Read Ranglong LUKIN 18 Bible Online

LUKIN 18 - Ranglong bible

LUKIN 18

¹Hatuka Isuan ankhina khat arila borzong chian u rase a boi mandong u no rase atia ei manchu na.

²“Khopui khata ruiazek khat a om, Pathian um achi lui miring um achi lui.

³Hava khopui den han arong khat a om, ‘Na san ro,’ ati na ahong chian.

⁴Asotpa tel luia a oma tenchu aninga anti, ‘Pathian ka chi nokam, miring lalchi ka tho nokam.

⁵Tenchu ei na hong pol sika ei dikna en ka ti phuba la pe ka ti, hanoten honga na hong manpong inti,’ ” ati.

⁶Puman aril tira, “Rangai u ro imo ruiaril saluipan ei ti.

⁷Atun chu, Pathianin a mi ngai zek luia ei om rang mo asun azana achap ngai ranga? A san ranga ei lan nu bang rang mo?

⁸Kei na ril u ni zei, amani ranga anrapa zek inti. Tenchu Miring Sapa ahong le phila iamna hong mu ni mo?”

⁹Isuan hiva ankhina hi ala ril, ka sa anti ngai mitei chu tel lui ngai.

¹⁰“Nikhat chu mi anni Biakina borazong ase u; angkhat ha Pharisi angkhat ha lei ansuang.

¹¹“Ha Pharisi ha abinga andinga bor azong, ‘Ka na manpak Pathian, koi chu mi tei anga anruak makung, iamnokrua nimakung, Uire makung. Ka na manpak sova lei ansung angam nimakung.

¹²A hapta voianni ka ngoi, kei sua dor ata soma angkhat ka na pek.’

¹³“Tenchu lei ansuang chu ala uala andinga amai ngal vanram tiang tang ngam mak, arop a rachum a, ‘Pathian koi mi salui lungkham na mu ro,’ ati na.

¹⁴Kei na ril u ni zei,” Isuan ati, “ha lei ansung nimaka, Pharisi ha, Pathian matona dik luia a in apan. Atheia anlian ngai chu annuai inti, hatuka atheia annuai ngai chu lian inti.”

¹⁵Mi senkhatin anai u ngai ahong ruaia Isua kom akut adap ranga. Hantina ei tho u a zolai ngaiin amuna ango u.

¹⁶Tenchu Isuan naipang ngai apaia, “Khar u no ro asik chu Vanram chu hia ang ngai rang ke.

¹⁷Hiva hi re u ro! Naipang anga Pathian Ram pom lui chu lut pial no ni.”

¹⁸Juda ulian khatin Isua a rakela, “Minchupu asa, imo kei tho nget rang umor damna kei manthei na rang?”

¹⁹“Ichangmo asa tia nei na pai?” Isuan a rakela, “Pathian nok chu asa om mak.

²⁰Chongpek ngai na riata; ‘Uire no ro; mi that no ro; marusa tho no ro, mi asia manlo no ro, na nu na pa lalchi tho ro.’ ”

²¹Hava naiin a masanga, “Naipang ka ni len ata, kei tel kiar ke hiva chongpek ngai.”

²²Isuan ariata, a kom ati, “Nei tho rang khat ala om. Nei don dora zuar tan ha sum ha anriang ngai pe ro, hatuka vanrama nei donin na ti; hatuka na hong zi ro.”

²³Hava ngai ariata achan anngui, asik chu achan anei ei ni sika.

²⁴Isuan ei anngui a muna ati, “Itukmo anei ngai ranga Pathian Ram alut ei antak!

²⁵Anei ngai Pathian Ram ase nek ten makingkang simphuai kuana lut abei.”

²⁶Mi ariat ngaiin a rakela, “Hanle tumo azok thei rang ani zei?”

²⁷Isuan amasanga, “Min ei tho thei nok chu Pathianin a tho thei.”

²⁸Pitorin, “Enta! koinin na nei ngai dora nei mak zita nang nei na hong zi,” ati.

²⁹“Ani,” Isuan ati, “Kei na ti u ni zei a in a nungak, a parual, a inkua, a nai Pathian Ram sika amak tak chu,

³⁰hava ngai neka atam aman nok rang tute om mak, nangkan umor damnam man inti.”

³¹Isuan a zolai somleianni abinga aruaia aril, “Rangai u ro! Koini hi Jerusalem tiang ase rang na ni aloma deari ngaiin ei maziak, Miring Sapa rui ei dik rang.

³²Ama chu Jentail ngai kuta anpe inti, elsekara tho untia, asiat ril unti, machil unti.

³³Razik untia that unti, tenchu ninthum suale anthui ret inti.”

³⁴Tenchu a zolai ngaiin hava rui ite re u mak; a chong zia ha amani kom ata anthup, hasik han Isuan imo ei ti re u mak.

³⁵Isuan Jeriko kola han mitacho khat lampui kola ansuta kut a lei do.

³⁶Mipui ei se ariata a rakel, “I ang mo?” ati na.

³⁷“Nazareta Isua ase,” ati pe u na.

³⁸Ankheka, “Isua! David a Naipasal! Lungkham na mu ro!” ati.

³⁹A matona mi ngaiin ango u na, dai rek ro ati pe u. Tenchu haneka anringa ankheka, “David a Naipasal! Lungkham na mu ro!”

⁴⁰Isua andinga ha mitacho ha hong tuang u ro ati. A kola a hong le Isuan arakela,

⁴¹“Na rang imo atho rang nei na zot?” “Puma, amu ret rang ka zot,” ati.

⁴²Isuan ati pe, “Hano mu ro! Nei iamnan ana mandam zei.”

⁴³Voikhat lena amu len thei, hatuka Isua azina Pathian a manpaka. Mipuiin a muna Pathian amanpak u.