Read Ranglong LUKIN 19 Bible Online

LUKIN 19 - Ranglong bible

LUKIN 19

¹Hatuka Isua Jeriko a luta akhel rang atina.

²Hava han lei ansuang ulian a raming Zakaia a oma, ama ha anei.

³Ama ha tumo Isua atia amu zot, tenchu ama ha mi sin ei ni sika mipui bila mu thei mak.

⁴Hasik han a matona alei atana thingkunga alei va kal Isua mu ranga hava lampui tianga ase rang ei ni.

⁵Hava mun ha Isua ava suak le, atanga Zakai rang ati, “Anrapa chum ro Zakai, asik chu avian na ina kei om rang,” ati na.

⁶Zakai anrapa achuma raisan sabaka apham.

⁷Amu ngai doran, “Mi salui ina atung rang ati atia,” achiar u.

⁸Zakai andinga Puma kom ati, “Puma! Ka nei anbak anriang pe ka ti, hatuka mi kei huang a omten mun manlia thuan ret ka ti.”

⁹Isuan ati, “Avian hiva ina sandam atung zei, asik chu hiva nai him Abraham achi keng.

¹⁰Miring Sapa ei hong hi anpei ngai anrok le andam rang ke.”

¹¹Jerusalem ava suak vit u na Pathian Ram chu anlang vit ranga a iam u. Mipui ngaiin a rangai chiana Isuan ankhina khat a ril.

¹²Hatuka ei ti, “Mi dingmun ansang khat a oma ram alapana ase rang hava han reng ei kaia a ina a honga kir ret ranga.

¹³Ase man a suak som ngai a paia rangkachak sumru zona angkhat apeka ati pe, ‘Hiva le hin imo na sua u thei ka bui kar.’

¹⁴Atun chu, a mi ngai lenin ei mumak, hasik han a nuk lena palai atir u na, ‘Hiva nai hi koini na reng ranga zot mak me,’ ati ranga.

¹⁵“Hava nai ha reng akaia a honga kir zei. Anrapa asuak ngai dora apaia a matona, itukmo alei sua u zei ti ariat ranga.

¹⁶Mankhita a honga, ‘Ka pu som ka lei sua ha angkhat nei na pek lehan,’ ati na.

¹⁷‘Asa nei tho, nang hi suak asa na ni! Asintena a iamrua nei ni sika, khopui som a en ranga na phun ka ti.’

¹⁸Asuak anni changna ahonga ati, ‘Ka pu rangkachak sumru ranga ka lei sua nei na pek lehan.’

¹⁹Hiva nai rang, ‘Nang hi khopui ranga en rang na ni,’ ati pe.

²⁰“Asuak khat ret ahonga ati, ‘Ka pu, hile na rangkachak sumru rumal sunga ka thup.

²¹Kei na chi, asik chu nang hi minkhir na ni, na ta nok ngal nei lak, nei ling nok ngal nei at.’

²²Aman akom atia, ‘Nang suak salui! Na chong len ha mang ka ti nang ana dem ranga! Minkhir keinim na riata, ka ta nok kei lak na riata, kei ling nok kei at um na riata.

²³Hanle, ichangmo ka sum ha sum anpung ngai kom a nei siak nok? Ka honga kir tik ei pungna le man no ning mo.’

²⁴“Hatuka havana anding ngai kom, ‘Ha rangkachak sumru ha la u tan som adon kom pe u ro,’ ati.

²⁵Tenchu akom ati u na, ‘Ka pu, sumru som adon zei do!’

²⁶‘Na ril u ka ti,’ atia amasanga. ‘Adon ngai chu atam anpesa inti; hatuka ite donlui ngai chu alakte ei don ngal ha apot inti.

²⁷Atun chu ka raldui ngai ha a reng u kei ni rang zot lui ngai ha hin hong tuang u ro, ka matona that u ro.’ ”

²⁸Isuan hava ngai ati suale, maton asonga Jerusalem tiang a pan.

²⁹Bethphage le Bethani kola ahonga suak le Oliv tanga, a zolai anni mana alei tira

³⁰hiva chong le: “Na matona khuana se u tan la; nei va lut u le sakuarpar ate va mu u na ti anthung tute ei la chuangna nok. Khek u tan hivan hong koi u ro.

³¹Min ana rakela ichangmo nei khek ati ten, Puman anang atia ril u ro.”

³²Ei pan u na rang tiang apan u na Isuan ei ti anga amu u.

³³Ha sakuarpar akhek u lai tak, “Ichangmo nei khek u?” apuman ahong ti.

³⁴“Puman anang atia,” amasang u,

³⁵hatuka ha sakuarpar ha Isua kom atuang u.

³⁶Hava suale apuan u ngai ha sa chunga apha u na Isua manchuang u. Ei chuanga ei se han mipuiin lampuia apuan alei pha.

³⁷Jerusalem kola ahonga suaka Oliv mual tianga lampui apan taka han, a ruaisi tampan anringa Pathian kom raisanna mantung u na amanpak u, alomapeia ei mu u sika:

³⁸“Puma raminga reng a hong chu Pathianin bor pe rase! Vanrama phukdaina Pathian anlalna le anliana om rase.”

³⁹Mipui bila Pharisi ngaiin, “Minchupu na ruaisi ngai chong u no rase ti ro!” ati u.

⁴⁰Isuan amasanga, “Kei na ril u ni zei amani adairek u ten lung ngai ngal ankhek unti.”

⁴¹Khopui ha adep sana, hatuka ei mu le achap,

⁴²“Avian hin anngoina ranga imo anang re tan la! Tenchu atun lamu thei mak che!

⁴³Na ralin na la hual inti, bang le na la man kul inti, aravela suak thei lui khopa na hual inti.

⁴⁴Na masiat biang unti, na bila na lom ngai um; hatuka lung angkhat ngal amuna om no ni, asik chu Pathian anan zok ranga ei hong lei re u mak che!”

⁴⁵Hatuka Isua Biakin sunga aluta neinun azuar, anchok ngai ava razul,

⁴⁶“Pathian chonga anziak, ‘Ka Biakin hi Pathian anmokna, rang ke.’ Tenchu anru ngai anthupna na asin u!” ava ti pe.

⁴⁷Anikhua Isuan Biakin a a manchu chaizung ulian, Dan minchu ngai, kho ulian ngaiin athat rang ati u na,

⁴⁸tenchu lampui reng man u mak, mi doran a he a rangai u na a he baikhat ngal anchan rang zot u mak.