Read Ranglong LUKIN 11 Bible Online

LUKIN 11 - Ranglong bible

LUKIN 11

¹Nikhat chu Isua munkhata bor azong, ansuale a zolai khatin ati, “Puma bor azong na manchu ro Johonin a zolai ngai ei manchu anga.”

²Isuan, “Bor na zong u le hintin hin ti u ro: ‘Ka pa: Na raming anthiang lalchi om rase, na ram hong tung rase.

³Nikhuantina rang neksak na pe ro.

⁴Nei masial ngai na madual ro koini chunga asia tho ngai nei madual anga. Ansinna antaka na masul no ro.’ ”

⁵Hatuka Isuan a zolai ngai kom ati, “Zanchima na mal a ina asena hintin hin na vatin, ‘Ka mal, vaipol anthum apuk na pe ro.

⁶Ka lom khat ahong atung ite ansak rang don makung!’

⁷Na malin asung ata ana masanga, ‘Na hong pol no ro! Suak khar ha ankhar zei, naite ngai le zamuna na zal zei. Anthuia ite na hong pe thei no ning.’

⁸Hanle, hontinmo ni zei? Keina ril u ni zei a mal nei ni sika nimaka tenchu nei zong re ret sika nei anzak nok sika ei don dora na pe inti.

⁹“Hasik han kei na ti ni u zei, zong u ro man u na ti, arok u ro mu u na ti, atok u ro suakkhar malong inti.

¹⁰Asik chu azong ngai chu man inti anrok ngaiin mu unti antok ngai rang anlong inti.

¹¹Pa ngai naiin nga a zong le marul pe un mo?

¹²Arati a zong le ainuvet pe un mo?

¹³Asia naninam asa pek chu sanai rang na riata. Itukmo Pa vana min azong ngai kom Ratha Anthiang ei pek rang!”

¹⁴Isuan chongkului raluai a rasuana; hava raluai asuak suale, hava mi ha achonga mipui aboi adong,

¹⁵tenchu mi senkhatin atina, “Beelzebul raluai ulian ke ranak apek anzul ranga.”

¹⁶Senkhatin Isua akhitna en u na, boidong sin tho sa ro Pathianin ei ti ke ti nei riatna rang ati u na.

¹⁷Tenchu Isuan amandon u ariata atipe, “Ram, ansena, ansual chu aliak sot ngai mak, insungkua ansen chu achul.

¹⁸Hantitin han Soitanin pol adona ansual u ten hontinmo ei diar rang? Beelzebulin ranak ei na peka raluai kei not nei na ti u.

¹⁹Hintin hin kei razul aniten, hontinmo na ruaisi ngai le ei razul u? Na zolai ngaiin nei dik nok a manlang!

²⁰Nimaka, Pathian ranak le ke raluai kei razul, hava han Pathian Ram ahong atung zei ti a manlang.

²¹“Aratpa khatin a ral raling dora le a in arung ten ei don ngai mazok thei inti.

²²Tenchu ama neka aratin anthopuia aman doka, a ral raliang dora a choia ei anngamna ngai ha hatuka ei maruk ngai doram athek pe zit inti.

²³“Ka tianga a om nok tak chu koi anadui; na bum pui lui chu anthek.

²⁴“Mi kom ata ratha asia asuak le achei tira ram achara pongansana a en. Aman nok ten atheia anti, ‘Ka ina kir ret ka ting.’

²⁵A kir reta in ha akorong anthiang vang ava mu.

²⁶Hatuka asena atei sari avalak ama neka asiat hatuka hava han a om u na hava mi ha machina neka asiat.”

²⁷Isuan hava ngai ati suale, nupang khat mipui bil ata achonga ati, “Ituk raisan mo ei ni nupang nang a nan zira ana en chu!”

²⁸Tenchu Isuan, “Pathian chong ariata atel ngai chu itukmo a rai ei san u!”

²⁹Mipui Isua kola ahong anchuntira, achong tita, “Atun taka mi ei siat hi! Boidong sin amu ranga azong u na tenchu tuten mu no ni, Jona omlaia rong nok chu ite atei ni no ni.

³⁰Havan tin anga han deari Jona ha Ninevi ngai ranga andangna, Isuam ni rase atun taka mi ngai ranga andangna ni inti.

³¹Ruiril nikhua Sheba na rengnu andinga atun taka mi ngai rakel inti asik chu a ram len ata Solomon a kom hianna chong anngai ranga asena, kei na ril u ni zei hivan hin a om Solomon neka alian.

³²Ruiril nikhua chu Ninevi mi ngai andinga na la rakel unti, asik chu amani chu Jona chong ariata ansir u; kei na ti u ani zei hiva hin Jona neka alian a om!

³³“Min lem bela thup ngai maka, anhipna le mahip ngai maka, ei chuangna na a manchuanga ahonga lut doran ra-ang ei mu thei na ranga.

³⁴Na mit ngai hi na taksa ranga lem, na mit asa lai chu na taksa dora ra-ang abit; na mit asiat tik chu, na taksa dora a zinga om inti.

³⁵Anriat sadim ro na koma ra-ang ha azing nini.

³⁶Na taksa dora ra-ang abit ten, zing ngal riak lui, aloma el inti lemin ei elna le ei na el anga ni inti.”

³⁷Isua a chong ril ansua le, Pharisi khatin abila bu nek ranga akui, hatuka asena avan sut.

³⁸Pharisi ha aboi adong Isua kut suk luia bunek rang ati na.

³⁹Hasik han Puman ati na, “Nangin Pharisi ngai na khuri le kheng apang chu anthiang, tenchu na sung u ansualna le asiat abit.

⁴⁰Amo ngai! Asung asinpu han apang um sin mak mo?

⁴¹Tenchu na khuri le khenga ha anriang ngai pe ro hatuka aloma anthiang kiar inti.

⁴²“Nangni Pharisi ngai na ravan aduai u, ansa, kumhoi, chimu dora soma angkhat na pek u, tenchu Pathian dikna le a lungkham tel u mak che na. Tenchu hava ngai hake nei anchu rang atei ngai poisak lui ni luia.

⁴³“Pharisi ngai na ravan aduai u! Sinagogue a ansutna min ei hoi a min ei na lei pham u bazara hava ha nei zot u.

⁴⁴Na ravan aduai u! Nangni hi than, andang lui min kal ei choina na ni u.”

⁴⁵Dan minchu khatin atina, “Minchupu, havan tin na ti ten koini siat um nei ril keng!”

⁴⁶Isuan a masanga, “Nangni dan anziak ngai na ravan aduai u, mi ruanga puak na manpel u na apel ngal salui tenchu na maria khat ngal le anpel rang ti mak che na.

⁴⁷Na ravan aduai u! Nangni deari ngai ranga than ahui nei sin u ha, deari na chipui ngaiin ei that u.

⁴⁸Na chipui ngaiin ei tho u ha nei riat pui, nei pom pui u; amanin deari ei that nangnin thankhur nei sin u.

⁴⁹Hasik han Pathian hianna ninum, ‘Deari tir ka tinga asen that unti, asen pangsep unti.’

⁵⁰Hasik han atun taka mi ngai ei antak u rang deari ngai ramual ansin len ata ei anthat sika thisen phuba la ka ti ati.

⁵¹Abel anthat len ata Zakaria anthat tenpei, mun anthiang le maicham kong kara anthat. Ani, kei na ril u ani zei, atun taka mi ngai hi amani ngai dora sika antak ei tiar u rang!

⁵²“Itukmo na ravan ei duai u Dan anchu ngai! Asik chu hianna anlongna ranga chabi ha na rot pui u na.Nangni lenum lut u mak che na hanuk chu alut rang anuam ngai um na khar u na! ati”

⁵³Isuan hava mun ei mak le Pharisi le Dan minchu ngaiin achalaka asiat aril u na, hanuk ankel rua tampa a rakel u,

⁵⁴akhit zama an okna a en u na ei ril masial ving mo a om ati na.