Read Ranglong LUKIN 16 Bible Online

LUKIN 16 - Ranglong bible

LUKIN 16

¹Isuan a zolai ngai kom ei ti, “A neipa khat a om, suak adon, ha suak han a donglua en. Ha a neipa ha a suakin a sum a mang atia anril.

²Hasik han a paia aril, ‘Na rui imo kei riat hi? Na sum mang akipa na man mu ro, ka dong a en rang ni thei lai mak che.’

³Ha suak han aninga anti, ‘Ka puman ei na masuak rang ani zei ka sintho ata. Imo kei tho rang? Phil atuk um kei rat nok. Kut adom kei anzak.

⁴Ka riat zei imo kei tho rang! Ka sin anpei le, min ei na pham theina rang.’

⁵“Hasik han a pu sum antang dora a paia. Manapu ha a paia a rakel, ‘Itukmo nei antang ka pu kom?’

⁶‘Tin razakhat oliv sariak, sumvongpun hile nei antangna ngai,’ atina. Hatuka ‘ansut tan som ranga maziak ro,’ ati pe.

⁷Atei ret a rakela, ‘Nang le itukmo nei antang?’ ‘Bu phali asang khat,’ ‘Hile nei antangna ngai,’ ‘raza riat maziak ro,’ atipe.

⁸“Hatuka apun sumvongpu salui ha a manpaka atho dan ei riat sika ra-ang nai ngai neka ramual nai ngai chu ei hian anlang u atun taka ruia.”

⁹Isuan aril tira, “Keina ti u ni zei, ramual nei le mal rual sin u ro, asik chu ahek le, umor ina lut thei u na ti.

¹⁰Asintena a iamrua na ni ten alianpanam a iamrua ni na ti. Asintena iamrua na ni nok ten alianpanam iamrua ni no ta ni.

¹¹Ramual neinun amanga a iamrua na ni nokten hontinmo neinun dik amanga aiamrua nei ni u rang?

¹²Mi neinun le iamrua na ni nok ten hontinmo na neinun min na pe ni?

¹³“Puma anni suak ni thei ngai mak angkhat mumaka angkhat a dit inti, hano angkhat lalchi thon ti angkhat tel no ni. Pathian le sum adorbo a dom rit thei u no ta ni.”

¹⁴Pharisi ngaiin hava ngai ariat kiar u na Isua amani u, asik chu sum ei adit u.

¹⁵Isuan amani rang ati, “Nangni hi na ni u mi mu ranga asa anti ngai, tenchu Pathianin na malung ariat, miringin ani ei ti ngai dora Pathian mitmuna ite nimak.

¹⁶“Mosi Dan le deari ngai ei maziak ha Johon Baptispu tena ei anmang; hava suale chu Thang Ahui Pathian Ram rui anrila, mitin aluta.

¹⁷Anvan le phil anpei abei ual Dan ramal khat anpei nek ten.

¹⁸“A nungak a maka nupang atei alak ten uiare; hatuka ha nupang alak tak chu uiare.

¹⁹“Voikhat chu aneipa khat raliang aman alu le anlianga ahui ahek sabaka nikhuantin ei om.

²⁰Hava han anriang khat a raming Lazar ataksa apan nek, ama ha, ha aneipa makota ahong ruai u chachak.

²¹Ha aneipa dokanga buramal achul ka man mo ti sabeia. Ui ahonga ei pan rathi ahong maliak chachaka.

²²“Anriang te athina vanpalai ngaiin Abraham akola ansut ranga a choi u vanram bu nek nana. Aneipam athina aphum u.

²³Athi khuana achan aduk ana, atanga Abraham ava mu, alapana, akola Lazar ava mu.

²⁴Hatuka a pai, ‘Ka pa Abraham, lungkham na mu ro. Lazar hong tir tan la a kutchal manchopa ka adang na hong mandai pe rase, asik chu moia achan ka duk ana!’

²⁵“Tenchu Abrahamin a masanga, ‘Na damsung mandon ro, asa dora nei man, Lazar chu asiat dora ei man. Atun ama chu ahui zei, nang chu na na zei.

²⁶Hava panga na kong kara anthukpa ke, havan ata hivan tute hong thei mak, hivan ata havan tute hong thei mak.’

²⁷Ha aneipa han hanok, ‘Ka pa Abraham, Lazar na tir pe ro ka pa ina,

²⁸parual atei ranga ka la don amani kom va ril rase amani lua chu hivan hong u no rase.’

²⁹“Abrahamin a masanga, ‘Na parual ngai aril rang Mosi, deari ngai adon u; ei ril u ngai na parual ngaiin tel u rase.’

³⁰Aneipan amasanga, ‘Hatuk bak chu hun mak, ka pa Abraham! Tenchu athi ata angkhat pei sena va ril sela hanke a asia ata ei ansir u rang.’

³¹Tenchu Abrahamin atina, ‘Mosi le deari ngai he arangai u nok ten hanum iam u no ni athi ata anthui ngal rase.’ ‘’