Read Ranglong MARKIN 4 Bible Online

MARKIN 4 - Ranglong bible

MARKIN 4

¹Hava suale tindil kola a manchu reta, hava han mipui atam sabak ahong anchuna hava tindil han rakuanga a chuanga ansuta mi dora chu tindil tang kola a om.

²Hava han ankhina le chong atampa a manchuna, ei manchuna han.

³Akom u na rangai u tan en uta; “Bu chi anthepan bu chi anthe ranga ase na.

⁴Hatuka hintin hin ei ni, a the han; asen lampui kola achula va ngaiin asak zit u.

⁵Hatuka asen lungchirit bila achul, phil ei tam nok sika anrapa among.

⁶Tenchu ani sa suaka ei ra-em sika anvuaia om, razung ei don nok sika arop zit.

⁷“Hatuka asen chiak raling nei bila achula, chiak ha ansanga achula adip diaia anra mak.

⁸Hatuka asen phil asana na achula amonga, ansona, anrana somanthum, somaruk, razana apung,” ati.

⁹Hatuka ama denin, “Riatna ranga kuar a nei takin re rase,” ati.

¹⁰Hatuka ama atheia, a om lai han somleianni le alom ngai han ankhina ngai arakel u na.

¹¹Hatuka aman akom u na, “Pathian chong maruk chu nangni nei riat u ranga anphal ei ni, apanga mi ngai ranga chu ankhina na zit keng, ati.

¹²Hantin han, ‘A ena ei mu rang, tenchu re u no ni. Hatuka rangaia ei rangai tenchu tuak u no ni, hano ei hong kir u na, andual ei nang u rang keng.’ ”

¹³Hatuka, ama denin akom u na han, “Hi ankhina hi rethei umak che mo? Hantin aniten hontinmo ankhina ngai dora nei riat u rang?

¹⁴Bu chi anthepu han chong ei thena.

¹⁵Hatuka lampuia chong anthena chu hiva hi ani, chong ariat le Soitan han a malunga chong ha alak pe len.

¹⁶Hatuka hantin den lungchirit chunga chu hiva hi ani. Chong ariat tik le anrappa apom.

¹⁷Tenchu akom u na razung nei maka anrappa sot luia chong sika antakna phenengna a om le amangil len.

¹⁸Hatuka atei chu raling bila anthe anina hava han chong ariata.

¹⁹Tenchu ramual lungkham chu neina anhuangna, ningolna, aluta chong ha adipa anra luia a om.

²⁰Hatuka phil asana anthe chu hiva ngai hi ani chong ariata apoma aliak somanthum, Somaruk, razana anra.”

²¹Hatuka ama denin akom u na, “Lem chu asiak nana siak luia, zamun thuaia siak ranga mo ava lak?

²²Puang lui ranga anip ite om mak anlong nok ranga chong maruk um om mak.

²³Riatna rang kuar a nei takin re rase,” ati.

²⁴Hatuka ama denin akom u na, “Hasik han imo nei rangai u anreng u ro nei mai u na ang han na mai unti ha neka na pe unti.

²⁵Adon tak chu sap inti, don lui chu; ei don selep um apot inti,” ati.

²⁶Hatuka ama denin, “Pathian ram chu hintin hin, min phaia han chi athe sela.

²⁷Sun zan ama a in karam ameng karam, a chithe ha amonga anson tenchu hontinmo ei hong lian remak.

²⁸Philin athetheia mara ei hong masuak, ei mong mansa hatuka ei vui hanke avuia atak ei lut.

²⁹Tenchu amin le koite ei laka ei at ahun ei ni sika, ati.

³⁰Hatuka, ama denin, “Pathian ram chu hongle mo mankhi mani? Ichong lemo manrual mani?

³¹Ancham chi ru khat phila achula chimuru tei neka asin khit ni ngal sela.

³²Athe suale chu amonga anna tin neka ahonga liana abak alianpa ngai ahonga nei, hantin han chunga va ngai abaka ariak u chachak.”

³³Hatuka, hantina ankhina chong atam ei riat thei u na ranga chong akom u na arila.

³⁴Tenchu ankhina nok ten akom u na chong ril maka a zolai ngai kom chu maruka anthiang vanga aril chachak.

³⁵Hatuka hava nikhua den han khului tiang akom u na, “Tho va rala son ankan u rei,” ati.

³⁶Hantin han mipui ngai ha amaka, ama chu ei om balam anga han rakuanga ase u na. Rakuang atei um a kom a om.

³⁷Hatuka phaivua anrik sabak ahonga, ti ansoka, rakuanga ahonga lut zuzuta, hantin han rakuang abit rang ani zei.

³⁸Isua chu kobong athona rakuang ramoi tiang a in. Hanke a mathui u na, “Minchupu, athi rang na ni zei hile, na mandon ngal mak chena?” ati u na.

³⁹Hatuka, Isuan hava ha alei riata, thinthi ha a ngona, “Tipui ham bang ro! om sadim ro,” atia, hatuka, phaivua abang raka among.

⁴⁰Hatuka amani kom han, “Ichangamo hador peia nei achi u? Iamna hi nei la nei u nok mo?” ati.

⁴¹Tenchu anchi chunga, “Hiva nai hi tungal mo ei ni hi, thinthi le tindilin um a he ei tel hi?” anti u na!