Read Ranglong MARKIN 6 Bible Online

MARKIN 6 - Ranglong bible

MARKIN 6

¹Hatuka havan ata a suaka ei omna kholama ava tunga a zolai ngaiin chu azi tir u na.

²Hatuka pongansa nikhua ei lei ni anchunna ina, a manchuna.Hatuka mi tampa a chong ariat ngaiin, “Hiva mi hin hiva chong hi hovan ata ei riat mo hi? Hiva nai a koma hianna apek hi i hianna ngal mo hi? A kutin hidor peia changdong sin ei tho hi hontina mo? ati u.

³Hiva mi hi Mari naipasal Jakob le Joseph Juda le Simon asung suak pui thing a sinpu ha nimak mo a sarnu ngai hi koini bila om nimak mo?” ati u na achang aman dong u na amalung ni u lai mak.

⁴Hatuka Isuan akom u na, “Dearin a kho tianga mi a unai bila ani nokan ten maimok ansak ngai mak” ati.

⁵Hatuka mi tomte dam lui chunga kut dapa ei mandam baka chu changdong sin tho thei lai mak.

⁶Ei iam u nok sika achan achang a mandonga hatuka khotina acheia a manchu tira.

⁷Hatuka somleianni ngai ha a kuia anni nia atira aman sena kachai ratha annim ngai chunga ningneinam apek.

⁸Hatuka akhual se u na ranga, “Raimol kha khat baka chu vaipol um, marsam, kongvong, sum um ei choi u nok rang ati pe na.

⁹Kekok chu nei bun u rang ati kultai anni atiang u no ro,” ati sa na.

¹⁰Hatuka ama denin akom u na, “Nei va tung u na han na mak u maseng pei chu tung tit u ro.

¹¹Hatuka khuan a na pham noka, na he arangai zot u nok aniten, havan ata na suak u tik han amani nei manriat u na ranga na kepha u thuaia philvut athing u ro,” ati.

¹²Hantin han asuak u na malung ankhir chong aril u na.

¹³Kachai ratha sia atampa a not u na ana tampam sariak akhua u na a mandam u.

¹⁴Hatuka reng Heroda han alei riata a raming ha alei anthang sua ei ni, “Baptispu Johon ha mithi bil ata anthui reta hasika so sinthotheina son ama kom ei tho keng,” alei ti.

¹⁵Mi teiin, “Eliza keng,” ati u. Mi teiin, “Deari ani so, deari ngai bila angkhat ang ha,” ati u na.

¹⁶Herodan chu alei riata, “Johon alu kei tan nget ha anthui sir keng,” ati.

¹⁷Herod nget han a parual Philip a nungak han Herodi asika mi atira Johon ha ei man sura lungin ata ankhit chunga alei khuma, asik chu ama ha nungaka ei lak.

¹⁸Johon han Herod a kom, “Na parual nungak nei lak pe hi anthiang mak,” ham alei ti pe.

¹⁹Hasik han Herodin ama chu a ngona, athat azota tenchu thei mak.

²⁰Herodin Johon chu mi dik le anthiang tak ei ni ti ei riat sika ama ha achia ahual tita a chong a rangai. Ten achina, tenchu raisana a rangaia.

²¹Hatuka Herod ei anzirna nikhua phamni na han a mi lian ngai le sipai ruaipu lian ngai le Galili rama mi lian ngai ranga zana bukhalai azar lai hun asa alei mana.

²²Herodi nainupang nget ha a honga luta alama Herod le abu nekpui ngai ha arai amansan u na, hantin han reng han, nupang sanai te kom han, “Nei zot tak na zong ro na pe ka ti ati.

²³“Nei na zong tak pei chu ka ram anbak ten pei chu na pe ka ti, hatuka a kom khomak um ansama.”

²⁴Hatuka ama chu a suaka a nu kom han, “Imo kei zong rang ava ti na hatuka ama han Baptispu Johon alu hana,” alei tina.

²⁵Hatuka chu annot sabaka reng kom han ava luta, “Khenga Baptispu Johon alu neina pek len kei zot,” ti na a zonga.

²⁶Hatuka reng ha a malung anhang sabaka tenchu a khomak ansam le abu nekpui ngai sika han nial thei lai mak.

²⁷Hatuka reng han a vengpu sipai angkhat a tir lena alu ava lak rang chong a peka hatuka aman lungina han ava luta ava tan.

²⁸A lu ha kheng le ava laka nupang sanai kom han a peka. Hatuka nupang sanai han a nu kom apek.

²⁹Hatuka a zolai ngaiin ariat le aruak ha ava lak u na thana asiak u.

³⁰Hatuka zolai ngai ha Isua kom avan khom u ei tho u ngai le ei manchu u ngai aril pe u.

³¹Hatuka aman akom u na, “Nangni lim philchar muna abinga hong u tan la pong ansa bak u ro,” ati.

³²Hantin han philchar muna rakuang le abinga ase u na.

³³Hatuka min ei se ha amuna mi tampan amani ha ariata khotin ata hava han ke le atan u na alei va khel u.

³⁴Hantin han ama chu ti rakham ava suaka mi achan atam ava mu na a veng rang abui bera rual ang ei ni u sika lungkham amu sabaka chong atampa a manchuna.

³⁵Hatuka nikhua abui rang ani sabak zeia a zolai ngai a kom a hong u na, “Hiva hin philchar mun ei ni nikhuam abui rang ani zei.

³⁶Hiva ngai hi na kola luia le khuana se na ei sak u rang hongmo lua chu ei rachok thei u na ranga manse ro ba,” ati u na.

³⁷Aman chu akom u na, “Nangnin asak rua pe u ro,” tina a masanga.Hatuka amanin akom han, “Vaipol aduli raza anni man rachona va pe mani mo,” ati u na.

³⁸Hatuka aman a kom u na, “Vaipol pek hozetmo nei don u en u ta,” ati. Hatuka ei don u ariat le, “Pek ranga, le nga anni,” ati u.

³⁹Hatuka aman alom u na sul aring chunga han abuk abuka mansut u ro atina chong a peka.

⁴⁰Hatuka atanga raza khata somranga na ansut u.

⁴¹Hatuka aman vaipol ranga le nga anni ha alaka van lam a ena bor a peka vaipol ha akhiaka mi matona ei sak u ranga a zolai ngai kom apek ha nga anni ham a peka asem u.

⁴²Alom u han asak u na akhop u.

⁴³Hatuka vaipol le nga adi anoi kok somleianni ala bita.

⁴⁴Vaipol asak ngai ha pasal ulian riam pek ngal a sang ranga ani u.

⁴⁵Hatuka ama nget han mipui chu aman china ava ral tiang Bethsaida tiang ama matona ase mansa u ranga a zolai ngai ha rakuanga chuang len.

⁴⁶Hatuka ama chu a manchin suale borazong ranga muala han ase na.

⁴⁷Ani bui le rakuang ha tindil lai taka han alaia oma ama chu athei daka muala han a om.

⁴⁸Hatuka rakuang ha ei antak sabak ei vei u asik chu phaivuan ei semna tiang ei om ei ni u, zan chim, rilanlak akhel tiang siaia tidunga kal achoia amani tiang ahong pana akhel rang a val.

⁴⁹Ningal sela amani han ama ha ti chunga akala ei hong amu u na han, “Raluai” imo ati u na ankhek u.

⁵⁰Alom u han ama amu u na aratha amanta u hanum nisela ama han amani abiak lena a kom u na, “Phukdaia om u ro koi ke ka ni do, achi u no ro,” ati.

⁵¹Hatuka rakuanga han akom u na ava chunga phaivua ha abanga achang a mandong sabak u.

⁵²Vaipol rui ha atho chang re u maka a malung ei anchang u sika.

⁵³Hatuka varal avan kan u le Genesaret ram tiang ava tung u na ti rakhama han rakuang athung u.

⁵⁴Hatuka rakuang ata asuak sua u lehan min Ama ha alei riat len u na.

⁵⁵Hava ram kol dora han atan susup u a om ti na ei riat u na tak peia ana, dam lui azamun len le ahong razon u na.

⁵⁶Hatuka khua sina, khualiana, luia ei omna tak peia ana ngai bazaram a mansuta ama ha ei mathem u a puan mer lua chu anton ranga aton dora chu ei dam len.