Read Ranglong LUKIN 22 Bible Online

LUKIN 22 - Ranglong bible

LUKIN 22

¹A hun ahonga nai zeia chol anchel lui Vaipol Panta, hava ha Zokna Panta ei anti.

²Chaizung ngai le Dan minchu ngai han mipui achi u na, hasik han maruka Isua thatna lampui amandon u.

³Hatuka Juda Iskariot anti han a sunga Soitan alut.

⁴Ase viaka chaizung ngai le Biakina a ulian ngai le ava chong u hontinmo Isua ansurna rang.

⁵Azot u na sum apek rang ati u.

⁶Judam azota achan arok zei Isua ansura amani kom apek ranga mipuiin hava rui riat luia.

⁷Chol anchel lui Vaipol Panta lai han nikhua ahonga suaka Zokna bu nekna rang bera that ranga anang.

⁸Isuan Pitor le Johon a tira, “Se u tan Zokna bu khalai ha anek thei len ranga lei ansin sua rase,” ati na atho dan aril.

⁹“Hovan mo lei ansuk rase atia nei zot?” Atia arakel u.

¹⁰A masanga, “Khopuia na va lut u le mikhat tikok anvan na lei antong pui unti. Ei lutna ina va zi u ro,

¹¹hatuka in puma kom ti u ro; ‘Minchupun, hova ina mo ka zolai ngai le koi Zokna bu kei nek rang ati?’

¹²Aman mun anliang sua chunga na man mu unti, hava han ansua vanga mu u na ti.”

¹³Ase u na Isuan ei ti anga aloma ansin chita ava mu u, hatuka Zokna bukhalai amansuk u.

¹⁴Ahun ahonga suak Isuan a zolai ngai le asutmun alak a.

¹⁵Amani kom ati, “Hiva Zokna bu hi anek rang achan ka zot nangni bila antak ka tiar man!

¹⁶Kei na ril u ni zei Pathian rama a omzia tatak akip maseng ne thak lai no ning.”

¹⁷Hatuka Isuan khuri alaka raisanna Pathian kom a mantung, hatuka, “Hiva hi la u tan ansem u ro.

¹⁸Kei na ril u ni zei atun ata hiva uain hi ne lai no ning Pathian Ram ahong maseng.”

¹⁹Hava suale Isuan vaipol tap alaka Pathian kom raisanna mantung, a khiaka a manlona ati, “Hiva hi ka taksa nangni na ranga anpek. Koi nei na riattit u na rang tho u ro.”

²⁰Havan tin anga han khuri alaka a manlon khului bu nek suale, hintin hin ati, “Hiva khuri hi Pathian chongtin athar ka thisen le mor anzem nangni na rang azan.

²¹“Tenchu en u ro! Anan sur rang ha ka bila om!

²²Miring Sapa ei thi rang Pathianin ei ti anga, tenchu ansurpa itukmo avan aduai ba!”

²³Amani kara ankel u na, “Tumo ei ni rang hantina atho thei.”

²⁴A zolai ngai bila tumo alian khit atia ankhalna asuaka.

²⁵Isuan amani rang ati, “Jentail reng ngaiin a mi ngai chunga chong anei, ram ulian ngaiin, ‘Mi ngai mal’ nina azong u, atia.

²⁶Tenchu nangni le chu hintin nima, nangni bila alian khit ha asin khit anga ni rase hatuka aruai ha suak anga ni rase.

²⁷Tumo alian, anek ranga ansut mo, hanle adorbo andompu mo? O, hanle ansut tak ha.Tenchu na bila kei om u hi dorbo andompu ang kei om ke.

²⁸“Ansinnana na chul kar pei ka bila na om u zei,

²⁹hatuka ka pan ningneina ei na pek anga koi um hava anga ka na pek u.

³⁰Ka rama Ka bila nek, sak, u na ti Israel nam som le nam anni ngai rui aril ranga reng sutmuna ansut u na ti.

³¹“Simon, Simon, rangai ro! Soitanin ei na mansin kiar u na ranga phalna man asiat ata asa khai ranga, lui atho pun sarasi le bu tak ei zen anga.

³²Tenchu Simon nang na ranga bor ka zong nei iamna ei siat nokna rang.Hatuka ka tiang nan hoi le na parual ngai manrat ro.”

³³Tenchu Pitorin, “Puma na bila lungina se le athim kei ngam keng do!”

³⁴“Na ril ka ti, Pitor,” Isuan ati, “Avian zan voi anthum re makung na na ti maseng ar khuang no ni!”

³⁵Hatuka Isuan a zolai ngai arakel, “Marsa, juli, kekok abuia ka na man se u lai nei ansam u mo om?” “Ite ansam mak me,” atia amasang u.

³⁶“Ten atun chu marsa mo juli mo a don tak choi rase; tenchu khendai nei lui chu apuan zuara racho rase.

³⁷Kei na ril u ni zei Pathian chongin ei ti anga, ‘Ama chu mi salui bila atel u,’ ti ha ka ruia ei hong dik rang, asik chu imo anziak ha koi ka rui ei hong dik rang.”

³⁸A zolai ngaiin, “Enta! Hiva hin khendai anni om hile Puma!” ati u. “Hava ha ahun,” atia aman amasang.

³⁹Isuan ha khopui amaka ase, ei tho babang anga Oliv Muala; hatuka a zolai ngai um abila se.

⁴⁰Hava mun asuak u le, amani kom ati, “Borzong u ro, themnana nei chul u nokna rang.”

⁴¹Amani kom ata ankhai lungtang adeng dor alana, hatuka sutkuluka bor azong.

⁴²“Ka pa, na zot ten, hiva antak tengna khuri hi ka kom ata khai ro. Ka racham ni ma, tenchu na racham anga ni rase.”

⁴³Vanram ata vanpalai ahong anlanga ranak a man nei.

⁴⁴Rathatak sabaka borazong malung apek sabaka; arathan ha thisen ramal anga phila chul.

⁴⁵Borzong ata anthuia a zolai ngai tiang ase reta amalung ei na u sika a ina ava mu.

⁴⁶Amani kom ati, “Ichangmo nei in u? Anthui u tan borzong u ro anthemna na nei chul u nokna rang.”

⁴⁷Isua ala chongtit, a zolai somleianni bila Judan mipui ahong ruai han, Isua kom abiang atum rang a honga.

⁴⁸Tenchu Isuan a lei ti na, “Juda biang atuma mo Miring Sapa nei mansur rang?”

⁴⁹Hatuka Isua bila a zolai ngaiin imo ei ni rang amu u na arakel u, “Puma khendai mang mani mo?”

⁵⁰Amani bila angkhatin Chaizung Lian asuak atana achang kuar asat ving.

⁵¹Tenchu Isuan, “Hiva le chu ahun zei,” ati. Hava nai akuar atona a mandam pe.

⁵²Hava suale Isuan chaizung ngai le Biakin arung ulian hanuk patar asur ranga ahong ngai kom ati, “Khendai le raimol le ahong mo na nang u koi hi asel ranga mo nei na iam u?

⁵³Na bil u na anikhua Biakina kei om tenchu ana sur rang ti u mak che. Atun hi na singansa hun u azing rachama rui anril le.”

⁵⁴Isua asur u na Chaizung Lian ina aruai u; ral ata Pitorin a zi.

⁵⁵Kholaia moi atho u na anua ngai le avan lop.

⁵⁶Suak nupang khatin ei mu le moi kola ei ansut ha andinphita ava ena ati. “Hiva nai um Isua bila mi ke.”

⁵⁷Tenchu Pitorin nupang rang, “Hava mi ha remaking,” ati.

⁵⁸Nuk beta pasal khatin amuna Pitor rang ati, “Nang um amani bila keng na ni.” Tenchu Pitorin a masanga, “He e, remakung,” ati.

⁵⁹Hava suale dar angkhat sua mi khatin achan ana sabak ati, “Hiva nai hi Isua bila mi keng ati a iam nok rua ite om mak asik chu amam Galili mi keng!”

⁶⁰Pitorin a masanga, “Hongmo nei ril re ngal makung ati!” Anlaiseka a chong lai tak ar akhuang.

⁶¹Puma anhoia andinphita Pitor atiang a en, hatuka Pitor anriat zei. Puman ei ti ha, “Ar akhuang man voi anthum remakung na ti na ti.”

⁶²Pitor asuaka ana sabaka annuk.

⁶³Isua arung ngai han elsekara athona azem u.

⁶⁴A mit akhit pe u na, “Tumo anazem reta,” ati u.

⁶⁵Hatuka ala ero sabak u na.

⁶⁶Khua ei var le patar ngai, chaizung ulian ngai le Dan minchu ngaiin lokona antong u, hatuka Isua ha ruirilna matona ahong tuang u.

⁶⁷“Na ril ta, nang hi mo Messia?” ati u. A masanga, “Ka na ril u ten na iam u no ta ni;

⁶⁸ankelrua khat ka na rakel u ten na masang u no ta ni.

⁶⁹Tenchu atun ata Miring Sapa Athotheikiar Pathian changtiang ansut inti.”

⁷⁰Alom u na ati u, “Nang hi Pathian Sapa mo na ni?” Amani amasanga, “Nangni keng a na ti.”

⁷¹A ti u na! “Ariat atei nang mak me! Koini len hi ariat na ni imo ei ti!”