Read Ranglong MARKIN 5 Bible Online

MARKIN 5 - Ranglong bible

MARKIN 5

¹Isua le a zolai ngai chu Galili tindil varala Genesaret rama, ava tung u na.

²Hatuka rakuang ata asuak le mi khat thankhur ata ahonga suak, ama ha kachai rathan ei sur.

³Hava naipa ha thana ei om, tuten thir zingzir le ngal thung thei mak.

⁴Min thir le ri le ei thung u chachak, tenchu, ri le zingzir chu apota, aseta, tuten matian thei mak.

⁵Asun azana thana le tanga han ankhek chi chiana, lung le ei an at chachak.

⁶Hatuka alapa ata Isua amu le, a tana, ava mok.

⁷Hanke anring sabaka ankheka, “Isua, Pathian chung Khita a Sapa! koi ka chunga imo nei zong? Anan sinsak zam nokna ranga Pathian raminga kei na mathem,” ati.

⁸Isuan akom, “Nang kachai annimpa miring sung ata hi suak ro,” alei ti pena.

⁹Hatuka Isuan, “Imo na raming?” tia arakela, Hatuka aman akoma, “Ka raming chu atampa anina” ati.

¹⁰Hatuka hava bung ata ha amani hi ei not u nokna ranga Isua kom a zonga.

¹¹Hatuka havana tang panga han vok rual atampa anvai a oma.

¹²Hatuka kachai ratha annim ngaiin, “Vok von sunga na manlut ro,” atia azong u.

¹³Hatuka aman chong a peka kachai ratha annim ngai ha asuaka vok von sunga alut u na hantin han vok rual ha nimkei tiang atan u na tindila aluta ti anhaka athi zit u.

¹⁴Hatuka ahol ngai ha atan u na khua le lui tina han aril u na. Hatuka imo ei nin zei atia a en rang ahong u na.

¹⁵Hatuka Isua kom ahonga tung u na kachai ei sur mi ha puan ansil hava mana malung ei om a anga amu u na achi u.

¹⁶Hatuka ariat ngaiin chu kachai ei sur le vok chunga rui ngai dora ha aril u na.

¹⁷Hatuka hava ngai han amani chu aram u ata ei suak u na ranga a mathem u na.

¹⁸Hatuka rakuanga a chuang rang lai tak han kachai ei sur han Isua kom, “Na kom om chian rongba” atina a mathem.

¹⁹Tenchu Isuan phal mak a koma han, “Na ina se tan la na mal na rual ngai kom Puman na ranga ei tho ngai dora ei lian zia le lungkham ei na mu hi va ril ro,” ati pe viaka.

²⁰Hantin han asena Dekapoli khuana han Isuan aranga sin ei tho pe ei lian zia ha tang ava hai pe na. Hatuka mi doran achang a mandonga.

²¹Hatuka Isua ha rakuang le avaral avan kana mi tam sabak a kom ahong anchuna. Hatuka ama chu tindil kola a oma.

²²Hatuka anchunna in aruaipu angkhat a raming Zaira ha ahonga Isua ei mu le a ke kunga anboka.

²³“Ka nainupangte athi vivit zei ei hong hara ei dam theina rang hong tan a chunga na kut ahonga bang ranga ka na mathem,” tia a mathem chiana.

²⁴Hantin han Isua kom han asena hatuka mi tampan azina achan anep sabak u na.

²⁵Hatuka nupang angkhat kum somleianni annim dam maka.

²⁶Daktor atampan a en u achalaka atiar zeia ei nei doram atham zit zei satna neka anrik lam apan sa na.

²⁷Hava mi han Isua thang rui alei riata anuk tianga mipui kara han a honga apuan atona.

²⁸“A puan rong ngal tonin lang dam ka ti,” atina ei mandon keng.

²⁹Hatuka anrappana ei annim chu abang lena ei na ha adama ei anriat ani zei.

³⁰Hatuka Isua han a sung ata sinthotheina asuak tia alei riata mi ngai tiang anhoi len zeia, “Tumo ka puan aton ha,” ati.

³¹Hatuka a zolai ngaiin a kom han, “Min ei na neng u ur na muna tumo ana ton hontina nei ti mo?” ati u na.

³²Hatuka aman chu han tina atho ha amu ranga a ena.

³³Hantin han nupang han a chunga sin ei tho pe ariata anchi le annok chunga a honga a matona anboka akom chongtak aril zita.

³⁴Hatuka aman chu a kom han, “Ka nainupang nei iamna hi nei dampui ani zei, phukdai taka se tan la nei dam nok ata chu dam len ta ro,” ati pe.

³⁵Ala chonglai tak han anchunna in puma in ata mi ahong u na, “Na nainupang athi zei hong rangmo Minchupu hi nei la manpong u rang,” ati u na.

³⁶Isuan chu ei chong u ha kuar sung luia anchunna in puma kom han, “Achi no ro iam pei ro,” ati.

³⁷Hatuka Pitor, Jakob, Jakob a parual Johon ngai rong nok chu tute ama zi rang phal lai mak.

³⁸Hatuka anchunna in puma in han ava tung u na Isuan ei anpon u le ei chap ei anram u ngai ava mu na.

³⁹Hatuka ava lut han akom u na, “Ichangmo neia ziaia nei chap sabak u naipang hi athi ni mak,” ati.

⁴⁰Hatuka hangai han amani u na aman chu alom u na anot zita naipang a nu le a pa le a koma om ngai rong a ruaia naipang omna han ava luta.

⁴¹Hatuka naipang kut ha a sura a koma han, “Talitha Kumi” a omzia chu “Nupang sanaite anthui ro kei na ti ni zei” ati.

⁴²Hatuka nupang sanai ha anthuia kal achoi thei lena ama chu kum somleianni mi ei ni. Hatuka a chang ei mandonga ei anlai u.

⁴³Hatuka aman akom u na, “Hiva hi tuten re no rase ati tita hatuka sak mansa u ro,” atia chong apek.