Read Ranglong LUKIN 9 Bible Online

LUKIN 9 - Ranglong bible

LUKIN 9

¹Isuan a zolai ngai a paia ranak le thotheina raluai anot theina rikhua andam theina ningneina a peka.

²Hanuk Pathian Ram rui ava rila mi andam thei ranga atir.

³Amani kom ati suana, “Hiva nei se u na hin ite choi u no ro; kalchoi sunrol, kutado marsa, nek rang, sum, hanuk kultai aliak ngal.

⁴Ana leia pham u tak ina om u ro khopui na mak maseng;

⁵Na lei pham u lui chu akhopui ma u ro, na ke rabang akhong u ro, nei man riatna ani u zei.”

⁶Hatuka khua arul tira ase u thangahui arila muntina mi a mandam u.

⁷Herod, Galili ram aruai han ariata achan anpon, asik chu Johon baptispu adam ret zei ei ti u.

⁸Senkhatin Eliza hong anlang ret zei ati na, ten senkhat retin tianlai a deari honga kir ret ke ati u na.

⁹Herod han, “Johon chu alu ka man tan hale; tenchu tumo hiva arui kei riat hi!” Hatuka Isua mu rang a put banga.

¹⁰A zolai ngai ahonga kira Isua kom ei tho u dora ahong ril kiar u. A bila aruaia Bethsaida khopuia ase u.

¹¹Mipuiin ariata ava zi u. A lei phama Pathian Ram rui arila ana ngai amandam.

¹²Ani lut rang vita a zolai ngai a honga, “Hiva mipui ngai hi man se ta ro, khuana phaia anek rang le a omna rang ei va manthei u na rang asik chu hiva mun hi philchar ram ke.”

¹³Tenchu Isuan, “Nangni lenin asak rang pe u ro ba,” ati na. “Aloma nei don hi vaipol ranga, nga anni. Hiva mipui dora ranga asak rang va racho rase mo nei na ti?” ati u.

¹⁴Hava han pasal asang ranga ni inti. Isuan a zolai ngai rang, “Somranga somranga senga antanga mansut u ro,” ati pe.

¹⁵Hantin han atho sua u le,

¹⁶Isuan vaipol ranga nga anni alaka anvan tiang atanga Pathian kom raisanna a mantunga akhiaka asem ranga a manlon.

¹⁷Alom u na akhopa asak u, hatuka a zolai ngaiin achul anpei kok somleianni arut u.

¹⁸Nikhat chu Isua atheia borazong, a zolai ngai ahong u na alei rakel, “Mipuiin tumo koi ei na ti?” ati na.

¹⁹“Asenin nang hi Johon Baptispu na ni,” “Asenin nang hi Eliza, atei retin tianlaia deari honga kir ret,” ati u.

²⁰Hanle, “Nangni le?” atia a rakel, “Tumo nei na ti u?” Pitorin amasanga, “Nang hi, Pathian Krista ke na ni,” ati na.

²¹Isuan tute ril u no ro ati na aril.

²²“Miring Sapa hi ei teng rang atampa a om upa le chaizung le Lekhanziak ngaiin la heng unti, la that untia tenchu ninthum suale dam ret inti.”

²³Hatuka Isuan, “Ka bila a hong zot tak aninga anngila anikhua Kros anputa na zi rase.

²⁴Asik chu, dam rong ati tak chu machan inti, tenchu ka sika anchan tak chu man inti.

²⁵Min ramual pumpui a ta manchang zit sela, tenchu aninga ei damna a machanin imo ei nemna?

²⁶Koi le kei na manchu u ngai nan zak pui uten; Miring Sapa nin um nan zak pui unti, ei lianna le Pa ei lianna le vanpalai anthiang ngai le a hongtik.

²⁷Kei ti ni zei, hiva hin senkhat a om Pathian Ram amu maseng thi no ni.”

²⁸Hava ngai ati sua ni sari suale, Isuan Pitor, Johon, Jakob aruaia mual khata bor azong ranga ase.

²⁹Bor azong laitak amel ahong anthula apuan sil um ahonga var.

³⁰Anlaiseka mi anni a bila ahonga oma amani ha Mosi le Eliza.

³¹Vanram lianna le hong anlanga Isua le chong, Pathian derdin ei tung rang Jerusalem a ati na.

³²Pitor le alom ngai achan aleia in u tenchu anthui u na Isua lianna amu u na abila mi anni anding amu u.

³³Ha mi ngaiin amak u le Pitorin ati na, “Puma, hivana nei om hi itukmo ei sa! Thambuk anthum sin inti angkhat nang na rang, angkhat Mosi rang, angkhat Eliza rang,” imo ei ti ha ei riat sadim nimak.

³⁴A chong laitak han ansumin ahong makhuna aralim le; a zolai ngaiin achi u na ansumin ei hong makhu han.

³⁵Ansum ata chong asuka, “Hiva hi ka nai, kei a thang ha ama he rangai u ro!”

³⁶Ha chong ei mong le Isua ha atheia a om. A zolai ngai hava ruia adairek u na tute ril u mak.

³⁷Hanuk nikhua Isua le a zolai anthum mual ata achum u na mipuiin Isua lei antong pui.

³⁸Mipui bil ata mi khat ankheka, “Puma! Kei na mathem, ka nai na en pe ta ka nai don selep!

³⁹Anlaiseka ratha sian ei tho hatuka anmoia acher huan asuaka asinsak sabaka amak chachak.

⁴⁰Na zolai ngai ka mathema andam ranga tenchu tho thei u mak.”

⁴¹Isuan a masanga, “O nangni iamna bui ngai, ei phua bui ngai! Ituk asot ngal mo na bil u na kei om rang? Ituk tena mo keina asa thei u rang?” Hatuka hava mi rang ati na, “Na naipasal hin hong tuang ro.”

⁴²Hatuka a hong lai tak ratha sian ha naipang ha phila a makhiaka aman moi Isuan ratha sia ha angona ha naipang ha a mandam suale apa kom apek ret.

⁴³Pathian thotheina lianpa mipuiin a muna aboi adong sabak u. Mipui han Isua ei tho ngai rui ala ril bang u na, hatuka a zolai ngai kom ei ti,

⁴⁴“Kei na ril u rang hi mangil u ta ni! Miring Sapa hi miring kuta anpe inti.”

⁴⁵Tenchu a zolai ngaiin itinamo re u mak. Akom u na anthup ei ni sika rethei u mak, hatuka itinamo ankel rang achi u.

⁴⁶Ankhalna khat zolai ngai kara asuaka tumo amani bila aliankhit.

⁴⁷Isuan imo ei mandon u ha ariat. Naipangte alaka akola a manding,

⁴⁸hatuka ati pe, “Hiva naipang ka raminga apham tak chu koi anapham; hatuka koi anapham tak chu, ana hong anthuanpu pham ei ni. Asik chu nangni bila asinkhit tak aliankhit.”

⁴⁹Johon achonga, “Puma mikhat nei mu na raminga raluai anot, hatuka tho lai no ro nei ti asik chu koini na bila nimak.”

⁵⁰“A khar ranga ti u no ro,” ati pena a zolai ngai dora rang um, “asik chu, na dui lui chu na tianga ke.”

⁵¹Isua, Vanrama ei anruai rang ahonga nai a ansina Jerusalem tiang a pan ranga.

⁵²A maton tira palai atira, Samari kho khata ava luta hoongmo alei va zek ranga.

⁵³Tenchu havana mipui ngaiin lei zot u mak, hava han anthiang phat Jerusalema rang ati na.

⁵⁴Jakob le Johonin amu na, “Puma amanin siat ranga anvan ata moi masul mani mo?” ati u.

⁵⁵Anhoia ango,

⁵⁶Hatuka Isua le a zolai ngai khua ateia ase u.

⁵⁷Hantin han ase tir u lai tak mi khatin Isua rang, “Nei se na tak na zi ka ti,” ati na.

⁵⁸Isuan, “Sial ngaiin kua adon va ngaiin rabu don tenchu Miring Sapan lu re na don mak,” ati.

⁵⁹Hanuk mikhat kom ati reta, “Na zi ro.” Tenchu, “Puma se baka ka pa va phum bak di rong,” ati.

⁶⁰Isuan amasanga, “Athi chu athi ngaiin phum rase, nang chu se tan la, Pathian Ram rui va ril ro.” ati.

⁶¹Atei khatin ati reta, “Na zi ka ti Puma, tenchu se baka ka inko ngai va mathan bak di rong.”

⁶²Isuan ama rang a masanga, “Phai anrit ranga machuma nuk anhoi chu Pathian Ram alua thei rang nimak.”