Read Ranglong LUKIN 23 Bible Online

LUKIN 23 - Ranglong bible

LUKIN 23

¹Mipui dora anthuia Pilat akom Isua atuang u,

²hava han asinsak u na: “Hiva miring hi nei sur, na mi ngai asiat changa aruai, reng kom lei choi u no ro ati pe hatuka Messia, reng khat ka ni,” ati.

³Pilatin arakela, “Juda ngai reng mo na ni?” Isuan a masanga, “Nei ti anga.”

⁴Hatuka Pilatin chaizung ulian le mipui kom atina, “Asik ite mu makung, ei siatna.”

⁵Tenchu haneka apu u na, “Ei manchuna hin nam ansualna rasua Judai rama. Galili ramam atho zeia atun hivan ei hong.”

⁶Pilatin ariata arakel, “Hiva mi hi Galili mi mo?”

⁷Isua ha Herodin ei op thuaia keng ti ariata Herod akom ama man se hava lai han amam Jerusalema om.

⁸Isua ei mu le Herod achan arai asan asik chu ama rui ariat zeia ei mu zotnam asot zei. Isuan boidong sin thon ti, ti a iama.

⁹Hasik han Herodin ankel rua tampa a rakela, tenchu Isuan masang mak.

¹⁰Chaizung ulian ngai le Dan minchu ngai matona ahong u na ana sabaka bado hong tho sa u na.

¹¹Herod le a sipai ngaiin elsekara tho u na puan anthang khat a mansil u na, Pilat akom a manse ret u.

¹²Hava nikhua len han Herod le Pilat mal anchang u; hava man chu andui ei ni u.

¹³Pilatin chaizung ulian ngai, ruaitu ngai le mipui dora apaia,

¹⁴hatuka ati pe, “Hiva nai ka kom nei hong tuang u na mi lampui ateia aruai nei ti u. Atun na maton u na ka ena ite ei masial man making na bado tho u ngai rui ha.

¹⁵Hatuka Herodin um ei masial man maka koini kom ahong makhir ret. Hiva naiin ei thina rang khop masial don mak.

¹⁶Hasik han manzik ka ti a man se ka ti.”

¹⁷Hava pantana tumo chu anzok pe u ranga a zot pena.

¹⁸Tenchu mipui dora ankheka, “That ro! Barabba na mazok pe ro,” ati u.

¹⁹Barabba ha lungina ankhum asel sika le mithat sika.

²⁰Pilat han Isuan zok rang chu ei nuam, hasik han mipui kom a zong reta.

²¹Tenchu mipui ankheka, “Kros a pe ro! Kros a pe ro!” ati u.

²²Pilatin voi anthum changna ati, “Tenchu imo ei masial? Ei thina rang khop ite man making! Manzika mazok ka ting,” ati.

²³Tenchu ahe ei anring u dor pei ankheka Isua Kros a anpe rase atina, ahek tena chu ei ankhek u achuk.

²⁴Hasik han ei ti u anga Pilatin amasat.

²⁵Ami zong u ha a mazoka, ha lungina ankhum ha, asel sika le mithat sika, hatuka Isua ha amani kom apek ei zot u anga ei lot u ranga.

²⁶Sipai ngaiin Isua aruai u na, hatuka ase u lai han Kurini ata mi khat Simon atina antong pui u ama ha khua ata khopuia hong; asur u na Isua nuk tiang Kros a manput u.

²⁷Mipui atampan ava zina; hava bila nupang senkhat ama sika achap u na.

²⁸Isua amani tiang anhoia ati, “Jerusalem nupang ngai! Ka sika chap u no ro, tenchu nang le na nai u ngai rang chap u ro ati.

²⁹Nikhua la hong inti hava tika, ‘Ituk vanasa mo nai nei lui nupang chu, naite mazir ngal lui chu, nai ranu pe lui chu la ti unti!’

³⁰Hava tik han min mual ngai rang, ‘Na deng ro!’ Tang ngai, ‘Na thup ro,’ la ti unti.

³¹Thing aring ngala hintin hin ei tho u, imo ni ni achar tik vang chu?”

³²Abila atei anni atuang u athat rang amani ha mi salui u.

³³Hatuka, “Lu ru mun” ati na munkhat asuak u le hava han Isua Krosa atar u, hatuka ha mi salui anni ngai ham achang tiang angkhat avoi tiang angkhat.

³⁴Isuan, “Ka pa! madual ro! Imo ei tho u re u lui keng.” A puan ha ansem u ravan a en u.

³⁵Hava han mipui andinga athir u Judana ulian ngaiin a ero u: “Mi le a mazoka ama le zok ta rase ba Messia aniten Pathianin ei athang ha!”

³⁶Sipai ngaiin um elsekara tho u na; ahong dep u na zu thur a manlon u.

³⁷Hatuka, “Juda reng na ni ten zok ta ro ba,” ati pe u.

³⁸Achunga han hiva chong ngai anziak: “Hiva mi hi Juda ngai Reng.”

³⁹Havana akai khatin angona, “Messia ni mak che mo? Zok tan koinim na mazok ta ro ba!” ati.

⁴⁰Tenchu atei han aleia ngona, “Pathian achi mak che mo? Anrual ripa nei tiar hi.

⁴¹Koini chu atiar rang ngal ke na ni, koini chu nei tho mara keng nei man, tenchu ama chu ei masial om mak.”

⁴²Hatuka Isua kom ati, “Na mangil no ro, Isua reng anga na hong tik!”

⁴³Isuan ati pe, “Kei ti ni zei avian ka bila Paradis a omin na ti.”

⁴⁴Dar somleianni tang ni inti ani honga zinga, ram dora ha ahonga zinga dar anthum ten pei hatuka Biakina puan anrin ha antheta.

⁴⁵

⁴⁶Isuan anringpa ankheka, “Ka pa! Na kuta ka ratha ka siak!” atia athi.

⁴⁷Sipai ulianin hava ha amuna, Pathian amanpak, “Ama so mi sa ani nget!” ati.

⁴⁸Havana mipui a en ranga anchun ngaiin amu imo ei ni, aropbur arachum u na malung anana akir u.

⁴⁹Aloma Isua abinga ariat ngai, Galili ram ata nupang ahonga zi ngai, ala uala andinga a en u.

⁵⁰Mi khat a raming Joseph Arimathai khopuia Judai rama mi. Ama ha mi sa lalchi thorua mi khat, ama ha Pathian Ram ei hong tung anruang. Ruirilna na mi khat aninam ei masat u le ei tho u ngai pom mak.

⁵¹

⁵²Pilat akom asena Isua ruak ava zong.

⁵³Hava suale ruak ha a masuma puan le athuam thana a manzal tute ei lan phum nokna lung anchui a.

⁵⁴Hava nikhua ha Sabat nikhua ranga ansinna nikhua ani na.

⁵⁵Nupang Galili ata Isua azi ngaiin Joseph abila sena than ava mu u Isua aruang ha hontinmo ei anphum ham amu u.

⁵⁶Hatuka intiang akir ret u na marim ahui ava mansuk u ruak ei khua u ranga. Sabat nikhua chu pongansa u Danin ei ti anga.