Read Ranglong JOHONIN 1 Bible Online

JOHONIN 1 - Ranglong bible

JOHONIN 1

¹Aphuta chong a om, chong chu Pathian koma om. Hatuka chong ha Pathian.

²Hava ha anphuta Pathian kom a om.

³Alompeia aman ei sin zit. Alompeia aman ei sin nok ite om mak.

⁴Ama koma han damna a oma, hava damna ha mitin ranga ra-ang ei ni.

⁵Hatuka hava ra-ang ha azing kara ahong ela, tenchu azingin lei riat mak.

⁶Pathianin ei hong tir mi khat a oma, a raming chu Johon.

⁷Ra-ang rui ahong anriat ranga ama chu anriatpu anga ahong ei ni. Ama zara mi doran ei iam theina ranga.

⁸Ama chu ra-ang nimaka, tenchu ra-ang rui ahong anriat rang ngala ahong keng.

⁹Ra-ang tatak mitin a el chachak ha a oma, Ramuala ei lei hong lai tak ania.

¹⁰Ama chu ramuala ei om, ramual hi aman, ei sin anina tenchu ramualin lei riat lai mak.

¹¹Ama a ningneina le ahonga tenchu ama ami ngai lele han lei pom u mak.

¹²Hanum nisela, ama aleia pom dora ranga le ama raming aleia iam ngai ranga Pathian nai ni theina a pek.

¹³Hava mi ngai chu thisen atam nimak, taksa ei zotam nimak, miring ei zotam nimak tenchu Pathian ata asuak ngal keng.

¹⁴Hatuka hava chong ha taksa ahong anchanga, koini bila ahonga oma, Pa han Naipasal ei nei selep ei lian pui anga ama ei lian chu nei mu. Ama chu lungkham le ataka abit ani.

¹⁵Johonin ama rui tak ha ahong manriata hatuka ankheka, “Arui keina ril u ha ama hi ani zei, ‘Ka nuka ahong han ei na khel keng, ama chu ka mana aleia omsa ei ni sika,’ ” ati na.

¹⁶Koinin ama ei bitna ata alompeia nei man, lungkham chunga lungkhamna nei chang.

¹⁷Dan rui chu Mosi kom ei pek, lungkhamna le atak chu Isua Krista zara ahonga tung ei ni.

¹⁸Tenchu Pathian hi tuten amu la om ngai maka, A Pa ketora a om, Naipasal selep han keng ama rui ahonga ril.

¹⁹Hatuka Juda ngaiin, “Tumo na ni?” atia; Jerusalem ata chaizung le Levi chi na mi ngaiin ama ankel ranga mi atir u na. Hatuka Johonin hiva chong hi a lei manriata.

²⁰Hankeng aman, “Krista ni makung,” atina ip thak luia a puanga.

²¹“Hanle tu ngal mo na ni?” atina arakel u na. “Eliza mo na ni?” ati u na. Aman, “Ni makung,” ati na. “Hanle deari mo na ni?” atia arakel ret u na.Aman, “Ni makung,” ati na a masanga.

²²“Hanle tumo nei ni?” ati u na. “Mi ana honga tir ngai koma nei va masang thei na ranga nang na ruia hin imo nei anti na ril ro,” ati u na.

²³Hatuka aman, “Koi hi philchar rama ankheka apuangpu ka ni zei: Deari Isaiin ei ti anga, ‘Puma alampui chu mandin u ro! kei ti,’ ” atina.

²⁴Ei tir u ngai ha Pharisi ngai bila mi ani u na.

²⁵Hatuka akoma, “Krista le nimak che na, Elizam nilai mak che, Dearim nimak che na, hanle ichangamo baptisma nei pek chachak?” atia arakel u na.

²⁶Hatuka Johonin amani kom, “Koi chu, tina baptisma kei na pek u, tenchu na kar u na nei riat u nok mi khat andinga a om.

²⁷Ama ha ka nuka ahong ani ngalam a kekok khitna ri ngal asut rua ni makung,” ati na.

²⁸Hiva rui ngai dora ei omna chu Jordon va rala Bethani khuana Johonin Baptisma ei pek chachakna mun han.

²⁹Hanuk nikhuana han Isua chu akoma ei hong alei muna, “Enta, Pathian Berate ramual pap achoi rang so, ati na.

³⁰Sova mi arui tak so kei ril ani zei, ‘Ka nuka mi ahong hi ka neka alian keng, asik chu ka mana aleia omsa ngal keng.’

³¹Ama hi kei hong riat nok, tenchu Pathianin Israel ngai kom ei manlang theina ranga, koiin chu tina baptisma kei hong pek,” atina.

³²Hatuka Johonin ariatphata, “Ratha chu pharvali anga van ata ei honga ama chunga ei hong om kei mu, ati na.

³³Ama hi kei hong riat nok, tenchu tia Baptisma apek ranga ana honga tirpu han, ka kom ei na ti chu; ‘Ratha ei hong chuma ei hong omna mi tak ha Ratha Anthiang le baptisma apek ani zei,’ ati na.

³⁴Hatuka ka mu sua ata chu ama hi Pathian Sapa atia kei riat ani zei.”

³⁵Hanuk nikhua reta chu Johon le a zolai ngai anni anding rit u na.

³⁶Isua ha kal achoia ahong lai tak han Johonin alei muna, “En u ta, Pathian Berate so,” ati na.

³⁷Hatuka a zolai anni ngai han ama chong ariat u le chu Isua nuk ava zi u na.

³⁸Isua anhoia ama a nu nuk ei hong zi u alei mu na, “Imo nei hong thun u?” alei ti na. Amanin, “Rabbi,” ati u na. ‘Rabbi’ ti omzia chu “Minchupu” tina ani. “Honmo nei omna?” ati u na.

³⁹Aman, “Hong u ro mu un na ti,” ati pe na. Hatuka asena ei omna chu ava mu u na. Hava nikhua han chu ama bila a om len u na. Hava lai tak han zoro chu dar manli tang ni zei ni.

⁴⁰Johon achong ariata Isua nuk azi anni bila angkhat na chu Andria, Simon Pitor a naipa.

⁴¹Ama hi a parual Simon antongpui mansa, hatuka akoma, “Koini chu Messia na mu zei,” ati na. “Messia” ti omzia chu “Krista” ei ti na ani.

⁴²Hatuka ama han Isua kom ahong ruaia. Isuan ama tiang alei ena: “Nang Jona naipasal Simon, Kipha lantin na ti.” “Kipha le Pitor” tina chu “lung” ei ti na ani.

⁴³Zing khua avar ret le chu Isua Galili rama ase rang azota hatuka Philip chu amu na; “Ka nuk na hong zi ro,” ati pe na.

⁴⁴Philip chu Bethsaida khuana Andria le Pitor omna khua dena mi ani.

⁴⁵Philip han Nathaniel anmu puia, “Mosi dan lekhabuna le deari ngaiin um ama ruia ei maziak u ha koinin chu na mu zei,” atina. Ama ha Nazaret khuana Isua, Joseph a naipasal.

⁴⁶Hatuka Nathaniel han; “Nazaret khua ata asa angkhatte ngal hi asuak mo thei?” ati na, Philipin, “Hong tan hong en ta,” ati na.

⁴⁷Isuan Nathaniel chu ama tianga ei hong amu na arui alei rila: “Enta, Israel kara mi dik tak so, a malung sunga anhuangna reng abui thak,” ati na.

⁴⁸Nathaniel han, “Hontinmo nei na riat?” ati na. Isuan: “Philipin ana kui man ata theichang kung thuaia nei om kei na mu keng,” atia a masanga.

⁴⁹Nathaniel han, “Minchupu, nang hi Pathian Sapa le Israel ngai reng na ni,” ati na a masanga.

⁵⁰Isuan, “Theichang kung thuaia kei na mu kei ti sika nei iam mo? Hiva ngai neka rui alian la mun na ti,” ati na a masanga.

⁵¹Isuan akom u na, “Atak taka kei na ril ani u zei, van anlong intia Pathian vanpalai ngai chu Miring Sapa chunga ei hong chum le ei kal la mu un na ti,” ati na.