Read Ranglong JOHONIN 11 Bible Online

JOHONIN 11 - Ranglong bible

JOHONIN 11

¹Bethani khuana mi khat ana a oma a raming chu Lazar. Bethani khuana ama a sarnu Mari le Martha ei omna ani.

²Puma ake na han sariak marim ahui ava khuana hatuka a sam le a ke ahui pe Mari ha ani. Ama achapa Lazar ha ana.

³Hasik han a sarnu ngaiin, Isua koma, “Puma, nei maditpu ha ana,” ati na ava man ril u na.

⁴Isuan ariata, “Lazar ei thi na ranga ana ni mak ten Pathian lianna ei anlang theina rang le Pathian Sapa ama tak chunga ei lian na rang keng,” ati pe na.

⁵Isuan Martha hanuk a zuarpuinu le Lazar ha chu adita.

⁶Tenchu Lazar ana atina thang ariat suanam hava ei lei omna khuana han ninni tang ala riak sana.

⁷Hatuka a zolai ngai rang, “Tho Judai rama kir ret u ta rei,” ati na.

⁸Hatuka a zolai ngaiin, “Minchupu, la sot rei mak hale lung le ana deng rang ei na ti u na, hava sunga nangin akir retna nei masuk mo?” ati u na.

⁹Isuan, “Sun khat hi dar somleianni ni mak mo? Sun chimripa kal achoi ngai chu anba mak asik chu hi ramuala ra-ang amuna.

¹⁰Tenchu zan kara kal a choi ngai chu anba na, asik chu ra-ang ei om nok sika,” ati na.

¹¹Isuan hiva chong aril suale amani koma, “Koini na mal madit Lazar chu aleia in zeia, hanum nisela ama ha a in ata avan thui rang la se ka ting,” ati na.

¹²A zolai ngaiin, “Puma, ama ha aleia in ani ten lan thui ret bo ni,” ati u na.

¹³Isuan ei ti zot chu Lazar aleia thi sua zei, tenchu amani mandon ret ha chu pongansana a in pangai ha ani.

¹⁴Hasik han Isuan anthiang phata, “Lazar athi zei, ati pe na.

¹⁵Tenchu nangni sika ka rai asan asik chu hava lai han kei va om nok sika, nangni han nei iam thei u na ranga, hanum nisela hong u ro akom, se u rei,” ati na.

¹⁶Thoma (Anphir ei ti ha) aman a zolai changpui ngai koma, “Tho koinim minchupu bila se kiar u rei, ama bila va thi u rei,” ati na.

¹⁷Isuan Lazar chu thana ni manli alei ni zei ti ahong riata.

¹⁸Jerusalem ata Bethani chu atom khita kilomitar anthum ani.

¹⁹Hatuka Juda mi tampa han Martha le Mari ha achapa u ei thi sika lungngam asak ranga aleia hong ani u na.

²⁰Martha han Isua ahong atina ei riat le anmu pui ranga aleia se na, ten Mari chu ina aleia oma.

²¹Martha han Isua koma, “Puma hiva hin a om ni tan la chu ka chapa thi no ni ba!

²²Tenchu atun um nang chu Pathian koma nei zong tak pei aman ana pek ti ka riat,” ati na.

²³Isuan akom, “Na chapa chu anthuia la hong dam ret inti,” ati pe na.

²⁴Hatuka ama han, “Nikhua hek tika athi ata anthui ret ngai bila ei la hong dam ret rang ti chu ka riat,” ati na a masanga.

²⁵Isuan akoma, “Koi hi athi ata anthui ret le adam ka ni. Koi ana iam tak pei chu athi ngalam la dam ret inti.

²⁶Hatuka adama a om tak le koi ana iam tak chu thi lai no ni, hiva hi na iam mo?” ati na.

²⁷Ama han, “O, Puma, nang hi Messia, Pathian Sapa ramuala ahong rangpu ha na ni ti ka na iam,” ati na a masanga.

²⁸Martha han hiva chong aril suale a zuarpui nu Mari ha maruka akuia, “Minchupu hi hin a om zei hatuka nang ha hong rase a na ti,” ati na ava rila.

²⁹Mari han ariat suale chu anrarapa anthuia avan mupui ranga asena.

³⁰Hava han Isua chu khuana la hong lut mak Martha han ei van mupuina muna ala oma.

³¹Havalai tak han, Mari bila ina aleia om puia lungngam aleia sak Juda mi ngaiin Mari anrapa anthuia apanga ei se amu u na a nu nuk ava zi u na, amandon u chu thana ava chap ranga ase ni inti ati u na.

³²Hatuka Mari chu Isua ei omna muna asena, ei va mu le a ke kunga avan boka, “Puma, hiva hin a om ni tan la chu ka chapa hi thi no ni ba,” ati na.

³³Isuan ei chap a muna hatuka abibila ahong Juda mi ngai ei chap u ham a muna a malung atona hatuka a malung a man na sabaka.

³⁴“Ama ha hovanmo nei va phum u?” ati na arakela. Amani han, “Puma, hong tan la hong enta,” ati na amasang u na.

³⁵Isua achapa.

³⁶Mi atei ngaiin, “Ama han ama rang itukmo ei madit so en uta,” ati u na.

³⁷Tenchu abil u na mi senkhatin, “Hiva mi hin mitacho aman var theiin le Lazar ei thi rang le man len thei mak mo?” ati u na.

³⁸Annuk sira, Isua than tiang ase reta, ha than ha khur sung chu lung le ankhar ani.

³⁹Isuan, “Lung ha khai u ro!” ati na.Martha a thipa sarnu han, “A marim se zei ni Puma.Ni manli ani zei ei anphumna,” atina a masanga.

⁴⁰Isuan ati pe, “Na iam ten Pathian lianna mu u na ti ka ti hale?”

⁴¹Lung ha akhai u na, Isua atanga ati, “Ka Pa nei na riat sika ka na manpak.

⁴²Ka riat ka he na rangai babang, ten hivana mi ngai sika kei ti, nangin nei na hong tir atia ei iam u na rang.”

⁴³Hava ngai ati suale, Isuan anring pana apaia “Lazar hong suak ro!” ati na.

⁴⁴Ahonga suaka a kut a ke puan le anthuam, anzel, Isuan, “Khek tan man se u ro,” ati.

⁴⁵Mana honga en ngaiin Isua ei tho ngai amu u le Isua a iam u.

⁴⁶Tenchu mi senkhat Pharisi ngai kom ase u na Isua rui ava ril u.

⁴⁷Hasik han Pharisi ngai le chaizung ulian ngaiin ruiril ngai antongpui u na, “Enta, imo tho ma ni? Hiva mi boidong sin tho hi!

⁴⁸Hintin hin ala mantho bang ten, mi doran iam inti, Rom ulian ngaiin kut thak intia na Biakin le na ram na masiat inti!” ati u na.

⁴⁹Abil u na angkhat Kaiapha atina Chaizung Ansang hava kuma a oma ama ha “Itukmo nei mo! atina.

⁵⁰Na nam pumpui na thi nek ten angkhat ei thi chu asa re u mak che mo!”

⁵¹Ataka chu hava ha ama ranga ei ti nimak; tenchu hava kum han Chaizung Ansang ei ni sika, ama han Isua ei thi rang Juda ngai ranga,

⁵²hanuk amani rong ni maka aloma Pathian mi anthek ngai dora munkhata ei bum rang.

⁵³Hava nikhua len ata Juda ulian ngaiin Isua thatna amansuk u na.

⁵⁴Hasik han Isua Judai tang han anlang sabaka kal choi maka, tenchu amaka philchar kola ase na Ephraim khopuia hava han a zolai ngai le ava oma.

⁵⁵Zokna Panta ha ahonga nai zeia; khua ata Jerusalema ase u na hava Panta asuak man aser khukha zok ranga.

⁵⁶Hava ngai han Isua a rok u na, Biakina ei anchun u han ankel ansiat u na, “Imo na ti? Hong ra i no ni? Pantana hin hong ni mo?”

⁵⁷Chaizung le Pharisi ngaiin chong apek u na Isua ei omna ariat takin ei hong ril rang, ei sur thei u na ranga.