Read Ranglong LUKIN 4 Bible Online

LUKIN 4 - Ranglong bible

LUKIN 4

¹Isua, Jordon ata Ratha Anthiang abita Ratha ruaia philchar tiang a kira,

²hava han ni sommanli Diabolin amathema. Ite salui sika achan avon ancham.

³Diabolin ati pe na, “Pathian Naipasal na ni ten lung ngai hi bu man chang ro ba.”

⁴Tenchu Isuan a masanga, “Pathian chonga anziak ke, ‘Miring hi bu le rong khop mak.’ ”

⁵Hatuka Diabolin aruai a ramual aman mu na.

⁶Hatuka Diabolin, “Hiva ngai dora na pe ka ting, ka koma anpek sua thotheina dora le nei dora na pe ka ting, asik chu kei zot tak ka pek thei.

⁷Na mok ro na ta ni kiar inti,” atipe.

⁸Isuan a masanga, “Anziak a om, ‘Na Puma na Pathian rong amok tan ama sin tho ro ti anziak,’ ” ati pe na.

⁹Hatuka Diabol han Jerusalem Biakin ansang khita ava kal pui a ati pe na, “Pathian Naipasal na ni ten hivan ata antom ro,

¹⁰Anziak a om, ‘Nang ana rung rang a vanpalai hong tir inti a,

¹¹lungin na manna no ni a kut le na madom unti tina anziak.’ ”

¹²Tenchu Isuan, “Anziak a om, ‘Na Puma Pathian mansin no ro ti anziaka,’ ” ati pe na.

¹³Anthemna tina amathem suale Diabolin chomokhat ranga amak tot.

¹⁴Isua, Galili rama akir reta Ratha Anthiang sinthotheina dona. Hava tang han arui antheka.

¹⁵Ankhomna ina a manchuna min a manpak.

¹⁶Hatuka Isua Nazareta ase reta rati ei tungna rama, Sabat nikhua hava mana anga Sinagogue asena. Pathian chong a en rang andinga,

¹⁷Deari Isai lekha apek u na lekha anzual a phonga hiva chong amu,

¹⁸“Pathian Ratha ka kom a om, Asik chu anriang ngai koma thangahui aril ranga ei na thang. Aman ankhit ngai na zok thei zei ati ranga acho ngai mit avar zei. Mi pengsom ngai azok zei.

¹⁹Puman anniang ngai ei mazok na hun atung zei,” ti aril.

²⁰Isuan ha lekhanzual ha azual reta, a manlona ansut. Sinagogue a ahong dora mit ama tiang anhoi,

²¹Hatuka ati pe na, “Hivana chong hi avian atung zei anril nei riat u anga.”

²²Alom u na ama a manpak u na a chong suak chongin aboi a mandong u na, “Hiva hi Joseph a naipasal nimak mo?” ati u na.

²³Hatuka ati pe na, “Kan iam hiva hi na ti u na ti, ‘Daktor, na ninga andam ro,’ Kapernaum a nei tho anga hivan um tho ro na ti u na ti.”

²⁴Isuan kei ti tatak ani, “Deari ngai khuan pham mak.”

²⁵“Rangai u ro, Eliza damlai a rong atampa ei om Israela hava lai han kum anthum atan rua hong maka maitam anrik sabak aram sunga achul.

²⁶Tenchu Eliza ha tute kom antir maka tenchu arong khat Zarephat khuana Sidon rama ase.

²⁷Hatuka hava lai han vun rikhua antam sabak Israel rama Eliza damlai; tenchu angkhat ngal dam maka, tenchu Naman Suria rong ha adam.”

²⁸Sinagogue a om ngaiin ariat u na achan atak asi u

²⁹Anthui u na Isua khopui panga arasua u na tangsipa aruai u na akhopui u ei ansinna na. Nimkei sabaka ansul rang ati u na.

³⁰tenchu mipui malaia kal a choia ase viak.

³¹Isua, Kapernaum khua Galili rama asena, sabat nikhua mipui ei manchuna.

³²Mi ngai aboi adong u na, asik chu racham anei anga achong.

³³Sinagogue mi khat ratha sia don a oma; anringpa ankheka.

³⁴“Koini imo nei na nang na, Nazareta Isua? Hivana nei om hi koini anan siat ranga mo? Nang hi ka na riat; nang hi Pathian palai anthiang na ni.”

³⁵Isuan ha ratha ha chong apeka, “Dairek ro ha mi asung ata hong suak ro,” ati na. Ha ratha sia han mipui matona adeng raka a suaka ase ite chu manna mak.

³⁶Mipui boidongin anti u na: “Hiva ngai hi i ang chong mo? Thotheina le racham le ratha sia a rakoka ahonga suak” ati u na.

³⁷Hatuka Isua rui ha hava ram tang antheka.

³⁸Isuan Sinagogue a maka Simon a ina ase. Simon a tarpi ha ana sabaka, Isua kom hava rui ha aril u.

³⁹A kola avan ding ha raitun rang mathan ro ati na. Raitunin amaka chomokhata anthui lena amani rang haso adom pe na.

⁴⁰Ani lut suale ana dora ahong tuang u na, Isuan a kut a dapa a mandam kiar.

⁴¹Mi tampa sungatam ni rase raluai a rakoka, “Nang hi Pathian Naipasal,” ankhek chunga ati. Isuan ha raluai ngai kom chonglui ranga ati na, asik chu ama ha Messia tina ei riat u.

⁴²Khua ei var le Isua hava khopui a maka philchar rama ase. Mipui han a roka, amani ei mak nokna ranga asur tit rang azot u na.

⁴³“Tenchu Pathian ram ruia thangahui khopui ateiam aril ka nang, asik chu hake kei tho ranga Pathianin ei na tir,” ati na.

⁴⁴Hasik han Galili rama Sinagogue tang chong aril.