Read Ranglong LUKIN 24 Bible Online

LUKIN 24 - Ranglong bible

LUKIN 24

¹Arkhuana, Pathianni nikhua nupang ngai thana ase u, marim ahui ei sin u ha achoia.

²Than lung amakot taka ha ankhaia ava mu u.

³Hasik han asunga ava lut u na Puma Isua ruak va mu u mak.

⁴Anponkhapa havan anding u zei, anlaiseka mi anni puan a el ansila akola u na ahong anding u.

⁵Anchi sabaka anbok laka phila amok u nupang ngai han, hatuka mi ngai han, “Ichangamo athi bila adam nei en u?

⁶Hivan omlai mak, anthui zei. Galilia a om lai na kom u na imo ei ti mandon u ta:

⁷‘Miring Sapa mi salui ngai kuta anpen tia, Kros a tar unti, ninthum suale dama anthuiret inti,’ ”

⁸Hatuka ha nupang ngaiin achong ngai ariat u na,

⁹than ata akir u na a zolai somlei khat ngai kom ava ril u na hatuka atei ngai kom um aril u.

¹⁰Ha nupang ngai ha Mari Magdalini, Joanna le Mari Jakob a nu ha; amani le nupang atei ngaiin zolai ngai kom hava ngai rui aril u.

¹¹Tenchu zolai ngai han ha nupang ngai ei ti a omzia om mak ati u na iam u mak.

¹²Tenchu Pitor anthuia than tiang a tan; anbuna a ena puan anthep amu atei ite mu mak. In tiang a kir reta imo ei nin zei achangadong chunga ase.

¹³Hava nikhua len han Isua azi ngai Emmau khua na ase u Jerusalem ata kilomitar somleikhat ni inti.

¹⁴Rui atung dora ha aril tira achong u na.

¹⁵Achong u na aril u lai tak, Isua avan chela abil u na kal achoi,

¹⁶amu u tenchu mandang thei u mak

¹⁷Isuan amani kom ati, “I rui mo nei ril u na kal choi u na na?”

¹⁸Abil u na angkhatin a raming Kleopa han arakel, “Nang hi khual mo na ni Jerusalema, atuntaka rui asuak re mak che mo?” ati na.

¹⁹“I ang rui mo?” atia arakel: “Nazareta Isua tak chunga rui asuak.” atina amasanga. “Hava nai ha deari khat Pathianin le mipui doran ei pom ei tho dora le ei ril tak chunga.

²⁰Chaizung ulian ngai le ruaitu ngaiin athi ranga apek u na hatuka Kros a apek u.

²¹Nei iam chu ama ha Israel anzok ranga ha ni inti! Hanuk ret chu hava nikhua ata avian hi ninthum changna ani zei.

²²Koini na bila nupang ngaiin a na manlai u ansal le thana ase u na.

²³Aruak va mu u maka ahonga kir ret u na vanpalai na mu, vanpalaiin adam ret zei ati na ana ril ati u.

²⁴Koini bila senkhat ase u na thana nupang ngaiin ei ti u ang taka ava mu u, tenchu ama chu va mu u mak.”

²⁵Hatuka Isuan ati pe, “Itukmo nei mo u, dearin ei ti anga a iam ranga itukmo nei an nu u!

²⁶Messian hava ngai ei tiar zita nimak mo ama ei lianna na ei lut rang?”

²⁷Hatuka Isuan a manthei kiar Pathian chonga ama rui anziak Mosin ei maziak len ata aphuta deari ngaiin ei maziak dora ten.

²⁸Ei se u na rang khua asuak vit u le, Isua ala se sa rang anga a om;

²⁹tenchu a mathem u na, “Koini bila om ro, ani bui rang ani zei azing rang ani zei,” ati u na. Hasik han abil u na ava om.

³⁰Ansuta abil u na anek ranga, vaipol alaka raisanna aril, hatuka akhiaka a manlon.

³¹Hatuka amit u anlonga, a mandang thei u zei, tenchu anpei diai.

³²Amani le amani anti u na, “Lampuia ana chong puia moi ana kang phua mak mo ha Pathian chong ei na ril han?”

³³Anrapa anthui u na Jerusalem tiang ase u hava han a zolai somleikhat bila mi atei um anchun u.

³⁴“Puma hi anthui hi le! Simon a kom um anlang!” ati u.

³⁵Ha anni ngai han aril u lampuia imo ei ang, hatuka vaipol akhiak lai hontinmo Puma ei mandang thei u.

³⁶Ha anni ngaiin aril laitak anlaiseka Puma apum avan ding abil u na, hatuka amani rang, “Phukdaina nangni kom om rase,” ati.

³⁷Anlai u na raluai kukui mo nei mu ati u.

³⁸Tenchu, “Ichangmo nei anlai u? Ichangmo iam nokna na malung u na ei chui?

³⁹Ka kut ngai en uta, ka ke en uta, en uta ka ni tatak mo na ton u tan la, na re u na ti, asik chu raluaiin taksa le ru don mak koi nei na mu u anga,” ati pe.

⁴⁰Hava ei ti le a ke, a kut a manmu.

⁴¹La iam bang thei u maka araiasan rei u na a malung achei u na; a rakela, “Asak rua mo om?”

⁴²Nga ansuang sua apek u,

⁴³a laka amaton u na a sak.

⁴⁴“Hiva ngai rui hi na bil u na ka om lai kei ril; ka rui anziak dora Mosi Dana anziak dearin ei maziak ngai Sam bua anziak dora ei kip rang anang.”

⁴⁵Hatuka amalung u a malong pe Pathian chong ei riat u thei narang,

⁴⁶hatuka amani kom ati, “Hiva hi anziak; Messia chu antak tiar intia athi ata ninthum suale anthui inti.

⁴⁷Hatuka ama raminga ansirna rui le asia andualna rui anril inti, namtin kara, Jerusalem ata anphut inti.

⁴⁸Nangni hi hiva ngai amu na ni u.

⁴⁹Hatuka koi ka pumin ka Pa chongtin ha hong tir ka ti nangni na kom. Tenchu khopuia lei maruang u ro, chunga ranak ahong maseng nangni kom.”

⁵⁰Hatuka khopuia, Bethani khua suak raka aruaia, hava han akut alanga bor apek.

⁵¹Bor apek susung han akom u ata ankhaia vanram tiang ase.

⁵²Amok u na Jerusalema akir ret u raisanna bita.

⁵³A hun u dora amanga Pathian kom raisanna ril chunga Biakina a om u.