Read Ranglong MARKIN 3 Bible Online

MARKIN 3 - Ranglong bible

MARKIN 3

¹Hatuka Isua chu Sinagouge a a lut reta, hava han mi angkhat a kuta zeng a oma.

²Hatuka ama siatna ei manthei u na ranga pongansa nikhua, a mandam mo mandam mak mo a en u na.

³Hatuka aman kut zeng kom han, “Anding ro” ati.

⁴Hatuka akom u na han, “Pongansani hin asa tho mo anthiang asiat mo? Andam mo anthiang athat?” atia.

⁵Hatuka a malung anchang u ha asiat ati sabaka taksit chunga amani ei en sua na han a koma han, “Na kut son ro,” atia. Hatuka a hong sona a kut ha adam pe vanga.

⁶Hatuka Pharisi ngai ha asuak u na, ei that thei u na ranga andon chunga Herod abila mi ngai le anril len u.

⁷Hatuka Isua chu a zolai ngai le tindil tiang ase u, hatuka Galili rama mipuiin achan azi u.

⁸Hatuka a sintho ei lian chu ariat u na Judai ram ata, Jerusalem khua ata, Idumai ram ata, Jordon ral ata, Tura le Sidon kho kol ata mi atampa a kom ahong u.

⁹Hatuka mi ei tam sika rakuang lei mansuk u ro tia a zolai ngai arila, hantin nok ten min ei na ep sabak rang keng, ati.

¹⁰Mi tampa alei mandama, hantin han ana ngai doran ei ton lilip thei u na ranga antuar, annama ei pan u.

¹¹Kachai ratha adon ngaiin chu amu u kip pei a makunga anboka, “Nang Pathian Sapa na ni,” ti na ankhek u.

¹²Hatuka ama han arui ha puang u ta ni tina a kom u na ati ti tira.

¹³Hatuka tanga a kala, a mi madit ngai a kuia.A hong u na a koma,

¹⁴hanuk somleianni a thanga, “Ka bila a om ranga le anchu rang keina thang u.”

¹⁵Hanuk chu ana ngai andam rang le kachai ngai notna ningneina ei don thei u na ranga ani na.

¹⁶Hanke hiva ngai hi aman a thanga Simon ha Pitor, aphua.

¹⁷Zebedai a sapa Jakob a parual Johon ha Boanerge, aphuana hava ha “Khuanri Sapa,” tina.

¹⁸Andria, Philip, Bartholomai, Mathai, Thoma, Alphai a sapa Jakob, Thaddai Kanana mi Simon.

¹⁹Ansurpu Juda Iskariot, hiva ngai hi.

²⁰Hatuka ina ava luta mi ngai ahong anchun reta, hantin han sak nek ngal tho thei lai mak.

²¹A in sung mi ngaiin hava ha ariat u na, “Achang zei hile” tia asura a ruaina ei tho u.

²²Hatuka Lekhanziakpu ngai Jerusalem khua ata ahong ngaiin “Beelzebul alom ke hile ati u. Kachai reng ei ni sika keng kachai ei not chachak,” ati u.

²³Hatuka Lekhanziakpu ngai a kuia, ankhina chonga akom u na, “Soitanin Soitan den hontinmo ei not thei.

²⁴Ram um athetheia anduiten hava ram chu anding thei no ni.

²⁵Inko khat um andui u ten ha inkua chu ngir thei no ni.

²⁶Soitan um anininga anduia aneng ten ngir thei no nia, anpei inti.

²⁷“Tuten ranak anei ina aluta a sum va pot thei ngai mak, ranak anei ha akhit mansa nok anten, akhit sua le a in va rul inti.

²⁸“Tak taka kei na ril u ni zei, miring nai ngai hi ei siat u na ngai dora le Pathian siat rilna lam tin renga ei ril u na ha andual inti.

²⁹Ratha Anthiang kui siat aril ha chu andualna man lai no ni umor taituanam asiat anlona om inti,” ati.

³⁰“Kachai annim alom keng,” ei ti u sika han hiva hi ei ril.

³¹Hatuka a nu le a parual ngai ei hong u na tualpanga anding u na ava mankui u.

³²Ama asir apanga ansut ngaiin ama kom ei ti u, “Enta, na nu le na parual ngaiin tualpanga nang ana rok u.”

³³Aman a masanga hangai rang ha ei ti, “Tumo ka nu? Tumo ka parual?” ati.

³⁴Hatuka asir, apanga ansut ngai tiang anhoia, “En u ta, hiva ngai hi ka nu le ka parual ani u zei.

³⁵Pathian zot anga anmang ngai ke ka parual, ka sarzuar, ka nu” ati.