Read Ranglong MARKIN 9 Bible Online

MARKIN 9 - Ranglong bible

MARKIN 9

¹Hatuka aman amani ha ei rila, “Kei na ti ani u zei, hiva anding ngai bila senkhat chu a om thina reng tem u no ni Pathian Ram apui sabaka a hong amu u nok maseng.” atia.

²Ni ruk suale Isuan Pitor, Jakob le Johon rong abila maruka mual ansang khata a ruaia ase. Hatuka ama ha amani makunga a mel atei a.

³Hatuka a puan a ngui achalaka anthianga phil chunga tuten hador manthiang thei no ni.

⁴Hanke Eliza le Mosin hiva ngaiin anmupui a amani ha Isua le a chong u.

⁵Hava han Pitorin Isua ha ei ti, “Minchupu hiva hin koini nei om hi asa chubuk anthum sin inti, nang na rang angkhat Mosi rang angkhat hanuk Eliza rang angkhat.”

⁶Achi sabak u na imo ei ril rang remak.

⁷Hava suale ansum rapom a honga a mani ha a manlia na. Hatuka ha ansuma han hintin chong ei om, “Ama ha ka Naipasal madit ama he rangai u ro,” tina.

⁸Hatuka anlaiseka asir apang a en u na tute mu u lai mak Isua rong a bil u na a amu u.

⁹Mual ata a chum u le aman hangai ha adet mata chong a peka, “Nei mu u ngai dora ha tute ril u no ro. Miring Sapa athi ngai bil ata anthui sir maseng chu.”

¹⁰Hava han, “A thi ngai bil ata anthui hi imo?” tina hangai han hava ruia amani le amani ankel ansiat u na hava chong amani rang an ril u.

¹¹Hatuka amanin ama ha a rakel u, “Lekhanziakpu ngaiin chu Eliza hong mansa inti ei ti u.”

¹²Aman hangai ha ei ti, “Eliza hong mansana rui tin zeka sin inti ani chu ei ni, hatuka Miring Sapa ruia hantina ei anziaka ei om ha ama chu antak tong sabak inti anpengsom inti.

¹³Tenchu keina ti u ni zei Eliza ruia anziak anga hava anga han a hong sua zei hatuka min ama rang ei zo zota ei lot u ani zei.”

¹⁴Hatuka a zolai ngai kom a honga ei hong mu a sir apang u na mitampa hatuka Lekhanziakpu ngaiin amani ankhalpui u na.

¹⁵Ama ei mu u le mi dora achalaka anlai u. Hatuka ama kom a tan u na ava pham u.

¹⁶Aman hangai ha a rakela, “Amani le hongzat ruia mo nei ankhal u?” ati na.

¹⁷Hava han mi ngai bila angkhatin a masanga, “O Minchupu, ka naipasal khat na kom kei hong ruai ama ha chonglui rathan ei man.

¹⁸Hava ha asur tik pei ei anba len hatuka a mura acher huan ei suaka a ha ei ariala ei ankhir chachak, na zolai ngai ha na manbang pe u ro kei ti tenchu tho thei u mak.”

¹⁹Aman a masanga hangai ha ei ti, “O iam lui khuk ngai ituk ten ngal mo na kom u na kei om rang? Itukmo phuk kei mansot rang hava nai ha ka kom hong koi u ta.”

²⁰Hava nai ha ama kom a hong tuang u ama amu le ha ratha han achalaka ama hera phila anzuana acher huan a suaka a pu titira a om.

²¹Hatuka aman a pa ha a rakela, “Hiva hi itukmo ei sot ani zei hintin ei om?” ati.

²²Aman ei ti, “Pasal sanaite ani lai ata ha ratha han a that ranga voi itukmo moi, voi itukmo tina ei masul ani zei, na thei ten lungkham na mu tan na san ro,” ati.

²³Isuan ama ha ei ti pe, “Na thei ten mo a iam takin ama ranga aloma a bei.”

²⁴Hanke ha pasal sanai a pa ankheka a mitrathi suak chunga ei ti, “Ka iam zei kei iam nokna na khai pe ro,” ati.

²⁵Hava suale mi ngai a honga tana amu na Isuan ha ratha sia ha aman laia ei ti pe, “O chongkului le aset ratha, kei na ti ni zei hivan ata suak ro hava pang lut lai no ro,” ati na.

²⁶Hava han ama ankheka ha nai ha a mahera a suaka ase hava han pasal sanai ha a thi anga a oma mi tamin chu, “A thi zei,” ati.

²⁷Tenchu Isuan a kut a sura a mathui le anthui.

²⁸Hava sua ina a hong le a zolai ngaiin maruka a rakel u na, “Koini le ichangmo hava ha nei rasua thei nok?” ati u.

²⁹Aman ei ti, “Borzong le bungoi rong nok anten hiva ang hi chu suak pial ngai mak.”

³⁰Hava mun ata asuak u na Galili malai tiang ase u ama ei zot nok chu min ei riat rang.

³¹Asik chu ama a zolai ngai ha ei manchuna ei ril, “Miring Sapa miring ngai kuta anpe inti anthat suale ama ha nin thum suale anthui inti,” ati.

³²Tenchu amanin ha chong ha re u mak ankel rang um ei achi u.

³³Hava suale amani ha Kapernauma ahong u hatuka ina atung u le aman hangai ha a rakela, “Lampuia i rui mo nei ankhal u ha?” ati.

³⁴A daireka a om u na asik chu tumo ulian atia lampui a ei ankhal u.

³⁵Hava han ansuta somleianni ngai ha ei paia ei ril, “Mankhita ni rong ati chu nukkhita om inti, hatuka mi dorbo adom inti.”

³⁶Hava suale aman naipangte khat amani alai taka a manding ama ha apoma hangai kom aril,

³⁷“Koi ka raminga hiva anga naipang khat pei apom ten, koi ke ei na pom, hatuka koi ana pom tak chu koi nimak tenchu koi ana tirpu ha ke ei pom.”

³⁸Johonin ama rang ei ti, “O Minchupu, koinin na raming le mi khat kachai ei rahok na mu hatuka ama ha nei khar asik chu ama ha koini na zi mak.”

³⁹Tenchu Isuan ei ti, “Ha nai ha khar u no ro, asik chu tute om mak ka raming le sin alian ei thona anrappana ananmumak thei.”

⁴⁰Asik chu mi koini anadui nok chu koini tianga keng.

⁴¹Ataka min nangni hi Krista mi atina ti khuri khat ngal ana man nek u ten ataka kei na ti u ni zei ama ha a phamman ata ankhai no ni.”

⁴²“Hatuka mi a na iam tete ngai bila, mi sok ancha tak chu aringa lung alian a thunga tipuiliana ansul ama ranga asa.

⁴³Hatuka na kutin ana lua ten hava ha tana pei ro.

⁴⁴Kut anni le anphenengna ha thilui moia ase nek ten kip luia damna na lut nang na ranga asa.

⁴⁵Hatuka na ken ana lua ten tana pei ro ke anni le anphenengna muna achul nek ten akhor damna na lut na ranga asa.

⁴⁶Hatuka na mitin ana lua ten hava ha kela pei ro.

⁴⁷Mit anni le Gehenna muna achul nek ten mit khata Pathian Rama a lut na ranga asa,

⁴⁸‘anphenengna na chu moi thi ngai mak.’

⁴⁹“Mitin ha moi le manthiang inti dali andar chunga machi le ei manthiang anga.

⁵⁰“Machi asa, ten machi ei al anpei ten nangnin ile mo nei man ti u rang. Nangnin naning chip u na na malung machi siak u ro anngoi u ro.”