Read Ranglong LUKIN 21 Bible Online

LUKIN 21 - Ranglong bible

LUKIN 21

¹Isua anhoia a en anei ngai nuampek apek u Biakina nuampek siakna na,

²arong anriang, ten ei pek sumsen sumru anni hava ham amu.

³Hatuka, “Atei ngai ranga hiva arong nu keng apek atam khit ati.

⁴Asik chu atei ngai chu anei aliak ata apek u na; tenchu ama chu ei dam na ranga ei don selep ata ke ei pek.”

⁵Zolai senkhat Biakin rui achong u na, itukmo ei sa alung ngai le Pathian matona nuampek andar ngai. Isuan ati,

⁶“Aloma nei mu u dora hi hun la hong inti hava tika lung angkhat ngal amuna om no ni; aloma la chul inti.”

⁷“Minchupu, hiva hi itikmo nini? Hatuka imo ei ni ranga ahong tung zei ti nei riat theina ranga?”

⁸Isuan ati, “Anrung u ro, na huang u ni, mi tampa honga Isua rang rila, ‘Koi hi Isua ka ni!’ hong ti inti, ‘A hun atung zei!’ hong ti inti. Tenchu zi u ta ni.

⁹Ankap, ansual rui na riat u le achi u ta ni, hiva ngai chu ei ni mansa rang ke, tenchu hava ngai ha ahekna nai zei tina nimak.”

¹⁰A la ril tira, “Ram le ram ansual inti, rengram le rengram andui inti.

¹¹Ninun rik hong inti, maitam le rikhua om inti muntina; tichangabui le anchirua anvan ata hong inti.

¹²Hiva ngai atung man, ansur u na ti na sinsak unti; ankel ranga na tuang unti Sinagogue a; hatuka lungina na khum unti; reng ngai le ruaitu ngai matona na tuang unti koi ka sika.

¹³Hava ha na rang Thanga Ahui rilna hun.

¹⁴Man ata na malung lei sin u ro hava tika hontinmo naninga nei zok theina rang andon u no ro.

¹⁵Na raldui ngaiin ei na sua u nokna ranga mur le hianna na pe u ka ti.

¹⁶Na nu, na pa le na parual, na sarnu hatuka na nai, na mal ngaiin na mansur unti, senkhat chu na that unti.

¹⁷Mi doran ka sika na mumak unti.

¹⁸Tenchu na sam sangkhat ngal na lu u ata anpei no ni.

¹⁹Ngirtit ro zokin na ti.

²⁰“Sipai ngaiin Jerusalem ahual u tik asiat rang anai zei ti re ta ro.

²¹Judai rama om ngai chu mual tiang tan u rase; khopuia om ngai chu khopui ma u rase, rama om ngai chu khopuia se u no rase.

²²Hava nikhua ngai ha, ‘Phuba lakna nikhua,’ la ni inti, Pathian chongin ei ti ngai ei kipna rang.

²³Nupang anrai ranga hava nikhua ngai ha ituk antak mo ei ni rang hanuk naite annui adon ngai rang! Hiva rama hin antak sabakna la tung intia, Pathian sinsakna mi ngai chunga la chul inti.

²⁴Asen chu khendaia anthat om inti hatuka atei ngai selkei ranga ramtina tuang unti, hatuka Jerusalem ha Jentail ngai ke thuaia om inti ahun ahek maseng.

²⁵“Hava tik chu ani, tha, arasina tichangabui pangai la ni inti, phila ram dora anning inti, tipuia han rasa le tipui ansok achi unti.

²⁶Ramuala imo ei nin zei anchina, mi ngai anmoi inti, chung tianga thotheina la bui inti.

²⁷Hava suale Miring Sapa ansuma, thotheina le anliana hong anlang inti.

²⁸Hiva ngai ahong ani tik anding tan tang u ro nei zokna rang anai zei.”

²⁹Hatuka Isuan hiva ankhina aril: “Theipui kung mandon u tan, atei thing kung um.

³⁰Abua athar ancher le kholum anai zei ti na riat u.

³¹Havantin anga hiva ngai atung le re u ro Pathian ram anai zei.

³²“Chongdik kei na ril u ni zei hiva ngai atung sua maseng atuna khuk ngai thi kiar u no ni.

³³Anvan le phil ke ei anpei rang tenchu ka chong anpei no ni.

³⁴“Anrung u ro! Anek asaka achan anmang u no ro hanuk ramual damna ranga andon u no ro, asik chu ha nikhua ha hong tung rak ni,

³⁵chang anga. Mi dora ranga ramual muntina hong inti.

³⁶Hasik han hava ahong atung rang ngai dora nei len theina rang le Miring Sapa matona anding thei ranga borzong u tan tang u ro.”

³⁷Isuan hava nikhua ngai han Biakina a manchu chachaka, khului ani le asuaka ase zana Oliv muala ava om chachak.

³⁸A zingtin Biakina mipui asena ava rangai u.