Read Ranglong MARKIN 7 Bible Online

MARKIN 7 - Ranglong bible

MARKIN 7

¹Hatuka Pharisi ngai le Lekhanziakpu ngai bila senkhat Jerusalem khua ata ahong ngai han a koma ahong anchun u na.

²Hava ngai han a zolai senkhatin kut akhela vaipol ei sak u alei mu u na.

³Pharisi ngai le Juda ngai dora han ulian ngai chong vong ha ei lei pom u sika akut u asadima arasuk u nok anten sa u ngai mak.

⁴Hatuka bazar ata ahong u le anbual u nok ten ite sa u ngai mak hatuka rui atatei atampa apom ruam adon u bel kheng thir ansuk ruia.

⁵Hantin han Pharisi ngai le Lekhanziakpu ngai han, “Ichangamo na zolai ngai ulian chong vong anga omlui a kut akhela sak nek ei tho u,” ti na arakel u na.

⁶Hatuka aman hangai kom han, “Isai han nangni phuazekam ngai, dearin nangni ruia ei lei ril hi adik keng, ‘Hiva ngai hin amur riama ana manpak u na, tenchu a malung u chu ka kom ata ala sabak u na.

⁷Ei zozot ni rase ei manchu u na ha miring chongpek ei manchu u sika ei na biak u chachak hi akorong keng,’ tia anziak anga.

⁸“Pathian chongpek chu anmaka miring chong sin anmang, ha ei surtit u ke hile,” ati.

⁹Hatuka ama denin a kom u na, “Nangni chong ansin ha nei surtit u theina ranga Pathian chongpek nei zot u nok hi adika nei riattit u.

¹⁰Mosin, ‘Na nu le na pa lalchi tho ro,’ hanuk ‘Min a nu mo a pa mo asiat aril tak chu thi rase,’ alei ti na.

¹¹Nangnin chu hintin hin nei ti u chachak min a nun mo a pan mo ei mangna rang ani ten ‘Korban’ ani zei ati len.Hava tina chu ‘Pathian kom anpek’ tina.

¹²A nu rang a pa rang atho anphal u lai mak chena.

¹³Nei rung sika Pathian chong rat luia nei lei siak u hantin han atampa nei lei tho u.”

¹⁴Hatuka mi ngai ha akui reta akom u na, “Na lom u na ka chong hi rangai kiar u tan tuak u ro.

¹⁵Mi apang ata asungkua luta ama annim thei tute om mak.

¹⁶Mi asung kua ata asuakin ke ei man nim.”

¹⁷Hatuka mipui kom ata ina ahonga lut le a zolai ngaiin ankhina chong ha arakel u na.

¹⁸Hatuka aman akom u na, “Nangnim hatuk pei riatna nei luia nei la om u mo? Angkhatpei hi apang ata miring von sunga alut reng chu a malunga alut nimak, nom ase le avon ata ei suak

¹⁹hasika ama chu man nim thei mak ati hi re u mak che mo? Saktin hi anthiang,” ati.

²⁰Hatuka ama denin, “Miring ata asuak han mi mannim chachak.

²¹Asung ata han miring malunga han mandonna ngai ha asia ahonga suak mithat uiare na.

²²Ningolna, asia thona, anhuangna, hurna, khamaret, siat anrilna, borai thona, amona hiva ngai hi.

²³Hiva asia dora hi asung ata ahonga suaka miring ei mannim chachak,” ati.

²⁴Hatuka anthuia havan ata Tura le Sidon biala ase zeia. Hatuka in aluta tuten ei riat rang zot maka tenchu anthup thei mak.

²⁵Hantin han nupang khat a nainupang sanai kachai ratha annim a vong han athang alei riata a ke kunga avan bok lena.

²⁶Nupang ha Grik mi ei anpiangna chu Surophoiniki mi ei ni aman ama ha a nainupang a sungkua ata kachai ei notna ranga a mathema alop.

²⁷Hatuka aman a kom han, “Nai ngai khop bak rase nai ranga vaipol anpota ui koma apei anhui mak,” ati.

²⁸Aman a koma han, “Puma ani chu ei ni ten ni ngal sela dokang thuaia ui ngaiin um anai ngai avaipol sak u na aher achul asak do,” atina a masanga.

²⁹Hatuka aman a koma, “Na chong ril sika se ta ro kachai na nainupang a sungkua ata asuak zei,” ati pe.

³⁰Hatuka a ina han ase na a nai chu kachaiin amaka zamuna ei zal ava mu zei.

³¹Hatuka Tura ram ata asuak reta Sidon khua apala Dekapoli ram arakana Galili tindila ava tung.

³²Hatuka mi angkhat kuaraset a chong um ape akom ahong ruai u na a chunga a kut adap ranga a mathem u na.

³³Hatuka aman mipui bila ama rong ha abinga aruaia akut maria le a kuarkua akhika hatuka amachila a malei amet pe.

³⁴Hatuka anvan tiang atanga phukpui alaka akom han, “Epphatha” atia hava ha, “Anlong ro” tina ani.

³⁵Hantin han akuar ha avar amalei anlom um anzar zeia anthiang vanga achong thei zei.

³⁶Hatuka aman akom u han, tute kom ril u ta ni tina akhar tit hanum ni rase ei khar zotor pei tang ahai riam u chachak.

³⁷“Ama han asadima alompeia ei tho kiar aset ngai a manvar pena chong thei lui ngai um aman chong,” ati u na achang a mandong sabak u.