Read Ranglong MARKIN 2 Bible Online

MARKIN 2 - Ranglong bible

MARKIN 2

¹Hatuka ni hozetmo suale, Kapernaum khuana aluta ina a om atina anthang.

²Hantin han, makot kola a omna rang ngal mun abui tenpeia, mi atam a hong anchun ha a kom u na chong aril.

³Hatuka azeng khat mi manlin ei razon a kom ahong ruai u.

⁴Hatuka mi ei tam sika a kom hong ruai thei u lai maka, ei omna in chung aset u na, ha vaienga azeng ei razon u na len le a masum u.

⁵Hantin han Isuan ei iam u na chu amu na azeng kom han, “Ka nai nei siatna ngai andual zei,” ati pe.

⁶Hatuka Lekhanziakpu ngai senkhat hava han ansut,

⁷“Hiva mi hin imo hintin chong ei ril hi, Pathian ei ero ke hile! Mi angkhat dak Pathian rong nok anten tumo siatna andual thei,” tia a malunga a mandon u na.

⁸Hatuka Isuan, a malung u na hantin han ei lei mandon u ariat lena a kom u na, “Hava chong ha ichangamo na malung u na nei lei mandon u?

⁹Azeng kom han, ‘Nei siatna ngai andual zei,’ ati le; ‘Na zamun la tan kal choi ro,’ ti hi hova mo ati bei ual?

¹⁰Ei zozot ni rase, ramuala Miring Sapan siatna andual theina anei tina nei riat thei na ranga azeng koma,

¹¹anthuia na zamun la tan na ina se ro,” ei ti pe.

¹²Hantin han ama chu anthuia, a zamun chu alak lena a lom u na mit muna ase na, havan tin han a lom u na achang ei mandong u, “Hintin reng hi la mu mak me,” ti na Pathian a manpak u.

¹³Hatuka asuak reta tindil kola han asena, hatuka mi tampa dora ha a kom ase u na a lei manchu.

¹⁴Hatuka kal choi chunga Levi Alphai a naipasal ha lei choina muna ansut a muna a kom, “Na hong zi ro ati na.” Hatuka anthuia azi len.

¹⁵Hatuka hintin hin ei ni Isua ha Levi ina han bu a neka, lei ansuang ngai mi salui atampa Isua le a zolai ngai a nek puia, ala tam u sa ama ha azi tir u na.

¹⁶Hatuka Pharisi ngai bila Lekhanziakpu ngai han, Isuan mi salui ngai le lei ansuang ngai bu nek pui amu u na, a zolai ngai kom han, “Ichangmo lei ansuang ngai le mi salui ngai bila ei nek ei sak pui,” ati u.

¹⁷Hatuka Isuan hava ha alei riata a kom u na han, “Adam ngaiin daktor nang mak, rivoi ase ngai keng anang. Mi dik tak ngai san ranga a hong ni makung, mi dik lui ngai anratan ranga hong ka ni,” ati.

¹⁸Hatuka Johon a zolai ngai le Pharisi ngaiin bu angoi u na, hava han Isua koma han mi ahonga, “Ichangmo Johon a zolai ngai le Pharisi ngai a ruaisin bu angoi u na, na zolai ngai le ei ngoi u nok,” ati u.

¹⁹Isuan a kom u na, “Mui aruai ngai bila a pasal rang ha a om sung pei chu mui aruai ngai bu ei ngoi thei mo? A ruathar rang ha akom u na a om sung chu ngoi thei no ni.

²⁰Tenchu a ruathar rang ha akom u ata ei la ruai nikhua la hong tung inti, hava nikhua han chu la ngoi unti.

²¹“Tenchu puan marua ha puan athar le diba tho ngai mak. Tho sela ei anchina diba tharin amarua ei maset hava mana neka achet anveng riam.

²²Hatuka tuten me vun bel maruana uain athar thal ngai mak, anthal sela uain han me vun bel ngai ha puak inti, uain le me vun bel ha set inti uain thar chu me vun bel thara ke ei anthal,” ati.

²³Hatuka Isuan pongansa nikhua han bu muna asena, hava han a zolai ngaiin ei se tir u na buvui akhiak u na.

²⁴Hatuka Pharisi ngaiin a kom, “Enta hontinmo pongansania atho nok rua anthiang lui ei tho u,” ati u na.

²⁵Hatuka aman akom u na, “David le a lom ngai avon ancham lai ansam u han, ei tho u ha pore u mak che mo?

²⁶Hantin han Abiathar chaizung lian khit ani lai, Pathian ina tuten chaizung ngai rong nok chu sa ngai mak hava vaipol andar ha ei saka, a lom ngai kom ei pek rui ha,” ati.

²⁷Hatuka ama denin a kom u han, “Pongansani hi miring ranga ansin, Miring hi pongansani ranga ansin nimak.

²⁸Hantin han Miring Sapa hi pongansani chung lamam Puma keng,” ati.