Read Ranglong LUKIN 6 Bible Online

LUKIN 6 - Ranglong bible

LUKIN 6

¹Isua ha sabat nikhua bu bila kal a choia. A zolai ngaiin bu arut u na akheta asak u.

²Pharisi senkhatin ati u na, “Ichangmo hantin koini danin sabat nikhua ei tho nok rua nei tho u?”

³Isuan amasanga, “La en u mak che mo David le alom ngaiin ancham u na imo ei tho u?

⁴Pathian ina aluta, Pathian vaipol alaka u asak u hanuk alom ngai apek.Hava ha koini dan nimak chaizung rong keng asak thei.”

⁵Isuan hintin hin a khara: “Miring Sapa hi Sabat Puma,” ati na.

⁶Sabat khat reta Isua Sinagogue a asena mi a manchu. Mi khat akut changtiang athi a oma.

⁷Dan minchu ngai le Pharisi ngaiin achan aveng u na Isuan Sabat nikhua a mandam mo asia na tho ei ti u na rang.

⁸Tenchu Isuan a malung vong u ariata, “Anthui tan matona hong ro,” ati na. Hava mi ha anthuia anding.

⁹Hatuka Isuan amani kom ati pe na arakel u: “Imo koini na danin Sabat nikhuana nei tho rang ei phal? Mi san mo min siat mo? Mi andam mo mi athat mo?”

¹⁰Anhoi tuaia a en kiara, hava mi kom ati na, “Na kut hong son ro,” A son a, hatuka akut adam ret.

¹¹Atakasi sabak u na anril u na imo Isua rang alot thei u.

¹²Havalai tak han Isua muala ava kala bor azong ranga, zan khat pei Pathian kom bor azong ranga.

¹³Khua hong avar le a zolai ngai a pai somleianni athang hava ngai ha zolai atina aphua.

¹⁴Simon, aman Pitor atina ei phua ha, hanuk a naipa Andria, Jakob le Johon, Philip le Bartholomai.

¹⁵Mathai le Thoma, Jakob Alphai naipasal hanuk Simon min Zelot ei ti u ha.

¹⁶Juda Jakob a naipasal hatuka Juda Iskariot, Isua ansurpu.

¹⁷Isua a zolai ngai le mual ata ahonga chuma, anzol nana andinga a zolai tampa le Tura khopui tanga mi tampa ahonga.

¹⁸Achong anngai le arikhua u ata adam ranga ahong u. Ratha sian ei sur ngai um ahong u na adam u.

¹⁹Mi doran aton rang atina atak chung ata ranak asuaka min damna man chachak.

²⁰Isuan a zolai ngai a ena ei ti: “Borsang atung ngai chu anriang ngai asik chu Pathian ram chu ata u!

²¹“Borsang atung ngai chu atuna ancham ngai; asik chu la khop unti! Borsang atung chu atuna achap ngai lanni u na ti!

²²“Borsang atung ngai chu min ei mumak ei heng, asiat ei ril, asia na ni ei ti Miring Sapa sika.

²³Havantin ani tik na rai man san ro lam ro. Asik chu anvana na rang ratpak atampa a om zei. Asik chu a chipui u ngai han hantin den deari ngai tak chung ei tho u.

²⁴“Tenchu atuna nangni a nei ngai khomak atung ke na ni u.Asik chu a hui a hekna ngai na mansua u zei.

²⁵“Akhop ngai chu khomak atung ke na ni u; lancham u na ti. Atuna anni ngai chu; la chap u na ti!

²⁶“Min ana manpak ten khomak atung ke na ni u; havantin den han achipui u ngai deari rathol ngai chunga ei tho u.

²⁷“Ka he anngai ngai kei na ril u ani zei; anadui lungkham mu u ro, anan mumak ngai ranga asa tho u ro.

²⁸Khomak anasam ngai bor pe u ro, anan sinsak ngai borzong pe u ro.

²⁹Min na maikhang a ben ten atei tiang do ret ro; min na puan alum alak ten na kultai um pe ro.

³⁰Ana zong ang pe ro, hatuka nei don min alak tik, zong ret no ro.

³¹Na ranga tho rase nei ti anga mi rang tho ro.

³²“Anandit ngai rong na dit u ten, hontinmo borsang nei man u rang? Mi salui ngaiin um andit ngai chu adit u.

³³Asa ana tho ngai tak chunga rong asa na thon, hontinmo borsang nei man u rang? Mi salui ngaiin um hava ha atho u!

³⁴Ana thuan thei ngai rong apuk na pek u ten, hontinmo borsang nei man u rang? Mi saluin mi salui ngai kom um apuk apek u, aman ret ranga.

³⁵He e! Na raldui adit u ro asa tho u ro; apuk pe u ro ite aman ret ranga an iam u no ro. Ratpak atampa man u na tia, Pathian Ansangkhit nai ni u na ti. Asik chu ama chu mi salui ngai ranga asa.

³⁶Lungkham don u ro na Pa u lungkham don anga.

³⁷“Mi siat ril u no ro, Pathianin um na siat ril u no ni, mi dem u no ro, Pathianin um na dem u no ni, mi madual u ro Pathianin um na madual unti.

³⁸Mi rang pe u ro, Pathianin na pe unti, Nei pek u ang taka na pe unti.Anmai adik taka na ke tora hong luang inti. Asik chu nei maina den le maia na pe inti.”

³⁹Isuan hiva ankhina aril pe: “Acho khatin acho maruai thei mak; a maruai ten anin u khura chul unti.

⁴⁰Lekha anchu ngai anchupu ranga lian ngai mak, tenchu lekha anchu ngai dora ei anchu asua u le anchupu u anga ni inti.

⁴¹“Na parual amit ranok na ena, nang na mita thing aluang en luia?

⁴²Hontinmo na parual a mita ranok kel rong nei ti, nang na mita thing a luang mu luia? Nangni Pathian adui ngai! Na mit ranok kel bak u tanla mi mita ranok asadima muna kel thei u na ti.

⁴³“A kung asan mara sia manra ngai mak, hanuk thingkung saluiin a mara sa manra ngai mak.

⁴⁴A mara ata thing ariat asa. Raling kar ata theipui kham mak che.Raling rang ata gerep ankham ngai mak.

⁴⁵Mi san a malung sung ata asa rasuana. Mi saluiin a malung sung ata asia rasuana. A malunga om tak a murin ati.

⁴⁶“Ichangmo, ‘Puma, Puma,’ tia nei na pai u tenchu tho ro kei ti nei tho u nok?

⁴⁷Mi ka koma honga ka he a rangaia atel ten: I ang mo ei ni na manmu u ka ti.

⁴⁸Ama chu mi lung chunga in a sin chopui anthuka a khuara a phun ang ei ni. Ti a honga liana ha in ha ahong suka tenchu sing mansa maka, asik chu asadima ansin ei ni sik.

⁴⁹Tenchu ka he riata tel lui chu chokhur abuia in a sin ang, ti honga liana ha in ahong suka anlaiseka achim, achalaka asiat,” ati.