Read Ranglong LUKIN 13 Bible Online

LUKIN 13 - Ranglong bible

LUKIN 13

¹Havalai tak han mi senkhat a om ngaiin Isua kom arila Pilatin Galili mi Pathian kom dali dar u laitak ei that.

²Isuan amasanga, “Havan tin han anthat ei ni u sika atei Galili mi ranga salui rang mo nei iam u?

³He e, nimak! Kei na ril u ni zei na siat u ngai na mathan u nok ten hantin den nei thi kiar u rang.

⁴Hanle mi somleiariat a thi Siloama bangin ei del ngai hale? Jerusalema mi dora rang masial atam rang mo nei iam u?

⁵Tenchu nimak! Kei na ril u ni zei na pap na mathan unok ten amani anga nei thi u rang.”

⁶Hatuka Isuan hiva ankhina aril: Mi khat a oma a rahuana theipui kung adon. Amara en asena tenchu va mu mak.

⁷A rahuan aen ngai kom kum anthum ka hong zei tenchu amara ngal mu making. ‘Tuk u ro! Ichangmo phil ei man chong rang?’ atina.

⁸Tenchu rahuan a enpu han, ‘Kum khat dak hoisa inti a ravel chuia philsa pe ka ti, atia a masang.

⁹Hava suale na kum anra kukui mo; hanok ten tuk bo ma ni.’ ”

¹⁰Sabat nikhua Isuan Sinagogue a a manchu.

¹¹Nupang khat ratha sian ei sur kum somleiariat ana; a kut anzik pial thei lui.

¹²Isuan a muna a pai, “Nupang nei nana ata na zok zei!”

¹³A chunga a kut asiaka, anlaiseka anzik hatuka Pathian a manpak.

¹⁴Sinagogue a ulian a takasi, Isuan sabat nikhua mi ei man dam sika, hasik han mi kom aril, “Ni ruk a om sinthona rang; hava nikhua han hong tan dam u ro ba, Sabat nikhua chu nimak!”

¹⁵Puman a masanga, “Nangni phuazekam ngai! Na serat khitri khek u na ti, na sakuarpar ri khek u na ti, sabat nikhua ti man ne u na ti.

¹⁶Atun hiva hin Abraham akhuk soitanin kum somleiariat ei thung sabat nikhua zok no ni mo?”

¹⁷Ei masang danin adui ngai a manzak u na, mipui chu ei tho ngai sika a rai a mansan u.

¹⁸Isuan a rakela, “Pathian Ram hontinmo ei ni, i le mo kei mankhi rang?

¹⁹Hintin hin ani pasal khatin ancham ru a laka phaia ama khe. A honga monga thing kungpa ahonga ni. Hatuka va ngaiin rabu asin.”

²⁰Isuan a rakel reta, “Hong lemo Pathian Ram kei mankhi rang?

²¹Hintin hin nupang khatin chol a laka dibi anthum vaipola a manpola alom peia athuia.”

²²Isua khopui le khotiang a lut tira asena mi ngai a manchu tira, Jerusalem tiang a pan tira.

²³Mi khatin a rakela, “Puma alakte mo sandam ani rang?” Isuan a masanga.

²⁴“Suakkhar anchipa nei se thei u na rang nei chole dor pei tho u ro; mi tampan asena en inti tenchu thei no ni.

²⁵In pumapa anthuia in khar inti; tual panga andinga na tok tik hatuka ti na tia, ‘Ka pu suakkhar na malong pe ro! Na re u makung hovan ata nei hong u mo ti inti!’

²⁶Hatuka masang u na ti, ‘Lokona na nek na sak hale; koini khopuiam chong na ril ha le!’

²⁷Tenchu, ‘Hovan ata mo nei hong u, hivan ata ankhai u ta ro nangni mi salui ngai!’

²⁸Itukmo nei chapna ha nei la rial u rang, Abraham, Isak le Jakob deari ngai dora Pathian Rama na mu tik, nangni chu anpeia om u na ti!

²⁹Sualam, taklam, mar, sim ata mi hong intia Pathian bukhalai zarnana ansut intia.

³⁰Atuna nukanta ngai man lansa unti, manansa ngai nuk lanta unti.

³¹Havalai tak han Pharisi senkhat Isua kom ahonga ahong ti u, “Hivan ata suak tan ateia se ro, asik chu Herodin ana that rang ati.”

³²Isuan a masanga, “Sial ha va ril u ro: ‘Raluai kei razul avian, nangtuk mi mandam ka ting, hatuka ninthum changnana ka sin sua ka ti.’

³³Hanum ni rase kei pan tak hi avian, nangtuk, nangthiam kei pan rang; Jerusalem noka ateia deari that dik mak.

³⁴“Jerusalem, Jerusalem! Deari ngai nei that, palai Pathianin ei na hong tir pe lung nei deng! Voi itukmo na mi ngai dora akua rong kei ti, arpuiin ate ngai a mantha thuaia ei bum anga tenchu na zot mak che!

³⁵Hasik han na Biakin u a korong la ni inti, kei na ril u ni zei na mu u lai no ta ni, hun la hong inti hava tika Pathianin borsang pe rase, ‘Puma raminga hong chu, na ti u tik.’ ”