Read Ranglong JOHONIN 13 Bible Online

JOHONIN 13 - Ranglong bible

JOHONIN 13

¹Zokna Panta aphaman Isuan hi ramual amaka Pa koma asena hun ahonga suak zei ti ariata. Hatuka ramuala ei ompui a mi madit ngai chu ahek tenpeia a madit tit a.

²Hatuka Isua le a zolai ngai zan bu anek u lai han kachai rengin aphaman ata Simon a naipasal Iskariot Juda ha Isua ansur ranga malung alei man vong suale chu;

³Pa han aloma ama kuta ei pek sua keng ani zei ti Isuan ariata, hatuka Pathian kom ata ei honga ama kom den ei se ret rang ti ham ariata.

⁴Hava suale chu a bu nek u na ata anthuia a chunga a puan rasil akheka hatuka kamsa le akong avela.

⁵Hatuka bangtoka ti asunga a zolai ngai ke a rasuk pena a konga puan anvel lehan ake ahui pe na.

⁶Hava suale Simon Pitor akom ahonga, “Pitorin akoma, Puma, ka ke mo neina rasuk pe rang?” alei ti na.

⁷Hatuka Isuan, “Kei tho hi atun la riat thei no ta ni, nangkan chu la riatin na ti,” ati na amasanga.

⁸Hatuka Pitorin akoma, “Ka ke tham chu rasu thak no ta ni,” ati na.Isuan akoma, “Ka na rasuk pe nokten ka kom ata ite nei chang rang om mak,” ati na.

⁹Simon Pitorin akoma, “Hanok anten ka ke rong nilai mak, ka kut le ka lum na rasuk pe ta ro,” ati na a masanga.

¹⁰Isuan akoma, “Tinbual sua ngai chu a ke rong nokten ite ansuk nang lai mak, aloma anthiang kiar keng ani zei angkhat dak baka chu na lom u na anthiang kiar keng na ni u zei,” ati na.

¹¹Ama ansur rangpu ha Isuan ei lei riat thei sika han hiva chong hi ei lei ril, “Angkhat dak rong nok chu atei chu nan thiang kiar u” ati na.

¹²A ke u ngai a rasuk pe suana achung choi puan arasil ret suale chu a mun dena ahong ansuta hatuka akom u na, “Na chung u na kei tho hi i ei ti na mo?” ati na a rakela.

¹³“Nangnin minchupu le Puma neina ti u. Havan tina neina rakok u han na dik u, asik chu hava tak ha kei ni na ani na.

¹⁴Na Puma le Minchupun lua na ke u ka na rasuk pe u tak anten nangni le nangni ngai um na ke u ansuk ansiat u ro.

¹⁵Na chung u na Kei tho anga nangnim nei tho thei u na ranga a enrua keina manmu u ani zei.

¹⁶Atak taka keina ti ani u zei, suak hi a puma neka lian ngai no ni, atirpu neka antirpu him lian ngai mak.

¹⁷Atun hin adik chu na hong riat u zeia; hava tak ha ataka na manlang thei u ten na chanasa ani u zei!

¹⁸“Na lom u na ranga rui ril makung, ka mi thang ngai chu ka riat. Tenchu Pathian lekhabu na chong ei kip theina ranga; ‘Ka bila bu ana nek pui nget han ka raldui ke achang zei.’

¹⁹Atun hin ahonga chuk man ata keina lei ril u ani zei, ahong chuk tik le chu ama ha ‘Koi Keng atia’ neina iam thei u na ranga.

²⁰Atak taka keina ril ani u zei, kei hong tirpu apom tak chu koi ei na pom lenum ani; hanuk koi ana pom tak chu ana honga tirpu apom lenum ani,” ati na.

²¹Isuan hava chong ngai a ril suale chu a malung rila anbuaia hatuka andang phata a puanga, “Atak taka keina ti ani u zei; na bil u na mi khatin koi na la mansur inti,” ati na.

²²Hava suale chu a zolai ngai han hiva hi tu ei tina mo atina, athona chang riat rahai u maka amani le amani ha keng ahongan en avan en u na.

²³Hatuka a zolai ngai bila angkhat, Isuan ei madit han ama aropsuama avan boia.

²⁴Hatuka Simon Pitorin a mit le abiaka, “Tu rang nei tina mo? atina rakel tan na manthei ro ti ro,” ati pe na.

²⁵Ama chu Isua ropsuama ei om balam ata ala van son bet sana hatuka, “Puma ama ha tu mo?” ati na a rakela.

²⁶Isuan, “Vaipol khenga ka phum suale kei pek tak ha ama ha ani len ani zei,” ati na a masanga. Hankeng vaipol chu khenga a phum suale a laka Simon a naipasal Juda Iskariot kom a peka.

²⁷Hatuka hava vaipol apek suale soitan chu asunga ei lut len ani zei. Hasik han Isuan a koma, “Nei tho rang chu tho lilip ta ro,” ati pe na.

²⁸Tenchu bu nek ei ansut pui ngaiin, Isuan ichangmo ama koma hiva ang chong ei ril pe ati na tuten ariat thei om u mak.

²⁹A zolai senkhatin chu, Juda ha sum marsa ei don sika Isuan Pantana amani ngai ei nang u rang len ha va rachok ro ei ti ni inti, mo ole anriang ngai rang hong te mo chu va pe ro ei ti ni inti ati na amandon u na.

³⁰Hatuka Juda chu vaipol a ban suale chu anrap vata a suaka ase lena. Hava han zan ahonga zing sua zeia.

³¹Hatuka Juda a suaka ase suale Isuan ei ti, “Atun keng Miring Sapa ei lianna ei lan lang ala ni; hatuka atun keng Pathian ei lianna ham ama tak chunga ei lan lang thei ani zei.

³²Pathian ei lianna amana han anlang ten Miring Sapa aning lena ei anlianna chu Pathianin manlang pe len inti, hatuka ama han anrapa manlian inti.

³³Ka nai ngai, na bil u na asot leng lai no ning, Na la rok un na tia, tenchu Juda ulian ngai koma, ‘Kei se na taka se thei u no ta ni kei ti anga atunum keina ti ret u ani zei.’

³⁴Hasika han atun chongmak athar keina pek ani u zei, nangni ngai lungkham anmunsiat u ro. Koiin keina dit u anga nangni ngai um anditansiat u ro.

³⁵Nangni le nangni andit ansiatna na don tit thei u ten, nangni hi ka zolai nei ni u ha mi doran riat kiar inti,” ati na.

³⁶Simon Pitorin akoma, “Puma, hovanmo nei se rang?” ati na a rakela. Isuan, “Atuna kei se na ranga hin ka nuk na hong zi thei no ta ni; tenchu nangkan chu na la hong zi na ti,” ati na a masanga.

³⁷Hatuka Pitorin, “Puma, ichangamo atun na nuk keina hong zi thei nok rang ati? Nang na sika athi tenpei ranga anphal ka ni,” ati na.

³⁸Isuan, akoma, “Koi ka sika nei damna hi anchan hial ranga nan sin mo? Atak taka keina ti ani zei, ar akhuang man nangin voi anthum riatnokom na tho na ti,” ati pe na.