Read Ranglong LUKIN 3 Bible Online

LUKIN 3 - Ranglong bible

LUKIN 3

¹Reng Tiberi a reng chang kum somleiranga kuma Pontia Pilat ha Juda rama reng ani na. Herod ha Galili ram aruai a parual Philip ha Itura le Trakonitia Lusania ha Abilen rama reng ani na.

²Hatuka Ana le Kaiapha ha chaizung ulian. Havalai tak han Johon Zakaria a nai kom Pathian chong atunga Philchar rama.

³Hasik han Johon han Jordon kila rama asena, “Asiat ata ansir u ta ro baptisma la u ro, Pathianin na madual unti.”

⁴Deari Isai lekhana ei anziak anga: “Mi khat philchar rama ankhek; ‘Puma lampui lei ansin rase; a kal choina rang lampui lei anzik rase!

⁵Ankhuar dora bit rase, tang le mual dora anzol rase; Lam akoi dora anzik inti, hatuka lampui anthap annil inti.

⁶Hatuka mi doran Pathian sandamna mu unti,’ ” ati.

⁷Johon a kom baptisma alak ranga mipui ahonga. “Nangni marul chi ngai tumo Pathian taksit ata a zok thei ranga ana ril u?

⁸Asia ata ansir zei ti khopa sin tho ro. Abraham akhuk ke na ni ti u chachak no ro. Keina ril u ni zei Pathianin hiva lung ngai hi Abraham achi ngai ang aman chang thei.

⁹Thing arazung len ata aphur ranga rei a om; thing mara sa manra lui chu tuka moia anpei inti.”

¹⁰Mipuiin a rakela, “Imo tho mani hanle?” ati u.

¹¹A masanga, “Kultai anni donin chu donlui rang angkhat pe rase, hatuka nek rang a donin chu a don nok sem rase.”

¹²Lei ansuang senkhat baptisma lak rang ahong u na, arakel u, “Minchupu imo nei tho rang?”

¹³“Ei ni tuk neka aliak rasuang u no ro,” ati pe.

¹⁴Sipai senkhatin um arakel reta, “Koini le imo nei tho rang?” ati u na. “Tute kom therkhaka sum la u no ro, masial abui sinsak u no ro. Nei lo u tuka malung ateia om u ro.”

¹⁵Mipui iamna ansang riama, Johon hi kukui mo Krista atia andon u.

¹⁶Hasik han Johonin amani kom ati na, “Koi chu ti le baptisma ka na pek u na. Mi khat ka neka alian hong inti. Koi chu a kekok akhek rua ngal ni makung. Aman Ratha Anthiang le moi le baptisma na pe unti,

¹⁷A kuta a epna a dona, arang ata azena ahum dora asapanga athuanga, asarasi dora chu thanglui moia hal inti.”

¹⁸Zephung a tampa le Johonin thangahui arila a malung lampui u athul ranga a mathem.

¹⁹Hatuka Johonin Herod a ngona, Herodi a upa nungak ei lak sika le asia tampa ei tho sika.

²⁰Johon lungina a thuanga Herod ei sia a man se sa na.

²¹Mi dora baptisma a lak suale, Isuan baptisma alak, bor a zong lai tak vanram a lei anlong,

²²Taksa neia vasu anga Ratha Anthiang a honga chum. Hatuka anvan ata he honga suaka, “Nang hi ka nai madit na chunga ka rai asan,” ati.

²³Isua sin ei phut han kum somanthum ei ni. Mi riata chu Joseph a naipasal, Joseph Heli naipasal.

²⁴Heli Mathat naipasal, Mathat Levi naipasal, Levi Melki naipasal, Melki Janai naipasal, Janai Joseph naipasal,

²⁵Joseph Mattathia naipasal, Mattathia Amos naipasal, Amos Nahum naipasal, Nahum Esli naipasal, Esli Nagai naipasal,

²⁶Nagai Maat naipasal, Maat Mattathia naipasal, Mattathia Semin naipasal, Semin Josek naipasal, Josek Joda naipasal,

²⁷Joda Joanan naipasal, Joanan Resha naipasal, Resha Zerubabel naipasal, Zerubabel Shealtiel naipasal, Shealtiel Neri naipasal,

²⁸Neri Melki naipasal, Melki Adi naipasal, Adi Kosam naipasal, Kosam Elmadam naipasal, Elmadam Er naipasal,

²⁹Er Josua naipasal, Josua Eliezar naipasal, Eliezar Jorim naipasal, Jorim Matthat naipasal, Matthat Levi naipasal,

³⁰Levi Simeon naipasal, Simeon Juda naipasal, Juda Joseph naipasal, Joseph Jonam naipasal, Jonam Eliakim naipasal,

³¹Eliakim Melea naipasal, Melea Mona naipasal, Mona Matatha naipasal, Matatha Nathan naipasal, Nathan David naipasal,

³²David Jese naipasal, Jese Obed naipasal, Obed Boaz naipasal, Boaz Solomon naipasal, Solomon Nashon naipasal,

³³Nashon Aminadab naipasal, Aminadab Admin naipasal, Admin Arni naipasal, Arni Hezron naipasal, Hezron Perez naipasal, Perez Juda naipasal,

³⁴Juda Jakob naipasal, Jakob Isak naipasal, Isak Abraham naipasal, Abraham Tera naipasal, Tera Nahor naipasal,

³⁵Nahor Serug naipasal, Serug Reu naipasal, Reu Peleg naipasal, Peleg Eber naipasal, Eber Shela naipasal,

³⁶Shela Kenan naipasal, Kenan Arphaksad naipasal, Arphaksad Shem naipasal, Shem Nova naipasal, Nova Lamek naipasal,

³⁷Lamek Mathusel naipasal, Mathusel Enok naipasal, Enok Jered naipasal, Jered Mahalel naipasal, Mahalel Kenan naipasal,

³⁸Kenan Enos naipasal, Enos Seth naipasal, Seth Adam naipasal, Adam Pathian naipasal ani na.