale Zokna Panta le Chol anchel lui Vaipol Panta havatik han chaizung ngai le Lekhanziakpu ngaiin hontinmo ama hi ziana a sura na that ngai atia ei val u.

²“Tenchu panta lai tak ni no rase mi lam anpon ngai,” ati u.

³Isuan Bethani khuana aphar Simon a ina bu nek rang ansut le nupang khat alabastar bela spiknard sariak marim a hui a lu sabak a hong koia hava bel ha akhuia a luna sariak alei.

⁴Hava han hohon mo a om ngai bila han a takasina ati u, “Ichangmo sariak ei manpam so?” ati u.

⁵Sova sariak azuar anten siki razan thum neka man inti a anriang ngai pe thei inti, hanke nupang chung han takasi ei manlang u.

⁶Tenchu ei ti, “Ama ha om rase, Isuan Ichangmo nei pol u? ka chunga sin asa ei thon zei.

⁷Asik chu anriang ngai na bil u na a om babang u rang keng na zot u tik na san thei u tenchu koi hi na man babang u no ta ni ei ti.

⁸Aman ei thothei tak ha ei tho ani zei ei honga ei na ravuina sariak marim hui ei na hong lei.

⁹Hatuka kei na ti ni u zei ramual muntina thangahui ei anrilna tak peia ama riattitna anga hi sin rui hi an ril inti.”

¹⁰Hatuka Juda Iskariot ha somleianni ngai bila angkhat chaizung ngai kom ase a kut u na Isua ei pek theina ranga.

¹¹Alei riat u na a rai a san u a sum a pek rang ati u hanke ei sur theina ranga tak asat u.

¹²Chol anchel lui Vaipol Panta anphutni Zokna Panta Berate ei anthat hava nikhua han a zolai ngaiin ama rang ha ei ti u, “Hovanmo nang narang Zokna Panta bu nekna va sin mani hovan nei zot,” ati u na.

¹³Hava han ama a zolai ngai bila anni a man se na. “Khua na mi khat na maton u na ti kola ti hong koia ahong ama nu nuka se u ro.

¹⁴Hatuka ei lutna taka in puma pa ha, Puman ei ti koi ka zolai ngai le Zokna Panta khalai kei zarna ranga khualin hovanmo ti u ro.

¹⁵Hava han aman in chunga athar alian anliang vang na manmu unti hava han koini rang va man suk u ro.” ati na.

¹⁶Hatuka zolai ngai anphet u na khua a pan u ei ti ang tak han ava mu u hanke Zokna Panta rang khalai ei man suk u.

¹⁷Hatuka ani bui le ha somleianni ngai le ava suak u.

¹⁸Ansut u na a nek u hava lai tak Isuan ei ti, “Ataka kei na ti ani u zei angkhatin na mansur un na ti ama hi ka bila bu nek.”

¹⁹Hava han a malung a na u hanke angkha khatin a rakel u na, “Koi mo ka ni?” ati na.

²⁰Aman hangai rang ha ati pe, “Hiva somleianni a angkhat sak bela a kut a phum hi ama.

²¹Asik chu Miring Sapa ruia anziak anga ei nin zei tenchu a rang aping hava mi Miring Sapa ei ansurna hava mi anzir no sela ama ranga asa ual.”

²²A sak u lai tak vaipol alaka bor pek chunga a khiaka hangai ha a peka, “La u ro hiva hi ka taksa,” ati.

²³Hatuka buangna kheng alaka raisan chong aril chunga hangai ha a pek hatuka lokona abuang u.

²⁴Hatuka aman hangai rang ha ati pe, “Hiva hi ka thisen rui athara thisen mi tampa ranga a suak.

²⁵Taktaka kei na ti ni u zei Pathian Rama athara ka buang ret maseng chu Gerep mara ti buang lai no ning.”

²⁶Hatuka la atho u na apanga a suaka Oliv tanga ase u.

²⁷Hanke Isuan hangai ha ati pe, “Na lom u na na malung na unti asik chu anziak a om, ‘Berarungpu suk ka tia hava han bera ngai anthek rak inti.’

²⁸Tenchu anthui suale na maton u na Galilia se ka ti,” ati.

²⁹Pitorin ati pe, “Alom u na a malung a duk u nam koi chu duk no ni.”

³⁰Isuan ati pe, “Ataka kei na ti ni zei hiva zan ar voi anni akhuang man voi anthum riatlui nan pemin na ti.”

³¹Tenchu aman arang sabaka ei ti, “Na bila athi rang aniam riatlui nan pem no ning,” Hanke atei ngaiin um ati u.

³²Hatuka Getsimani tia munkhat hava han a hong u. Hatuka a zolai ngai kom ei ti, “Bor ka zong kar pei hiva hin ansuta om u ro.”

³³Hatuka aman Pitor, Jakob le Johon a bila a tuanga a ratha ta na a malung a zing u.

³⁴Aman hangai ha ei ti, “Ka nuk athi ang dor pei ana zei, hin lei om u ro hatuka lei meng u ro.”

³⁵Hatuka maton beta ase na phila anboka hintin hin bor a zonga athei ten ha hun a kom ata ankhai rase.

³⁶Aman ei ti, “Abba, ka pa na tho kiar thei ka kom ata hiva buangna kheng na khai pe ro ba tenchu kei zot anga ni no rase nei zot anga ni rase.”

³⁷Hava sua ei hong mu a leia in u na hatuka Pitor ha ei ti pe, “Simon nei lei in mo ni zei dar khat dak ngal lei meng thei mak che mo.

³⁸Menga borzong u ro ansinnana chul u ta ni ratha a zota tenchu taksa aduai.”

³⁹Hatuka ase reta ha chong ang den ha a tia bor a zong.

⁴⁰Ahong ret le ei hong mu a leia in ret u, asik chu a mit akhu u hanke hontinmo ei masang u rang ham re u lai mak.

⁴¹Hatuka voi anthumna ei honga hangai rang ei hong ti, “Atun chu in u ta ro pongansa u ta ro a hun zei a hun a suak zei enro, Miring Sapa asiat ngai kuta anpek zei.

⁴²Anthui u ro se u rei enro, so anan sur ranga mi ha ana hong pan zei.”

⁴³Hatuka chong aril lai tak Juda ha somleianni ngai bila mi angkhat a honga ama bila mi tampa khendai raimol anleka chaizung ngai Lekhanziak ngai atar ngai a kom ata a hong u.

⁴⁴Ama ansur pun aphaman ata hangai rang ha, “Abiang kei tum tak ha a sadima sura tuang u ro,” ei ti.

⁴⁵Hanke a honga akom, “Rabbi,” atina a pham sabaka a biang ei tum.

⁴⁶Hanke amanin kut ei thak u na ei sur u.

⁴⁷Tenchu akola anding ngai bila mi khatin a khendai a laka Chaizung a suak ha ei thaka a kuar khat ei at pe.

⁴⁸Hanke Isuan hangai rang ha, “Mi suam ngai a sur rang anga mo khendai, raimol anleka ana sur rang nei hong u.

⁴⁹Anikhuana Pathian Biakina nangni bila kei oma kei na manchu u hava han na sur u mak chena ten Pathian Lekha chong anga ei chuk anang.”

⁵⁰Hava han a zolai ngai alom u na ama amak raka a rot u.

⁵¹Hatuka ruathar khat saikoronga zani arasil duapa anu nuka ase.

⁵²Hangaiin ruathar ha a sur u na tenchu ha zani a maka saikoronga den a rot viak.

⁵³Hatuka Isua ha Chaizung Lian kom a ruai u na ama bila chaizung ngai, ulian ngai, Lekhanziak ngai alom u na anchun u.

⁵⁴Hatuka Pitor ha ankarpa na anu nuk azina Chaizung ulian a tual tena ase a veng ngai le moi anua u.

⁵⁵Hanke chaizung ngai le ruiaril ngaiin Isua ha a thatna ranga ama sika riatpui rang a rok u na man u mak.

⁵⁶Asik chu ei siatna rang milaka ariat a chang ngai ha anrual u mak.

⁵⁷Hatuka itukinmo chu andinga ama siatna aril u.

⁵⁸“Koinin hiva nai hi hintin hin ei ti na riat, ‘Hiva kuta ansin Biakin hi siama pei ka ti, hatuka nin thuma kut len sin lui hanuk angkhat Biakin sin ka ti ati.’ ”

⁵⁹Hava hanum ei ril u anrual u mak.

⁶⁰Hanke Chaizung ulian amalai taka andinga Isua ha a rakela, “Ite masang non mo na sika imo ei ril u hi?”

⁶¹Tenchu a daireka ite masang mak. Chaizung ulianin arakel reta, “Nang hi ha Krista, Achanasa Sapa mo na ni,” ati.

⁶²Isuan, “Koi hi ama, nangnin Miring Sapa hi Athokiarthei achang tiang ansuta ei om van summoirot le ei hong mu un na ti,” ati.

⁶³Hanke Chaizung Lian apuna apuan aseta ei ti, “Atei imo a riat ei nang!

⁶⁴Pathian ei dem na riat u hi le imo na mandon u?” atia. Alom u na ama ei ma siat u, “Ama hi athi rua ani,” ati u.

⁶⁵Hava han hohon mo chu a machil u hatuka amai a mahip u na a suk u na, “De setan na ril ro ba,” ati u na azem tang sua u le anlo ngaiin a laka a zem sabak u.

⁶⁶Pitor tual kholai a a om lai tak Chaizung ulian a suak nu khat a honga.

⁶⁷Aman Pitor ha moi anua amu na a tiang a ena ei ti pe, “Nang, him Nazaret Isua bila na om” ati.

⁶⁸Tenchu riatlui anpema, “Nei na ti ha remakung, atho chang um remakung,” ati na. Hatuka tual panga ei va suak le ar akhuang zei.

⁶⁹Suak nu han amu na hava na anding ngai kom han, “Hiva mi hi hangai bila angkhat,” ati.

⁷⁰Aman zot ret lai mak, hanuk beta a kolan ding ngai han Pitor ha ei ti u, “Atataka nang, him so ngai bila khat na ni, asik chu nang hi Galili mi.”

⁷¹Tenchu khomak ansama ei ti, “Sova mi rui nei na ril u ama so remakung.”

⁷²Hava lai tak han ar voi anni khuangna na akhuang. Hava hanke Isuan ha chong ei ril ha, “Ar voi anni a khuang man voi anthum riatlui nan pemin na ti hava ha Pitor a malunga a chuia,” a mandona a chap chian.