Read Ranglong LUKIN 8 Bible Online

LUKIN 8 - Ranglong bible

LUKIN 8

¹Hanuk chu Isua khopuia, khua ena kal achoia thangahui Pathian ram rui arila. A zolai somleianni ngaiin azi,

²hatuka nupang senkhat ratha sia, rikhua ata adam ngaiin ava zi u: Hanuk Mari (Magdalini anti ha) ratha sia sari ei suak na ha;

³Joanna, aruathar Chuza ha Herod a ruirilna na ulian; hanuk Susana le nupang rualin Isua le a zolai ngai ranga asanna lampui a rasua u.

⁴Khopui tin ata Isua kom ahong tira; hatuka mipui anchuna, Isuan hiva ankhina aril.

⁵“Voikhat chu mikhatin chi athek. Chi atheka lampuia achul min athina va ngai in arut,

⁶senkhat chu lung bila achula ahonga monga tenchu phil asa abui sika achara.

⁷Senkhat chu raling kara achula raling le lokona mong ei ni sika ralingin adip khapa.

⁸Hatuka asen phil asana achula ahonga monga anra, raza zel anra!” Hatuka Isuan, rangai u ro, “Kuar a donin re rase!” ati na a manmong.

⁹A zolai ngaiin itinamo atina arakel u,

¹⁰hatuka amasang, “Pathian Ram rui anthup hi nangni kom chu anril zei a, tenchu atei kom chu ankhinana le ankhina, en untia mu u no ni, rangai untia re u no ni.

¹¹“Hiva hi ha ankhinan ei derdin; chi ha Pathian chong,

¹²lampuia chi chul ngai ha chong anngai ngai; tenchu soitan ahonga ei iam u nok narang le sandam ei ni u nokna ranga amalung u ata akhai pe.

¹³Ha lung chunga chul ngai ha raisan taka Pathian chong apom ngai, tenchu ei lut anthuk maka; chomokhat ranga a iam u na ansinna hongle akiak.

¹⁴Raling kara chi chul ngai ha Pathian chong anngai ngai; tenchu andonna, neina, huina heknan, apola hava ngai han apei kiar, amara min ngai mak.

¹⁵Phil asana achul ngai chu, chong anngai a asadima atela a malung sunga asiak ngai mara tam anra ngai.

¹⁶“Tuten lem bela kok le makhu maka, mun thuaiam siak ngai maka tenchu lemchuangna na asiaka, ahong doran ra-ang ei muthei narang.

¹⁷“Anlang lui rang ite ankhum om mak, anriat lui rang ite ankhum mak.

¹⁸“Hasik han andon u ro hontinmo nei rangai u, asik chu adon ha pesa inti hatuka donlui ha ka don ei ti ngal ha a pot inti.”

¹⁹Isua a nu le a parual ngai ahong u na tenchu ei anmu pui thei u nok asik chu mipui ei tam sika.

²⁰Senkhatin Isua kom atina, “Na nu na parual ngai tual panga anding ana mu rang a zot u.”

²¹Isuan amasanga, “Ka nu ka parual ngai chu Pathian chong anngai a atel ngai,” ati.

²²Nikhat chu Isua a zolai ngai le rakuanga a chuang u na ati pe, “Tho sontiang ral se u rei.” hatuka ase u.

²³Anvei u laitak Isua a in. Anlaiseka phaivua ahonga rakuang ha ti aluta antak asuak u.

²⁴A zolai ngaiin Isua kom asena, ava mathui u, “Puma, Puma! athi rang na ni zei avati u!” Isuan thinthi phaivua a ngona abang hatuka khua honga hui.

²⁵Hatuka a zolai ngai kom ati, “Homo nei iam u na?” Tenchu achi u na amani le amani anti u na, “Hiva mi hi tumo?” Thinthi le tinsok angona a he tel.

²⁶Isua le a zolai ngai Galili ram radina Gadara ram chu ava suak u.

²⁷Phil ei va thin le hava khopuia mi khat antong pui a, ama ha raluaiin ei sur. Asotpa ani zei puan abuia ei om hanuk ina om lui a thana ava om chachak.

²⁸Isua a muna ankheka a ke kola anboka hen ring sabaka, “Isua, Pathian Ansang khit Sapa! Koi hi i rang mo nei na nang? Keina mok ani zei na sinsak no ro!”

²⁹Hiva ei ti na asik chu Isuan asunga raluai ha suak ro ei ti sika. Raluaiin ei sur babang ei ni, a ke a kut zingzir le ankhitam ni rase a sata, raluiaiin philchar tiang atir chachak.

³⁰Isuan a rakela, “Imo na raming?” “Ka raming chu ‘Sipai ngai,’ ” ati na asik chu raluai atampa alut ei ni sika.

³¹Raluai ngaiin Isua kom, “Khura thuai hek luina” muna na man se no ro, ati na a zong u.

³²Hava kol tanga han vok rual sak asaka, raluai ngaiin Isua kom vok ngai sunga na man lut ro ati na azong u, hatuka atho.

³³Hava mi a sung ata asuaka vok sunga aluta, hava ankai ata vok dora tindila ava chula anning u.

³⁴Ha vok arung ngaiin imo ei ni dora amu kiar u, hasik han atana khopui sunga, phaia ava ril tir u.

³⁵Imo ei ni a en rang mipui ase na, hatuka, Isua ava mu u na ake kola ha raluai ei suakna mi puan ansila malung a dik anput ava mu u, hatuka achi u.

³⁶Amu ngai doran mi kom hontinmo ei dam aril u.

³⁷Hava itanga mi ngai doran Isua ha ankhai ro atina amathem u, asik chu achan ei achi u sika, hatuka Isua rakuanga a chuanga amak.

³⁸Raluaiin ei mak han Isua rang, “Na bila hong ka ting,” ati na. Tenchu Isuan hintin hin ati na a man se.

³⁹“Na ina se tan Pathianin na rang imo ei tho va ril ro.”

⁴⁰Isua tindil va ral ava suaka mipuiin alei pham, asik chu ei lei maruang u sik.

⁴¹Mi angkhat Zaira ahonga: Sinagogue a ulian, Isua ke na anboka a ina se rang amathem,

⁴²asik chu a sanu don selep kum somleianni mi ha athi ranga. Hatuka Isua anpheta tenchu mipuiin ahual sabaka.

⁴³Hava bila nupang khat kum somleianni thin ei ahuat a oma, ei don dora daktora amang zei, tenchu tute andam thei om mak.

⁴⁴Mipui bila Isua nuk tiang ahonga apuan mer aton, hatuka anlaiseka ankhar.

⁴⁵Isuan a rakela, “Tumo anaton?” Mi doran ni makung ati na, tenchu Pitorin, “Puma, mipuiin ei na ep nimak mo,” ati.

⁴⁶Tenchu Isuan, “Tulekmo ana ton a om, asik chu ranak ka kom ata asuak.”

⁴⁷Ha nupang ha ana riat u zei ti ariata annoka Isua ke kola ahong anbok. Havan mipui dora matona, imo asik ei ton, hontinmo anlaiseka ei dam aril.

⁴⁸Isuan a kom ati pe, “Ka nainupang, nei iamnan ana mandam zei. Phukdaia se ro,” ati pe.

⁴⁹Hava ati lai tak palai khat Sinagogue a ulian a in ata ahonga. “Na nainupang athi zei,” atia Zaira aril; “Puma pol lai no ro,” ati na.

⁵⁰Tenchu Isuan ariata, Zaira kom ei ti, “Achi no ro; iam mai ro, dam inti.”

⁵¹Hatuka in ava suak le tute abila alut ranga zot maka Pitor, Johon, Jakob hanuk a nu le a pa rong a man lut.

⁵²Hava han mi dora achap annuk naite sika. Isuan ei ti, “Chap u no ro, naite ha athi nimak a in keng!”

⁵³Mi doran amani asik chu athi ti ei riat u sika.

⁵⁴Isuan akut asura a pai, “Anthui ro, ka nai atina!”

⁵⁵A ratha honga kira anlaiseka anthui hatuka Isuan hongte mo man sa u ro, ati.

⁵⁶A inko ngai aboi adong u na, tenchu Isuan imo ei ni tute manthei no ro ati pe.