Read Ranglong JOHONIN 10 Bible Online

JOHONIN 10 - Ranglong bible

JOHONIN 10

¹Isuan, “Atak taka keina ti ni u zei, bera makota lut lui tana atei tiang changa alut chu anru le mi suam ani.

²Tenchu makot tianga alut chu ama ha bera rungpu ani.

³Suak khar angak han ama rang keng ei malong pe, hatuka bera ngaiin um ama rol ariata hatuka ama ham bera ngai a raming chipa a paia, hatuka apanga aruaia.

⁴Hanuk abera ngai dora apanga amasuak tik lem, man ansa tira ase pe na, hatuka a bera ngaiin ama rol ariat u na.

⁵Tenchu mitei nuk chu zi u ngai maka, haneka ama ata keng ei rota ei se, asik chu mitei rol riat u mak.”

⁶Isuan hiva ankhina le akom u na chong arilam, i mo ei ril ha lei riat pe thei u maka.

⁷Hasik han Isuan athar reta, “Ataka keina ti ani u zei, koi hi bera ngai ranga suakkhar dik ka ni.

⁸Ka mana aleia hong ngai dora chu anru le mi suampu ani u, asik chu bera ngaiin amani rol riat pe u mak.

⁹Koi hi ke suakkhar, koia alut tak pei chu zokna man inti, asunga lut thei unti, apangam suak thei unti, hatuka sul sak nam laman inti.

¹⁰Anru chu anruk rang, athat rang le ansiat rang duaia ahong keng, koi kei hong chu nangni ngai damna nei chang thei u na ranga le nei iam thei u na rang keng.

¹¹“Koi hi bera rung adik khit ka ni, A bera ngai ranga ei damna tenpeia aphal ngam.

¹²Ei lo rathula bera rung ngai chu atak ni mak, ama ata tatak ei ni nok sika han, koiarasi ei hong amu le a bera ngai a maka a rota ase rang keng hatuka koiarasin bera ngai chu hong bon tia hatuka anthek zit unti.

¹³Ama chu rot inti asik chu ei lo ei ni sika, bera ngai mandon no ni.

¹⁴Koi hi bera rung asa khit, Pain ei na riat anga koiin um Pa chu ka riat hava ang taka ka bera ngai ka riat hatuka amani nin um ana riat u. Amani ranga thi tenpeia anphal ngam ka ni.

¹⁶Bera atei ka la donsa, hava ngai ha hiva ina bera ni u mak, hava ngai ham ava lak ka nang, amanim ka rol la riat unti; hatuka rahuang khat lachui unti, arung rang um angkhat ei la ni rang.

¹⁷“Hasik han Pa han ei na dit, omzia chu kei damna ten peia anchan zot keng ka ni, hava ha kei man zit ret theina ranga;

¹⁸ka kom ata tuten la viak thei no ni, asik chu koi ka ninga kei zotna ata keng, hava phalna ranga ningneina don ka ni, hatuka aman ret theina ningneina ham ka don; havan tina atho ranga ka Pa han ei na pek.”

¹⁹Hiva chong ngai sika Juda mipui kara athara ansenna ei hong suak.

²⁰Amani kar ata senkhatin, “Ama hi kachaiin ei sur achang keng, ichangamo a chong nei rangai u?” ati u na.

²¹Hanuk senkhat retin, “Hiva chong ngai hi chu kachaiin ei sur chong ang nimak, kachaiin mitacho mo aman var thei ngai?” ati u na.

²²Hava lai tak ha Biakin adarna Panta chu Jerusalema aleia oma, hava lai tak han nudin ani na.

²³Hatuka Isua chu, Biakin kola Solomon a in tuamaia aleia cheia,

²⁴Hava han Juda ngaiin ahual u na, “Ni ituk ngal mo neina lama thoi rang? Anthiang phata na ril ro nang hi Messia mo na ni?” ati u na.

²⁵Isuan, “Hava ha keina ril sua u keng ani zei, nangni hakeng ana iam u nok, Pa ningneina le ka sin tho ngai doran koi ka ruia ei na man riat u keng ani zei.

²⁶Tenchu iam u mak chena, asik chu ka bera ni u mak che.

²⁷Ka bera ngaiin chu ka rol ariat u, hatuka koiin um ka riat u, amani hanin um ka nuk ana zi u.

²⁸Hatuka taituan damnam ka man chang u na, thi u lai no ni; hatuka tuten ka kom ata anan pot thei om lai no ni.

²⁹Ka Pa han ka koma ei na pek ngai baka alian om lai mak. Pa zahual sungatam tuten hong apot thei no ni.

³⁰Pa le koi hi angkhat na ni.”

³¹Hava suale chu Juda ngaiin ei dengna rang lung ava rut u na.

³²Isuan amani kom, “Pa ata sin asa na moton u na atampa ka thona, hanle hova sin kei thona ngal mo lung le neina deng u?” ati na.

³³Hatuka amani han, “Sin asa nei tho sika lung le na deng zot mak me, tenchu Pathian nei ero sika han min miring nei ni uama ichangamo na nininga Pathiana ne an belbo hasik han ani!”

³⁴Isuan, “Nangni na Dan lekhabu lena anziak hale Pathianin, ‘pathian ngai na ni u ati,’ ati na a masanga.

³⁵Pathian chong ei hong tungna mi ngai ha, ama han Pathiana abelbo ten lekhabun ei ti chu umora adik ni mak mo.

³⁶Hantin aniten, Pa han a manthianga ramuala ahong tirin, hanum mo Pathian an ero nei la ti u rang, asik chu koi len han Pathian Sapa ka ni, kei anti sika mo?

³⁷Ka Pa sin atho ka ni nok ten na iam u no ro.

³⁸Tenchu Pa sin kei tho sunga na na iam ngal u nokam ka sin tho asa thang ha chu iam u ro, asik chu nangni ngaiin, Pa hi ka bila a om ti le koi um Pa na kei om nei riat thei u na ranga.”

³⁹Amani ngaiin Isua asur rang ati ret u le chu akut u ata anpiala asena.

⁴⁰Hatuka Isua chu Jordon varala Johonin baptisma ei pek chachakna muna asena ava oma.

⁴¹Hava han a koma mi atampa ahong u na, “Johonin ite boidong sin ei tho om mak tenchu hiva mi aruia ei ril ngai dora adik zit,” ati u na.

⁴²Hava han mi atampa han ama chu a iam u na.