Read Ranglong JOHONIN 12 Bible Online

JOHONIN 12 - Ranglong bible

JOHONIN 12

¹Zokna Panta ni ruk mana Isua chu Lazar athi ata ei mathui retna Bethani khuana ava tunga.

²Hava han ama ranga khului bu nekna a mansuk pe u na, Marthan a dorbo adoma, Lazar ha bu nek ei ansut pui ngai bila angkhat ani.

³Hatuka Mari han ser atan zotor sariak marim ahui alu khit a hong choia Isua ke a hong khua pe na hatuka a sam le a ke a hui pe na, hava sariak marim han in pumpui ei thut ziak ani zei.

⁴Hatuka Isua a zolai ngai bila Juda Iskariot ama ansur rangpu han,

⁵“Hava sariak marim ahui ha sumru razan thum le azuara ichangamo anriang ngai ei anpek nok?” ati na.

⁶Hava ha anriang ngai lung ei man pong sika ei ti ni mak, tenchu anru ei ni tuara ei ti keng, asik chu sum siakna marsa ha aman ei vong ania, havan ata ha sum ei lak chachak ania.

⁷Tenchu Isuan, “Ama chu atheia mak u ro, asik chu nangkan kan phum tika rang lei man hoi u ro.

⁸Anriang ngai chu umora na bil u na a om rang keng tenchu na bil u na koi chu om babang no ning,” ati na.

⁹Hatuka Juda mi ngaiin Isua chu Bethani khuana a om ti ariat u na hava han ase lup u na, tenchu Isua sika ronga ase ni u lai mak, ama han athi ata ei mathui Lazar ava mu rang uala ase u ani.

¹⁰Hava bibila han chaizung ulian ngaiin Lazar um athatna avang u na.

¹¹Asik chu Juda mi atam riaiin ama sika Isua a iam ei hong tam u na han.

¹²Hava nikhua zingkhua vara Zokna Pantana ase mipuiin Isua Jerusalema ahong zei ti ariat u le chu,

¹³Theiletum bua anlek chunga ama le anmu ranga alei va suak u na, ankhek u na, “Hosanna! Puma raminga ahong Israel Reng ahong chu borsang tung rase,” ati u na.

¹⁴Isuan sakuarpar khat chunga achunga Pathian lekhabuna anziak ang tak han,

¹⁵“Zion sanu, achi no ro, na reng chu sakuarpar chunga achuanga ahong zei,” ati na.

¹⁶Hava lai tak han chu a zolai ngaiin la riat vak thei u maka, tenchu Isua anlala ahonga om suale chu Pathian lekhabuna ama ruia ei lei ril ngai le min ama chunga ei tho u ngai dora hankeng ei lan thei u ala ni.

¹⁷Hatuka aman Lazar ha than ata a paia athi ata a mathui laia a bila mi atampa a om ngai len han ariatpui achang u na.

¹⁸Hava sika han mipuiin ama chu avan tong pui u na, ama han hiva boidong sin ngai hi ei tho keng ti ei riat u na han.

¹⁹Pharisi ngai ha anril ansiat u na, “En u ta, ite nei tho thei omlai mak hile! Na mu u zei mo! Ramual mi doran ama nuk keng ei zi zit ani zei,” ati u na.

²⁰Pantana Pathian abiak ranga Jerusalem ase Grik mi senkhat a oma.

²¹Hava mi ngai ha Galili rama Betsaida mi Philip akoma ase u na, “Ka pu, Isua hi amu rang na zot,” ava ti u na.

²²Hankeng Philip ase na Andria kom ava rila, hatuka anin u Isua kom ase na ava ril u na.

²³Tenchu Isuan akom u na, “Miring Sapa chu ei anlalna rang hun ahonga suak zei.

²⁴Atak taka keina ril ani u zei, sahum hi phila achula athu nok ten asang bang ke ei ni, tenchu hava ha athun keng mara tampa ei rasua.

²⁵Aninga ei damna andit ngai la machan unti, tenchu hi ramuala aninga ei damna itena tel lui ngai chu umora adamna ei siak sua keng ani zei.

²⁶Ka dorbo adom zot ten ka nuk na hong zi nget rase. Kei omna taka ka dorbondom ham ei om theina ranga, Ka dorbondom tak chu ka Pa ninum lalchi man ruai inti.

²⁷“Atun hin ka malung ahongan buai zei, Imo kei ril rang? ‘Ka Pa, hiva hun ata na manlen ro ba’? Tenchu hiva hun antak asuak rang ngala atun hiva ten hin kei hong den ani zei!

²⁸Hasik han ka Pa, na raming anliana om rase!” ati na. Hatuka vanram ata hiva he hi ahong anthanga, “Ka manlian sua zei, athara manlian ret ka ting,” ati na.

²⁹Hava he ha akola mipui anding ngaiin ariat u na hatuka ankhal u na mi senkhatin, khuanri imo ni ati u na. Hanuk atei senkhatin chu, “Vanpalai ngai khatin ei chong pui keng ei ni rang,” ati u na.

³⁰Tenchu Isuan akom u na, “Hiva he hi koi ka ranga ahonga chong ni mak tenchu nangni ngai rang keng.

³¹Atun hin hi ramual mi ruirilna ani zei, atun hin hi ramuala ruirilpu chu anpei inti.

³²Hatuka ramual ata chunga ka kal tik le chu mi dora ka tiang la rakuai kiar ka ti,” ati na.

³³Ama chu i ang thina na mo ei va thi rang hava ha achong ril han ei manlang ani.

³⁴Hatuka mipuiin akoma, “Messia chu umora a om keng, koinin chu Dan bu ata nei riat. Hanle hontinmo nangin, Miring Sapa chu chung tiang ei la kal rang nei ti? Hanle hava Miring Sapa ha tumo?” ati na amasang u.

³⁵Isuan amani rang, “Ra-ang hi na kar u na chomokhat bak rang ala om, ra-ang na nei ulai hin chei u ta ro, azingin ei na chelbo thei u nokna ranga, azing kara aleng chu aninga ei se na rang ti thei mak.

³⁶Ra-ang na nei ulai hin ra-ang hi iam u ro, ra-ang mi nei hong chang thei u na ranga.” Isuan hiva chong ngai aril suale chu amani bil ata ankhaia avan thup vata.

³⁷Amani matona hiva ang boidong sin atho nam ama chu iam thei u mak.

³⁸Hava ha deari Isaiin chong alei ril ei hong dik theina ranga; Aman ei ti: “Puma, koinin nei ril hi tumo a iam? Tu kom mo Puma akut Puma ranak ei manlang rang?” ati na.

³⁹Hiva sik hin amanin ei iam thei u nok, Isaiin ei ti sa chu:

⁴⁰“Pathianin amit u ei manzing pe, A malung u ei man it pe, Hanoten ala hong mu u na, A la hong riat thei u na A la honga kir ving u ten Ka la mandam unle.”

⁴¹Isaiin hiva chong ngai hi ei ril, asik chu Isua ei anlianna ei mu hatuka ama arui hakeng ei ril ngalum.

⁴²Hanum nisela Juda ruaitu ngai bila mi tampan Isua a iam u na, tenchu Pharisi ngai anchi tuara angam panga ril ngam u maka, asik chu anchuna in ata ei masuak u rang ani na.

⁴³Asik chu Pathian koma anpakna nek ten miring koma anpakna keng ei madit bet u.

⁴⁴Isuan ankheka ei ti, “Koia ana iam chu koi rong la ni mak, koi ana honga tirpu ham keng ei iam.

⁴⁵Hatuka koi ana mu chu koi ana honga tirpu ham ei mu keng.

⁴⁶Ramuala ra-ang anga ahong ka ni, koi ana iam tak chu azing kara ei om lai nokna ranga.

⁴⁷Koi ka chong ariata tel lui ngai chunga ite ruiril makung asik chu ramuala rui aril ranga ahong ni makung tenchu ramual andam ranga ahong ka ni.

⁴⁸Koi ana henga ka chong pom lui chu achung u na rui aril rang angkhat a om. Hiva ka chong ril nget hi nikhua hek tika achung u na rui la hong ril inti!

⁴⁹Asik chu koi ka ninga kei ril ni mak Tenchu kei ti rang le kei ril rang ngai dora hi koi ana honga tirpu Pa han chong ei na pek keng.

⁵⁰Hanuk chu a chong rasua ngai dora hi umor damna ti ka riat. Hasik han chong kei ril ngai dora hi Pa han ka koma ei na ril anga kei ril.”