Read Ranglong LUKIN 10 Bible Online

LUKIN 10 - Ranglong bible

LUKIN 10

¹Hava suale Puman atei somsari anni athanga anni annia a man se a matona khopui tina hanuk ama ei se na rang muntina.

²Amani kom ati, “Sang a at rang atam, a at rang atom a puma kom zong tan la sang a at rang hong tir inti.

³Se u ro! ngelang bila kel anga kei na tir u ni zei.

⁴Na bila, marsa, kekok choi u no ro, lampuia mi pham u ta ni.

⁵Ina na lut u rang kip, ‘Hiva ina phukdaina om rase,’ ti bak u ro.

⁶Phukdaina andit a om ten a chunga phukdaina tung rase, azot nok ten na kom u na kir ret rase.

⁷Hava ina han ne ro, sa ro, ei na pek u tak sin a tho ngai chu ei lo apek anang. In ateia anthot titir u no ro.

⁸Khopuia na se le ana lei pham u na ei na pek tak ne u ro,

⁹hava khopuia ana ngai mandam u ro hava na mipui kom, ‘Na kola Pathian Ram ahong zei ti u ro.’

¹⁰Tenchu khopuia na se na ana lei pham u nok ten lampuia se tan ti u ro,

¹¹‘Na khopui u na philvut koini na kena kop nangni rang na khong, tenchu re u ro Pathian Ram na kol u na atung zei!’

¹²Kei na ril u ni zei ruiril nikhua Pathianin Sodom ha hava khopui nek ten lungkham la mu inti!

¹³“Ituk anchi rua mo ei ni rang nang Korazin na rang! Nang Bethsaida ha tichangabui sin ngai ha Tura le Sidona antho nisela chu ansuta bosta rasila moirahol anbual u zei ni, ei masial u ata ansir ti riatna rang!

¹⁴Pathianin ruiril nikhua Tura le Sidon lungkham mu bet inti nangni nek ten.

¹⁵Hatuka nang Kapernaum! Na theia vanram tenpei andom rang nei anti? Ansinsakna muna anpei na ti!”

¹⁶Isuan a zolai ngai kom ati, “Nangni anan ngai tak koi anan ngai, ana heng tak koi ana heng, hatuka koi ana heng tak chu ana hong anthuanpu aheng.”

¹⁷Ha somsari anni ngai ha raisanna lian tak le ahonga kir u. “Puma,” ati u na, “raluai ngalin na he tel na raminga na rahok le!”

¹⁸Isuan a masanga, “Soitan anvan ata machek anga ei chul ka mu, ati.

¹⁹Rangai u ro! Thotheina kei na pek u ni zei, marul le ainuvet bila kal na choi uam ni rase iten na manna u no ni.

²⁰Ratha asian na he ei tel u sika na raimansan u no ro; tenchu vanrama na raming ei anziak u sika na raimansan u ro.”

²¹Havalai tak han Isua raisanna na abita Ratha Anthiang le, hatuka “Ka Pa, vanram le phil Puma! Ka na manpak asik chu nangin a thei ngai kom nei thupa a thei nok ngai kom nei man mu. Ani, Ka Pa hintina ei ni rang hi nei zot.

²²“Ka Pan aloma ei na pek kiar sua keng ani zei. Naipasal hi tumo tuten re mak Pa nok chu, hatuka tumo Pa hi tuten re mak Naipasal nok chu, hatuka Naipasal in ei athang ama ei anlangna ranga.”

²³Isuan a zolai ngai tiang anhoi a abinga ati, “Ituk chanasa mo na ni u nei mu u ngai nei mu hi!

²⁴Keina ril u ni zei deari ngai reng ngaiin ei mu zot, nei mu u hi tenchu mu thei u mak, nei rangai u anngai rang tenchu thei u mak.”

²⁵Dan minchu khat ahonga Isua mandok rong atina. “Minchupu, imo tho ning umor damna kei manna rang?” atia a rakel.

²⁶Isuan amasanga, “Imo Pathian chongin ei ti? Hontinmo nei malet?”

²⁷Ha mi han a masanga, “ ‘Na Puma na Pathian hi na malung dora le na ratha dora le na ranak dora le, nei mandon dora le; madit ro,’ hanuk ‘Na inkol mi nang nei andit anga adit ro.’ “

²⁸“Na dik,” ati na Isuan a masanga, “Hintin hin tho ro dam na ti.”

²⁹Tenchu Dan minchupu ha atheia anzek rang a zota, hasik han Isua a rakel reta, “Tumo ka u ka nai?”

³⁰Isuan amasanga, “Voikhat chu mi khat Jerusalem ata Jeriko tiang a pana, anru ngai le antonga azem u arazik u na athi vita amak u.

³¹Hatuka chaizung khat hava lampui tiang kal achoia ase; tenchu hava mi ei mu le arakana ase.

³²Hava lampui tiang den han Levi khat ahonga hava mi han a en vuaia akhela ase.

³³Tenchu Samari mi khat havan tiang ahonga ha mi ha ei mu le atiang asena a chan lungkham a mu.

³⁴A kola asena apop ngai sariak le uain a khua pena athuam pe hatuka a sakuarpar chunga abanga khual tungna na aruaia aen azon ranga.

³⁵Hanuk nikhua rupa dangka cheng anni ei om u na a puma a peka, ‘En ro kiavang ro,’ ati pe, hatuka ‘ka honga kir le nei tham dora na pe ka ting,’ ” ati.

³⁶“Hiva anthum bila hovamo a unai na ti?”

³⁷Dan minchupu han a masanga, “Lungkham amu tak ha,” ati. Isuan amasanga, “Se tan hantin den va tho ro.”

³⁸Isua le a zolai ngai kal achoi tir u na kho khat ahonga suak u na Martha atia nupang khatin a ina alei mantung.

³⁹Zuarpui adona a raming Mari ama ha Puma ke kola ansuta ei ril ngai arangai.

⁴⁰Martha ha inrui athona a takasi hasik han Puma kom ahonga, “Inrui dora a tho ranga ei namak hi na tel mak che mo?” ati.

⁴¹Puman amasanga, “Martha, Martha! Nang chu inruia le nan pon zata,

⁴²tenchu angkhat dak ke anang Marin hava ha athang, hava ha a kom ata anpei lai no ni.”