Read Ranglong LUKIN 20 Bible Online

LUKIN 20 - Ranglong bible

LUKIN 20

¹Nikhat chu Isuan Biakina mi a manchu na, Thang Ahui arila, chaizung le Dan minchu ngai, kho ulian ngai le anruala ahong u,

²hatuka ati pe u, “Na ril ta, imo ningneina nei dona hiva ngai nei tho? Tumo hintina ana pek?”

³Isuan a masanga, “Hanle na rakel u ka ti, na ril u ta,

⁴Johonin mi baptisma ei pek ha Pathian ata mo ole miring ata mo?”

⁵An ena ankhal u zei, “Imo ti mani? Pathian ata na ti ten, hanle Johon ha iam u mak chena? Na ti inti.

⁶Tenchu, ‘Miring ata ke na ti ten,’ hiva mipui doran lung na deng inti, asik chu Johon ha deari keng tia ei riat u.

⁷Hovan ata hong mo re mak me,” atia amasang u.

⁸Hatuka Isuan atipe na, “Kom na ril u no ning hovan ata mo hiva kei tho ngai hi.”

⁹Hava suale Isuan mipui kom hiva ankhina aril: “Voikhat chu mikhatin rahuan asina, rahuan a en ngai kom a maka asotpa ranga khuala ase.

¹⁰Gerep ansuang hun ahonga suaka, suak atira rahuan a en ngai kom ama changai ava lak ranga. Tenchu rahuan a enpu han a lei zem sabaka ite choi luia a lei makhir.

¹¹Hasik han suak khat ret atir; tenchu rahuan a enpun ama ham a lei zema; maimok a lei saka akoronga a makhir ret.

¹²Hatuka suak anthumna atir reta; rahuan a enpun a lei maphop reta a lei rasua.

¹³Rahuan puman ati zei, ‘Imo tho ning? Ka nai man se ka ti; ama chu lei ton u bo ni!’

¹⁴Tenchu rahuan a en ngaiin a lei mu u na, amani le amani anti u na, ‘Hile hi apuma nai. Tho that u rei hatuka koini na ta chang inti!’

¹⁵Hatuka rahuan panga amasuak u na athat u. “Atun chu rahuan puma han imo lot ni ha arung ngai ha?” Isuan arakela.

¹⁶“Honga, ha rahuan arung ngai ha hong that intia atei kom pe inti.” Mipuiin hava ei riat le, “Hadorpei chu ni no rase!” ati u.

¹⁷Isuan amani a ena arakel, “Hanle hiva Pathian chong hi i ei tina mo? “ ‘Ha lung, a sin ngaiin ei tel u nok ha, anang khit achanga.

¹⁸Ha lung chunga achul tak chu aher chang inti; hatuka ha lungin ei del tak chu adi chang inti.’ ”

¹⁹Dan minchu ngai le chaizung ngaiin Isua ansur rang ati u hava mun len han, asik chu ankhina ha amani dui keng ti ariat u na; tenchu mipui achi u.

²⁰Hasik han hun a en u; mi senkhat azik apeka ama en ranga a thun u na ankelrua le hankeng Rom ram aoppu kuta ei mansur u rang.

²¹Hava misi ngaiin, “Minchupu, nei manchu le nei ril ngai hi adik ti na riat. Hatuka mi nina tel ngal mak che Pathian zot dan anga adik Pathian rui na manchu.

²²Na ril ta, koini na dan akhel mo ei ni Kaisar kuta lei na choiin?”

²³Tenchu Isuan achang do u ariata atipe,

²⁴“Rupa sumru khat na manmu u ta. Tu ramil le raming mo achuang?” “Kaisar ramil,” atia amasang u.

²⁵Hasik han Isuan amasanga, “Kaisar ata chu Kaisar pe u ro, Pathian ta chu Pathian pe u ro.”

²⁶Havan mipui bila ite asur na man u maka, adairek u na ei masang ngai ariat u na achang adong u.

²⁷Hatuka Saduki senkhat, mi athi ata anthui no ni ati, Isua kom ahonga ati u,

²⁸“Minchupu, Mosin hiva dan hi koini rang a maziaka, ‘Pasal khat athina a nungak a maka tenchu nai mamaka, ha arong ha hava nai a naipan a laka nai ei nei u na athipa nai atina anpom intia.’

²⁹Voikhat chu parual sari oma; a ulian khitin nungak alaka nai nei luia athi.

³⁰Athuai len ha alak reta.

³¹Hatuka anthum changnan, ha parual sari ngai ha hantin kiar ei ni nai maluia athi kiar u na.

³²Nuka ha nupang, athi.

³³Atun chu, athin thui nikhua tu nungak mo ni ni? Pasal sarin ei lak.”

³⁴Isuan amani a masanga, “Atun taka nupang pasal chu an om,

³⁵tenchu nupang pasal athi ata anthui rua chu, hava tika chu an om ulai no ni.

³⁶Vanpalai anga ni untia thi u lai no ni. Amani ha Pathian nai ngai, asik chu athi ata ei anthui u.

³⁷Hatuka Mosin anthiang vanga a mandang athi ngai anthui ret. Chiakbuk moi achuang rui han Puma rui aril, ‘Abraham a Pathian, Isaka a Pathian hanuk Jakob a Pathian.’

³⁸Ama ha adam ngai Pathian, athi ngai nimak, asik chu ama kom chu adam kiar.”

³⁹Dan minchu senkhat achonga, “Nei masang asa, Minchupu!” ati u.

⁴⁰Asik chu rakel ngam u lai mak.

⁴¹Isuan amani a rakel, “Messia hi David a khuk ata ei ni rang hontin ei anti thei?

⁴²Asik chu David apumin Sam anziaka ei ti, ‘Puman ka Puma kom ati: Ka chang tiang ansut ro

⁴³Na raldui ngai na ke siakna Ka manchang maseng.’

⁴⁴Davidin Puma atia a paia; hontinmo Messia ha David a khuk ei ni thei?”

⁴⁵Mi doran arangai lai tak, Isuan a zolai ngai rang ati,

⁴⁶“Dan minchu ngai ata anrung u ro, a kultai anchual le acheia min lalchi ei tho rang azot u, bazar muna; Sinagogue mun anhoi athang u chachaka; hatuka bu khalai zarna na mun asa khit athang u chachak.

⁴⁷Arong ngai donglua amaruka, asei sabaka a borzong amanlang u na! Aduk la na khit unti!”